TINHLAMULO TA SWIVUTISO SWA BIBELE

Xana Yesu u ta endla yini enkarhini lowu taka?

Hi lembe ra 33 C.E, Yesu u file, a pfuxiwa eku feni ivi a tlhandlukela etilweni. Endzhaku ka sweswo, u nyikiwe vulawuri byo fuma tanihi Hosi. (Daniyele 7:13, 14) Leswi Yesu a nga Hosi, enkarhini lowu taka u ta endla leswaku misava hinkwayo yi va ni ku rhula a tlhela a herisa vusweti.—Hlaya Pisalema 72:7, 8, 13.

Leswi Yesu a nga Mufumi wa vanhu, u ta endla swilo leswi hlamarisaka. U ta tirhisa matimba lawa Tata wakwe a n’wi nyikeke wona leswaku a endla vanhu va va lava hetisekeke. Va ta tsakela vutomi emisaveni, va nga ha dyuhali naswona va nga ha fi.—Hlaya Yohane 5:26-29; 1 Vakorinto 15:25, 26.

Xana Yesu u endla yini sweswi?

Sweswi Yesu u kongomisa ntirho wo dyondzisa Bibele lowu endliwaka hi valandzeri vakwe emisaveni hinkwayo. Va endzela vanhu va va byela leswi Bibele yi swi vulaka hi Mfumo wa Xikwembu. Yesu u vule leswaku u ta hambeta a seketela ntirho wa vadyondzisiwa vakwe ku fikela loko Mfumo wa Xikwembu wu herisa mimfumo ya vanhu.—Hlaya Matewu 24:14; 28:19, 20.

Hi ku tirhisa vandlha ra Vukreste bya ntiyiso, Yesu u kongomisa vanhu endleleni leyinene ya vutomi. U ta hambeta a va kongomisa loko ku herisiwa xiyimo lexi xa sweswi ku ya fikela emisaveni leyintshwa leyi Xikwembu xi yi tshembiseke.—Hlaya 2 Petro 3:7, 13; Nhlavutelo 7:17.