“Ntirho I Wukulu”

A KU RI nkarhi wa leswaku ku va ni nhlangano wa nkoka swinene eYerusalema. Hosi Davhida u vitane tihosana, vatirhi va le hubyeni ni vavanuna va matimba. Va tsakile swinene ku twa xitiviso xa nkoka. Yehovha u byele Solomoni, n’wana wa Davhida leswaku a aka tempele leyikulu leyi a yi ta tirhiseriwa ku gandzela Xikwembu xa ntiyiso. Hosi leyi dyuhaleke ya Israyele yi nyikiwe pulani ya tempele leyi exivonweni naswona yi yi nyike Solomoni. Davhida u te: ‘Ntirho i wukulu; hikuva tempele a hi ya munhu, kambe i ya Yehovha Xikwembu.’—1 Tikr. 28:1, 2, 6, 11, 12; 29:1.

Kutani Davhida u te: “I mani la tinyiketelaka namuntlha leswaku a tata voko rakwe hi nyiko ya Yehovha?” (1 Tikr. 29:5) Loko a wu ri kona, a wu ta va u endle yini? Xana a wu ta susumeteleka ku seketela ntirho lowu lowukulu? Vaisrayele va teke goza. Entiyisweni, va “[tsakisiwe] hi magandzelo ya vona ya ku tirhandzela lawa va ma humesaka, hikuva a va humesa magandzelo ya ku tirhandzela eka Yehovha hi mbilu leyi heleleke.”—1 Tikr. 29:9.

Endzhaku ka malembe yo tala, Yehovha u endle nchumu lowukulu ku tlula tempele. U simeke tempele leyikulu ya moya, ku nga lunghiselelo leri endlaka leswaku vanhu va kota ku n’wi gandzela hikwalaho ka gandzelo ra Yesu. (Hev. 9:11, 12) Yehovha u va pfuna njhani vanhu leswaku va kota ku va ni vuxaka na yena namuntlha? U tirhisa ntirho wo endla vadyondzisiwa. (Mat. 28:19, 20) Hikwalaho ka ntirho lowu, lembe ni lembe ku dyondzeriwa swichudeni swa Bibele swa timiliyoni, ku khuvuriwa vanhu va magidi naswona ku simekiwa mavandlha ya madzana.

Hikwalaho ka ku andza loku, ku fanele ku kandziyisiwa tibuku to tala leti sekeriweke eBibeleni, ku akiwa ni ku khathaleriwa Tiholo ta Mfumo ni ku kuma kumbe ku hirha tiholo leti tirhisiwaka ku khomela tinhlengeletano. Xana wa pfumela leswaku ntirho wa hina wo chumayela mahungu lamanene i wukulu naswona wa vuyerisa?—Mat. 24:14.

Ku rhandza Xikwembu ni warikwenu ni leswi ntirho wa hina wo chumayela hi Mfumo wu nga wa xihatla, swi susumetela vanhu va Xikwembu namuntlha ku ‘tinyiketela ku tata voko ra vona hi nyiko ya Yehovha.’ Va endla sweswo hi ku nyikela hi ku tirhandzela. Swa tsakisa swinene ku “xixima Yehovha hi swilo swa [hina] swa nkoka” ni ku vona ndlela leyi minyikelo leyi yi tirhisiwaka ha yona hi ku tshembeka ni hi vutlhari leswaku yi seketela ntirho lowu, lowukulu!—Swiv. 3:9.

Tindlela Leti Van’wana Va Hlawulaka Ku Nyikela Ha tona Eka Ntirho Wa Misava Hinkwayo

Vo tala namuntlha va ‘veka swo karhi etlhelo’ kumbe mali yo karhi leswaku va ta nyikela ha yona eka bokisi leri tsariweke leswi, “Ntirho Wa Misava Hinkwayo” emavandlheni ya vona. (1 Kor. 16:2) N’hweti ni n’hweti, mavandlha ma rhumela minyikelo yoleyo ehofisini ya Timbhoni ta Yehovha leyi langutelaka tiko ra wona. Nakambe swa koteka leswaku u rhumela minyikelo hi ku kongoma eka vandla ra swa nawu leri tirhisiwaka hi Timbhoni ta Yehovha etikweni ra ka n’wina. Leswaku u tiva vandla ra kona, hi kombela u nghena eka www.jw.org kumbe u fonela rhavi ra Timbhoni ta Yehovha ra le tikweni ra ka n’wina. U nga nyikela hi ku tirhisa tindlela leti landzelaka:

MINYIKELO LEYI NGA RIKI NA SWIPIMELO

U nga nyikela hi ku tirhisa Internet, khadi ra le bangi, khadi ra xikweleti leri u ri kumaka ebangi kumbe hi selfoni. Emarhavini man’wana swa koteka ku nyikela hi ku tirhisa jw.org kumbe website yin’wana.
U nga nyikela hi mali, swin’wetsin’wetsi kumbe nhundzu yin’wana ya nkoka. Katsa ni papila leri kombisaka leswaku mali kumbe nhundzu ya kona i minyikelo leyi nga riki na swipimelo.

MINYIKELO LEYI NGA NI SWIPIMELO

U nga nyikela hi mali leyi yi nga ha tlhelaka yi vuyisiwa eka wena loko u yi lava.
Loko u nyikela hi ndlela leyi, katsa ni papila leri hlamuselaka swipimelo swa minyikelo ya kona.

TINDLELA TIN’WANA TO NYIKELA

Handle ka ku nyikela hi mali ni swilo swin’wana swa nkoka, laha hansi ku xaxametiwe tindlela tin’wana leti u nga ha nyikelaka ha tona leswaku u seketela ntirho wo chumayela emisaveni hinkwayo. Loko u nga si nyikela, hi kombela leswaku u rhanga u fonela rhavi leri langutelaka tiko ra ka n’wina leswaku u ta tiva ndlela yo nyikela leyi tirhaka laha u tshamaka kona. Swilaveko swa le nawini ni milawu ya swibalo swa hambana hi ku ya hi tindhawu, hikwalaho vutisa un’wana loyi a nga ni vutivi hi swa nawu u nga si nyikela.

Ndzindzakhombo: Minyikelo yi nga endliwa hi ku tsala vandla leri tirhisiwaka hi Timbhoni ta Yehovha tanihi leri nga ta kuma mali ya ndzindzakhombo wa vutomi loko munhu a fa kumbe mali leyi munhu a yi kumaka loko a huma penceni.

Tiakhawunti Ta Bangi: Ku nga ha tsarisiwa vandla leri tirhisiwaka hi Timbhoni ta Yehovha loko sweswo swi fambisana ni swilaveko swa tibangi ta tiko ra ka n’wina, mali leyi lombisiweke hi ntswalo (certificates of deposit), kumbe akhawunti leyi munhu a yi pfulaka loko a kuma mali leyi a nyikiweke yona loko a huma penceni. A nga tlhela a hlamusela leswaku vandla rin’wana ra le nawini leri tirhisiwaka hi Timbhoni ta Yehovha ri ta kuma mali ya kona loko yena a fa.

Tixere Ni Mali Leyi Lombisiweke Hi Ntswalo (Bonds): Munhu a nga nyikela hi tixere ni mali leyi lombisiweke hi ntswalo eka vandla leri tirhisiwaka hi Timbhoni ta Yehovha. A nga ha tlhela a tsala papila leri vulaka leswaku mali ya kona yi ta tekiwa loko a fa.

Tindlu: Loko munhu a ri ni yindlu leyi nga ha xavisiwaka, a nga ha yi nyikela eka vandla ra le nawini leri tirhisiwaka hi Timbhoni ta Yehovha. Loko a tshama eka yona, a nga ha hlela leswaku a ya emahlweni a tshama kona ku fikela loko a fa.

Ku Nyikela Hi Mali Leyi Vekisiweke: Munhu a nga nyikela hi mali leyi a yi vekiseke eka vandla ra le nawini leri tirhisiwaka hi Timbhoni ta Yehovha, a tlhela a hlela ku kuma mali yo karhi lembe ni lembe loko a ha hanya. A nga ha kuma phepha ra xibalo leri kombisaka mali ya lembe leyi kokiweke loko a nyikela.

Mapapila Ya Ndzhaka Ni Vulawuri Bya Timali (Wills and Trusts): Munhu a nga ha hlela leswaku mali ya yena kumbe nhundzu ku nyikeriwa ha swona loko a file. A nga endla leswi hi ku landza endlelo ra nawu ro tsala papila leri kombisaka leswaku u lava leswaku vandla ra le nawini leri tirhisiwaka hi Timbhoni ta Yehovha ri ta kuma nhundzu kumbe mali ya yena. Lunghiselelo leri ri nga endla leswaku ku nga vi na xibalo.

Tindlela leti kombisiweke laha henhla to nyikela ti kombisa leswaku munhu u fanele a hlela kahle leswaku a kota ku nyikela. U nga kuma rungula leri engetelekeke malunghana ni ku nyikela eka ntirho wa misava hinkwayo wa Timbhoni ta Yehovha eka broxara leyi nge, Charitable Planning to Benefit Kingdom Service Worldwide, leyi kumekaka hi Xinghezi ni hi Xipaniya ntsena. Broxara leyi yi ni tindlela to hambanahambana ta ndlela leyi munhu a nga nyikelaka ha yona. Swi nga endleka leswaku rungula rin’wana leri nga eka broxara leyi ri nga tirhi eka wena hikwalaho ka ku hambana ka milawu ya swibalo kumbe milawu yin’wana ya le tikweni ra ka n’wina. Vanhu vo tala va hoxe xandla leswaku va seketela ntirho wa hina lowu endliwaka emisaveni hinkwayo ni ku va va nga hakeli xibalo hi ku va va nyikela hi yin’wana ya tindlela leti. Loko broxara leyi yi kumeka laha u tshamaka kona, u nga kombela kopi ya yona eka matsalana wa vandlha ra n’wina.

Leswaku u kuma rungula leri engetelekeke, tlika linki leyi nge, “Seketela Ntirho Wa Hina Wa Misava Hinkwayo Hi Ku Nyikela” ehansi ka tlukankulu ra jw.org/ts kumbe u fonela rhavi ra Timbhoni ta Yehovha ra laha u tshamaka kona.