Ndlela Leyi Hi Nga Pfunetaka Ha Yona Ku Enerisa Swilaveko Swa Van’wana

FRANÇOIS, nkulu un’wana wa le tikweni leri nga le vuswetini u ri: “Endzhaku ka loko lava hluriweke eka nhlawulo va nga enerisekanga, ku ve ni madzolonga lama endleke leswaku Timbhoni ta Yehovha ta magidi ti baleka emakaya ya tona. Swakudya ni mirhi swi sungule ku kala naswona leswi a swi ri kona a swi durha ngopfu. Tibangi ti pfariwile naswona michini ya timali a yi nga ri na nchumu kumbe a yi nga ha tirhi.”

Hi ku hatlisa vamakwerhu va le rhavini va sungule ku tisa mali ni swilo swin’wana leswi a swi laveka hi xihatla eka Timbhoni leti bohekeke ku baleka emakaya ya tona ti ya hlengeletana eTiholweni ta Mfumo etikweni rero. Mintlawa leyi lwisanaka a yi pfale magondzo, kambe leswi mintlawa yoleyo hayimbirhi a yi swi tiva leswaku Timbhoni a ti hlanganyeli eka swa tipolitiki, hakanyingi a yi pfumelela timovha ta le rhavini leswaku ti hundza.

François u ri: “Loko hi ri karhi hi ya eHolweni yin’wana ya Mfumo, vanhu van’wana lava a va hi tumbelerile va balesele movha wa hina. Kambe maqulu ma hi hupile. Hi te loko hi vona socha ri tsutsuma ri hi kongomile ri khome xibamu hi nambe hi tlherisela movha endzhaku ivi hi tlhelela erhavini. Hi nkhense Yehovha hileswi hi poneke. Hi siku leri landzelaka, vamakwerhu va 130 lava a va ri eHolweni yoleyo ya Mfumo va fike endhawini leyi sirhelelekeke. Van’wana va te erhavini, laha hi nga fika hi va khathalela hi tlhelo ra moya ni ra nyama kukondza nkitsikitsi wu hela.”

François u ri: “Endzhaku ka sweswo rhavi ri amukele mapapila yo tala lama humaka eka vamakwerhu etikweni hinkwaro lava a va kombisa ku tlangela. Ndlela leyi a va tshemba Yehovha ha yona yi kurile loko va vone ndlela leyi vamakwavo va le tindhawini tin’wana va va pfuneke ha yona.”

Loko ku ri ni timhangu ta ntumbuluko ni leti vangiweke hi vanhu, a hi byeli vamakwerhu lava hlaseriweke leswaku va ‘kufumela naswona va xurha.’ (Yak. 2:15, 16) Ematshan’weni ya sweswo, hi lava tindlela to enerisa swilaveko swa vona swa nyama. Hilaha ku fanaka, endzhaku ka loko va lemukisiwe hi ndlala leyi a yi ta va kona hi lembe-xidzana ro sungula, “vadyondzisiwa va [tiyimisele] ku rhumela swo phalala vamakwavo lava tshamaka eYudiya un’wana ni un’wana wa vona hilaha a kotaka hakona.”—Mint. 11:28-30.

Tanihi malandza ya Yehovha hi hisekela ku pfuna vanhu lava pfumalaka hi swilo leswi vonakaka. Hambiswiritano, vanhu va lava mpfuno ni hi tlhelo ra moya. (Mat. 5:3) Leswaku Yesu a pfuna vanhu va xiya leswaku va ni xilaveko hi tlhelo ra moya nileswaku va fanele va xi enerisa, u lerise valandzeri vakwe ku endla vanhu vadyondzisiwa. (Mat. 28:19, 20) Un’wana ni un’wana wa hina u heta nkarhi wo tala, matimba ni mali ya yena a hetisisa ntirho wolowo. Nhlengeletano ya Yehovha yi tirhisa mali yin’wana leyi nyikeriweke leswaku yi pfuna hi swilo leswi vonakaka, kambe minyikelo ngopfu-ngopfu yi tirhiseriwa ku rhangisa timhaka ta Mfumo ni ku twarisa mahungu lamanene. Xisweswo hi kombisa leswaku hi rhandza Xikwembu ni vaakelani va hina.—Mat. 22:37-39.

Lava seketelaka ntirho wa misava hinkwayo wa Timbhoni ta Yehovha va nga tiyiseka leswaku minyikelo ya vona yi tirhisiwa hi ndlela leyinene ni leyi faneleke. Xana u nga swi kota ku pfuna vamakwenu lava pfumalaka? Xana wa swi navela ku seketela ntirho wo endla vanhu vadyondzisiwa? Loko swi ri tano, “u nga tshuki u ala ku va endlela leswinene lava swi va lulameleke, loko swi ri ematimbeni ya voko ra wena ku swi endla.”—Swiv. 3:27.

TINDLELA LETI VAN’WANA VA HLAWULAKA KU NYIKELA HA TONA EKA NTIRHO WA MISAVA HINKWAYO

Hilaha a swi ri hakona enkarhini wa muapostola Pawulo, vo tala va “veke swo karhi etlhelo,” kumbe va tivekele mali yo karhi leyi va nga ta yi hoxa eka mabokisi ya minyikelo evandlheni, lawa ma funghiweke hi marito lama nge, “Ntirho Wa Misava Hinkwayo.” (1 Kor. 16:2) N’hweti yin’wana ni yin’wana, mavandlha ma rhumela minyikelo yoleyo ehofisini ya Timbhoni ta Yehovha leyi langutelaka tiko ra ka vona. Nakambe swa koteka leswaku u rhumela minyikelo hi ku kongoma eka vandla ra swa nawu leri tirhisiwaka hi Timbhoni ta Yehovha ta le tikweni ra ka n’wina. Leswaku u tiva vandla ra swa nawu leri tirhisiwaka hi Timbhoni ta Yehovha ta le tikweni ra ka n’wina, hi kombela u fonela rhavi leri langutelaka tiko ra ka n’wina. Adirese ya rhavi yi nga kumiwa eka www.jw.org/ts. Minyikelo leyi u nga ha yi rhumelaka hi ku kongoma hi leyi landzelaka:

MINYIKELO LEYI KONGOMEKE
- Minyikelo ya mali, swin’wetsin’wetsi kumbe nhundzu yin’wana ya nkoka.
- Katsa ni papila leri kombisaka leswaku mali kumbe nhundzu ya kona i minyikelo leyi kongomeke.
KU NYIKELA LOKU KUNGUHATIWEKE

Ku engetela eka ku nyikela hi mali ni hi nhundzu ya nkoka, ku ni maendlelo man’wana yo nyikela lama vuyerisaka ntirho wa Mfumo emisaveni hinkwayo. Maendlelo lawa ma xaxametiwe laha hansi. Ku nga khathariseki leswaku u lava ku tirhisa endlelo rihi kumbe maendlelo wahi, hi kombela u rhanga u fonela rhavi leri langutelaka tiko ra ka n’wina leswaku u ta tiva leswaku hi wahi maendlelo lawa ma xaxametiweke laha hansi lawa ma tirhisiwaka etikweni ra ka n’wina. Tanihi leswi swilaveko swa le nawini ni milawu ya swibalo swi hambanaka, i swa nkoka leswaku u vulavurisana ni mutsundzuxi wa ta swibalo ni wa swa nawu lava va swi dyondzeleke, loko u nga si hlawula ndlela leyi u lavaka ku nyikela ha yona.

Ndzindza-khombo: Minyikelo yi nga endliwa hi ku tsala vandla leri tirhisiwaka hi Timbhoni ta Yehovha tanihi leri nga ta sala ri kuma mali ya ndzindza-khombo wa vutomi kumbe wa mudende loko n’wini wa wona a fa.

Tiakhawunti ta Bangi: Ku nga ha tsarisiwa vandla leri tirhisiwaka hi Timbhoni ta Yehovha loko sweswo swi fambisana ni swilaveko swa tibangi ta tiko ra ka n’wina eka tiakhawunti ta bangi, mali leyi lombisiweke hi ntswalo (certificates of deposit), kumbe akhawunti leyi munhu a yi pfulaka loko a kuma mali leyi a nyikiweke yona loko a huma penceni kumbe leyi nyikeriwaka loko n’wini wa yona a fa.

Tixere ni Mali leyi Lombisiweke hi Ntswalo (Bonds): Tixere ni mali leyi lombisiweke hi ntswalo leswi nyikeriweke eka vandla leri tirhisiwaka hi Timbhoni ta Yehovha tanihi nyiko leyi kongomeke kumbe ku endliwa ntwanano wa leswaku yi ta tekiwa ntsena loko loyi a nyikeleke ha yona a fa.

Miako ni Ndhawu: Loko u lava ku nyikela hi muako ni ndhawu, rhanga hi ku tihlanganisa ni rhavi. Rhavi ri ta vona loko ri ta tirhisa muako ni ndhawu yoleyo kumbe loko swi ta antswa ku va swi xavisiwa ivi mali ya kona yi nyikeriwa eka ntirho wa misava hinkwayo.

Mapapila ya Ndzhaka Ni Vulawuri Bya Timali (Wills and Trusts): Muako kumbe mali swi nga ha nyikeriwa eka vandla leri tirhisiwaka hi Timbhoni ta Yehovha hi ku tirhisa mapapila ya ndzhaka lawa mufi a ma tsaleke a nga si fa kumbe hi ku tsala vandla tanihi leri nga ta kuma mali eka nhlangano wolowo. Vandla leri ri nga ha tshikiwa ri nga hakerisiwi xibalo xa mali ya kona. Papila ra le nawini leri tirhisiwaka hi Timbhoni ta Yehovha ta le tikweni ra ka n’wina ri nga ha va ri ri ni vito ra loyi a faneleke a kuma mali kumbe ndzhaka. A ri fanelanga ri va ni vito ra muyimeri wa swa nawu, mulawuri wa timhaka ta ntirho kumbe loyi a sayinelaka timali ta ndhawu leyi u tshamaka eka yona.

Loko u lava rungula leri engetelekeke, u nga ha bela Hofisi ya Accounting riqingho kumbe u tsalela rhavi leri langutelaka tiko ra ka n’wina.

HOFISI YA ACCOUNTING

Watch Tower Bible and Tract Society of South Africa

Private Bag X2067

Krugersdorp

1740

South Africa

Riqingho: +27 11 761 1323