“Khulela Nenge Wa Wena Ndlela” Leswaku U Endla Nhluvuko

LOKO vanhu va Xikwembu va suka eBabilona hi 537 B.C.E., Yehovha u nghenelerile eka riendzo ra vona ro ya eYerusalema. U va byele leswi: “Basisani ndlela ya vanhu. Fumbani, fumbani gondzo lerikulu. Ri suseni maribye.” (Esa. 62:10) Anakanya ndlela leyi Vayuda van’wana va nga ha vaka va swi endle ha yona sweswo. Lava a va rhange emahlweni va nga ha va va lulamise gondzo, kumbexana va pfala magoji ni ku lunghisa tindhawu leti a ti nga fambeki. Sweswo swi fanele swi pfune vamakwavo lava va landzeleke loko va tlhelela ka rikwavo.

Hi nga ha teka sweswo tanihi xifaniso xa ndlela leyi nga ta endla leswaku hi fikelela tipakani ta hina ta moya. Yehovha u lava leswaku malandza yakwe hinkwawo ma famba egondzweni rolero ma nga kavanyetiwi hi swilo leswi nga lavekiki. Rito Rakwe ra hi tsundzuxa: “Khulela nenge wa wena ndlela, naswona onge tindlela ta wena hinkwato ti nga simekiwa ti tiya.” (Swiv. 4:26) Ku nga khathariseki leswaku u muntshwa kumbe se u kurile, u nga vona vutlhari bya xitsundzuxo xolexo xa Xikwembu.

LULAMISA NDLELA HI KU ENDLA SWIHOBO LESWINENE

U nga ha va u tshame u twa vanhu va vula swo fana ni leswi hi n’wana wa kondlo-a-ndzi-dyi: ‘Swilo swi tikomba swi ta n’wi fambela kahle evuton’wini.’ Hi ntolovelo vantshwa va ni rihanyo lerinene, va anakanya hi ku hatlisa naswona va navela leswaku swilo swi va fambela kahle evuton’wini. Bibele yi tiyisile loko yi ku: “Ku saseka ka majaha i matimba ya wona.” (Swiv. 20:29) Muntshwa la tirhisaka vuswikoti ni matimba ya yena ku tirhela Yehovha a nga fikelela tipakani ta moya a tlhela a kuma ntsako wa xiviri.

Nilokoswiritano, u nga swi xiya leswaku vuswikoti bya vantshwa byi tekiwa byi ri bya nkoka ngopfu emisaveni. Loko muntshwa la nga Mbhoni a tirha kahle exikolweni, mutsundzuxi, mudyondzisi kumbe mudyondzi-kulobye a nga ha n’wi hlohlotela ku kuma dyondzo leyi tlakukeke leswaku swilo swi ta n’wi fambela kahle eka mafambiselo lawa ya swilo. Kumbe muntshwa la nga n’wamatsambu a nga kuma leswaku u hlohloteriwa ku nghenela ntirho wo tihanyisa wa swa mintlango. Xana u tshame u tikuma u ri exiyin’weni xo tano, kumbe u tiva un’wana loyi a langutanaka ni ntshikilelo wo tano? I yini lexi nga pfunaka Mukreste leswaku a endla swiboho swa vutlhari?

Tidyondzo ta le Bibeleni ti nga pfuna munhu ku tilulamisela ku famba endleleni leyinene evuton’wini. Eklesiasta 12:1 yi ri: “Sweswi tsundzuka Mutumbuluxi wa wena Lonkulu emasikwini ya vujaha bya wena.” Xana wena kumbe muntshwa un’wana mi nga n’wi ‘tsundzuka njhani Mutumbuluxi wa n’wina Lonkulu’ hi ndlela leyinene?

Anakanya hi leswi humeleleke Erica wa le Afrika Vupela-dyambu. A a rhandza ku tlanga bolo ya milenge. Loko a ri ni malembe ya 15, u hlawuriwe ku tlanga eka xipano xa tiko. Sweswo a swi vula leswaku ku nga ri khale a a ta langutela ku leteriwa eka swa mintlangu hi ndlela ya xiyimo xa le henhla eYuropa, kumbexana a a ta va mutlangi wa bolo ya milenge la dumeke. Kambe xana xitsundzuxo xa ku “tsundzuka Mutumbuluxi wa wena Lonkulu” a a ta xi tirhisa njhani? Naswona wena kumbe munghana wa wena la ha riki muntshwa mi nga dyondza yini emhakeni ya yena?

Loko Eric a ha ri exikolweni, u sungule ku dyondza Bibele ni Timbhoni ta Yehovha. Hikwalaho u sungule ku dyondza leswaku Mutumbuluxi wakwe u ta swi herisela makumu swiphiqo swa vanhu. Eric u swi xiyile leswaku i swa nkoka ku tirhisa nkarhi ni matimba yakwe leswaku a endla ku rhandza ka Xikwembu. Hikwalaho ka xiboho xolexo xa vutlhari, Eric a nga hlawulanga ku va mutlangi la nga ni ndhuma. Ku ri na sweswo, u khuvuriwile naswona u tikarhatele ku endla nhluvuko hi tlhelo ra moya. Hi ku famba ka nkarhi, u ve nandza wa vutirheli naswona endzhaku ka sweswo u rhambiwile eXikolweni xa Bibele xa Vamakwerhu lava nga Tekangiki.

Loko a a ve mutlangi la nga ni ndhuma, a a ta va a dumile naswona a ri ni mali yo tala. Kambe u vone ntiyiso wa nawu lowu kongomisaka wa le Bibeleni lowu nge: “Swilo swa nkoka swa la fuweke i muti wakwe lowu tiyeke, naswona swi fana ni rirhangu leri sirhelelaka loko a anakanya.” (Swiv. 18:11) Nsirhelelo lowu munhu a nga ha vonakaka a ri na wona loko a ri ni rifuwo a hi wa xiviri. Ku tlula kwalaho, lava lwelaka ku fuwa hi ntolovelo ‘va titlhava hinkwako-nkwako hi switlhavi swo tala.’—1 Tim. 6:9, 10.

Lexi tsakisaka, vantshwa vo tala va kume ntsako ni nsirhelelo hi ku nghenela ntirho wa nkarhi hinkwawo. Eric u ri: “Ndzi joyine ‘ntlawa’ lowukulu wa vatirheli va nkarhi hinkwawo va Yehovha. Wolowo i ntlawa lowunene lowu ndzi nga vaka eka wona, naswona ndzi nkhensa Yehovha hi leswi a ndzi kombeke ndlela yin’we ntsena leyi endlaka leswaku munhu a kuma ntsako wa xiviri naswona swilo swi n’wi fambela kahle evuton’wini.”

Ku vuriwa yini hi wena? Ematshan’weni yo tivekela tipakani ta misava leyi, ha yini u nga simeki “tindlela ta wena” ti tiya eka Yehovha hi ku teka vuphayona?—Vona bokisi leri nge “Ku Kuma Dyondzo Leyi Nga Kumekiki eYunivhesiti.”

KU SUSA SWIHINGA ENDLELENI YA WENA

Loko mpatswa wun’wana wu endzele erhavini ra le United States, wu xiye ndlela leyi swirho swa ndyangu wa Bethele leswi tirhelaka Yehovha kwalaho a swi tsake ha yona. Endzhakunyana makwerhu yoloye wa xisati u tsale a ku: “Se a hi yi toloverile ndlela leyi a hi endla swilo ha yona.” Mpatswa lowu wu endle xiboho xo wu tirhisa hi ndlela leyinene nkarhi ni matimba ya wona entirhweni wa Yehovha.

Kambe, mindzulamiso leyi mpatswa lowu a wu lava ku yi endla a yi vonaka yi nga ta koteka. Kambe siku rin’wana wu anakanye hi Ndzimana ya siku rolero. A ku ri Yohane 8:31, laha hi hlayaka marito ya Yesu lama nge: “Loko mi tshama eritweni ra mina, hakunene mi vadyondzisiwa va mina.” Hikwalaho wu te: “Xin’wana ni xin’wana lexi hi xi endlaka leswaku hi olovisa vutomi xi ta hi vuyerisa.” Wu xavise yindlu ya wona leyikulu, wu tshika ni swilo swin’wana leswi a swi nga ri swa nkoka kutani wu rhurhela evandlheni leri a ri lava mpfuno. Sweswi wa phayona naswona wu tlhela wu pfuneta ku aka Tiholo ta Mfumo ni ku pfuneta emintsombanweni ya muganga. Wu titwa njhani? “Hi hlamarisiwa hi ndlela leyi hi tsakeke ha yona hileswi hi hanyaka vutomi byo olova, hi endla leswi nhlengeletano ya Yehovha yi hi khutazaka ku swi endla.”

U NGA SUKI ENDLELENI YO ENDLA NHLUVUKO HI TLHELO RA MOYA

Solomoni u tsale a ku: “Loko ku ri mahlo ya wena, ma fanele ma languta emahlweni hi ku kongoma, ina, mahlo ya wena lama vangamaka ma fanele ma honolela emahlweni ka wena hi ku kongoma.” (Swiv. 4:25) Ku fana ni muchayeri la langutaka laha a yaka kona, hi fanele hi papalata swilo leswi nga hi sivelaka ku tivekela tipakani ta moya ni ku ti fikelela.

Hi tihi tipakani ta moya leti u nga tivekelaka tona u tlhela u ti fikelela? Ku nghenela ntirho wa nkarhi hinkwawo i pakani leyinene. Yin’wana ku nga va ku tirha ni vandlha ra le kusuhi leri nga ni xilaveko xa vahuweleri lava nga ni ntokoto leswaku va ri pfuna ku hlanganisa nsimu ya rona leyikulu. Kumbe u nga ha ya evandlheni leri nga ni vahuweleri vo tala, kambe ri kayivelaka vakulu ni malandza ya vutirheli. Xana u nga pfuneta hi yin’wana ya tindlela toleto? Ha yini u nga burisani ni mulanguteri wa xifundzha, ku vona loko swi nga koteka leswaku u pfuna? Loko u tsakela ku tirhela ekule ni le kaya, u nga kombela rungula leri engetelekeke malunghana ni mavandlha ya le kule lama lavaka mpfuno.b

A hi tlheleleni eka xiendlakalo lexi hlamuseriweke eka Esaya 62:10. Swi nga ha endleka leswaku Vayuda van’wana va tirhe hi matimba va lulamisa ni ku basisa gondzo leri yaka eka rikwavo leswaku vanhu va Xikwembu va kota ku fika ekaya. Loko u tikarhatela ku fikelela tipakani ta wena entirhweni wo kwetsima, u nga heli matimba. Xikwembu xi nga ku pfuna leswaku u fikelela tipakani toleto. Yana emahlweni u kombela vutlhari eka Yehovha loko u ri karhi u ringeta ku susa swihinga emahlweni ka wena. Hi ku famba ka nkarhi, u ta vona ndlela leyi a nga ku pfunaka ha yona ku “khulela nenge wa wena ndlela.”—Swiv. 4:26.