“Waswivo, Ndzi Endla Swilo Hinkwaswo Swi Va Leswintshwa”

Xana wa swi navela leswaku wena ni ndyangu wa wena mi va ni rihanyo lerinene ni ku hanya vutomi byo leha? Xana wa swi navela ku hanya emisaveni leyi xitlhavi, ku xaniseka ni rifu swi nga ta va swi ri swilo swa nkarhi lowu hundzeke? Misava yo tano a hi norho. Misava leyintshwa yo lulama yi ta va ya xiviri ku nga ri khale, hikuva i xikongomelo xa Yehovha Xikwembu. Xiya ndlela leyi xikongomelo xexo xi nga ta hetiseka ha yona hilaha xi hlamuseriweke hakona eka Nhlavutelo 21:3-5.—Hlaya.

“[Xikwembu] xi ta sula mihloti hinkwayo ematihlweni ya vona.” (Nhlavutelo 21:4) I mihloti ya njhani leyi xi nga ta yi sula? A hi mihloti ya ntsako kumbe leyi sirhelelaka mahlo ya hina. Xitshembiso xa Xikwembu xi kombetela eka mihloti leyi vangiweke hi ku xaniseka ni maxangu. Xikwembu a xi nge yi omisi kunene mihloti yo tano; xi ta yi sula hi ku helela hikuva xi susa hinkwaswo leswi vangaka mihloti—ku nga ku xaniseka ni maxangu.

“Rifu a ri nge he vi kona.” (Nhlavutelo 21:4) I yini lexi vangeke mihloti yo tala leyi nga lavekiki loko ku nga ri nala, ku nga rifu? Yehovha u ta ntshunxa vanhu lava yingisaka eka vuhlonga bya rifu. Njhani? Hi ku susa lexi vangaka rifu: xidyoho lexi hi xi kumeke eka Adamu. (Varhoma 5:12) Yehovha u ta endla leswaku vanhu lava yingisaka va va lava hetisekeke hi ku tirhisa gandzelo ra nkutsulo ra Yesu.a Kutani nala wo hetelela, ku nga rifu, u ta “herisiwa.” (1 Vakorinto 15:26) Vanhu vo tshembeka va ta swi kota ku hanya hilaha ku nga heriki va ri ni rihanyo leri hetisekeke tanihi leswi a ku ri xikongomelo xa Xikwembu.

‘Hambi ku ri xitlhavi a xi nge he vi kona.’ (Nhlavutelo 21:4) I xitlhavi xa njhani lexi nga ta va xi nga ha ri kona? Xitlhavi xa le miehleketweni, emintlhavekweni ni le nyameni lexi veke kona hikwalaho ka vuyelo bya xidyoho ni ku nga hetiseki loku vangeke vutomi bya vanhu va timiliyoni ta ntsandza-vahlayi byi nga tsakisi a xi nge he vi kona.

Vutomi lebyi nga riki na swirilo, rifu ni switlhavi byi ta va bya xiviri ku nga ri khale. U nga ha vutisa u ku: ‘Byi ta va byi ri kwihi? Xana Xikwembu xi tshembisa leswaku byi ta va byi ri etilweni?’ Doo! Kambisisa leswaku ha yini swi nga ri tano. Xo sungula, xitshembiso xexo xi sungula hi marito lama nge “ntsonga wa Xikwembu wu le vanhwini” naswona vanhu va tshama emisaveni. (Nhlavutelo 21:3) Xa vumbirhi, xitshembiso lexi xi hlamusela misava leyi eka yona ‘rifu ri nga ta va ri nga ha ri kona’—misava leyi rifu ri tshameke ri va eka yona kambe ri nga ta susiwa. A ku si tshama ku va ni rifu etilweni, kambe i khale ri ri kona laha misaveni. Swi le rivaleni leswaku xitshembiso xa Xikwembu xa leswaku vanhu va ta hanya vutomi lebyinene xi ta hetiseka laha misaveni.

Yehovha u lava leswaku hi tshemba xitshembiso xakwe xa misava leyintshwa yo lulama. Endzhaku ko va a hlamusele mikateko leyi taka, u tiyisekise xitshembiso xakwe hi ku vula leswi: “Waswivo, ndzi endla swilo hinkwaswo swi va leswintshwa.” Nakambe u te: “Marito lawa ma tshembekile, i ya ntiyiso.” (Nhlavutelo 21:5) Ha yini u nga dyondzi leswi engetelekeke malunghana ni ndlela leyi wena ni varhandziwa va wena mi nga vaka van’wana va vagandzeri lava tsakeke lava nga ta vona loko switshembiso leswi hlamarisaka swa Xikwembu swi va swa xiviri?