Ha Yini Bibele Yi Fanele Yi Ku Tsakisa?

Bibele i buku leyi dumeke swinene emisaveni. Ha yini? Xo sungula, ya olova ku yi twisisa. Yi ni marungula lama nga ntiyiso ya vutomi bya vanhu ni ndlela leyi va tirhisaneke ni vanhu van’wana ha yona ni Xikwembu. Marungula lawa ma hi dyondzisa tidyondzo leti twisisekaka hi ku tirhisa marito yo olova ni lama kongomeke lama nga hundzuluxeriwaka hi tindzimi ta madzana ni ku twisisiwa hi vanhu lava nga endhawini yin’wana ni yin’wana. Nakambe milawu ya Bibele ya tirha minkarhi hinkwayo.

Xa nkoka swinene, Bibele a hi buku leyi vulavulaka hi Xikwembu ntsena kambe i buku leyi humaka eka Xikwembu. Yi paluxa vito ra Xikwembu, vumunhu bya xona ni xikongomelo xa xona lexi nga cinciki xa ku tumbuluxa misava ni vanhu. Bibele yi tlhela yi vulavula hi matimu ya swilo leswinene ni swo biha: matimu lama tsakisaka, lama katseke misava hinkwayo ni ku va ni makumu lama tsakisaka. Ku hlaya Bibele hi ku tiyimisela swi ta endla leswaku hi va ni ripfumelo ni ntshembo.

EBibeleni, hi kuma rungula leri nga kumekiki kun’wana. Hi xikombiso, Bibele yi hi byela ntiyiso malunghana ni tinhloko-mhaka to fana ni leti:

• Laha hi humaka kona nileswaku ha yini hi xaniseka

• Leswi Xikwembu xi swi endleke leswaku xi kutsula vanhu

• Leswi Yesu a hi endleleke swona

• Vumundzuku bya misava ni vanhu

Ha yini u nga tinyiki xinkarhana xa ku hlaya matluka lama landzelaka kutani u kambisisa leswaku Bibele yi tamele rungula rihi?