TINHLAMULO TA SWIVUTISO SWA BIBELE

Xana yi ta va kona hulumendhe yin’we leyi nga ta fuma misava hinkwayo?

Anakanya hi ndlela leyi hulumendhe ya misava hinkwayo yi nga va vuyerisaka ha yona vanhu. Namuntlha vanhu vo tala va xaniseka hileswi va nga swisiwana, kasi van’wana i swigwili. Kambe hulumendhe ya misava hinkwayo leyi twisisaka swilaveko swa vanhu, yi ta tiyiseka leswaku munhu un’wana ni un’wana u kuma leswi a swi lavaka. Xana u vona onge vanhu va ta swi kota ku tisa hulumendhe yo tano?—Hlaya Yeremiya 10:23.

Ematin’wini hinkwawo ya vanhu, tihulumendhe ti tsandzeke hi tindlela to tala ku khathalela lava ti va fumaka, ngopfungopfu swisiwana. Vafumi van’wana va ni tihanyi. (Eklesiasta 4:1; 8:9) Kambe Xikwembu xa Matimba Hinkwawo xi tshembisa ku simeka hulumendhe leyi nga ta siva tihulumendhe hinkwato. Mufumi wa yona u ta va khathalela swinene vanhu.—Hlaya Esaya 11:4; Daniyele 2:44.

I yini leswi Mfumo wa Xikwembu wu nga ta swi endla?

Yehovha Xikwembu u hlawule Mufumi wa misava hinkwayo la fanelekaka, ku nga N’wana wakwe Yesu. (Luka 1:31-33) Loko Yesu a ha ri laha misaveni, a a swi tsakela ku pfuna vanhu. Tanihi Hosi, u ta hlanganisa vanhu va matiko hinkwawo ni ku ntshunxa vanhu eku xanisekeni hinkwako.—Hlaya Pisalema 72:8, 12-14.

Xana vanhu va ta n’wi amukela Yesu tanihi Mufumi? E-e, kambe Yehovha u lehisa mbilu. (2 Petro 3:9) U nyika vanhu nkarhi wo amukela Yesu tanihi Mufumi. Ku nga ri khale, Yesu u ta herisa vanhu vo biha ivi a tisa ku rhula ni nsirhelelo emisaveni hinkwayo.—Hlaya Mikiya 4:3, 4.