TINHLAMULO TA SWIVUTISO SWA BIBELE

I yini lexi endlaka leswaku vanhu vo tala va anakanya leswaku ku ni Muvumbi?

Emalembeni ya kwalomu ka 3 000 lama hundzeke, mutlhokovetseri un’wana u tsale a ku: “Ndzi endliwe hi ndlela yo hlamarisa, leyi chavisekaka.” (Pisalema 139:14) Loko u anakanya hi ndlela leyi n’wana a vumbekaka ha yona ku sukela eka sele yin’we, xana a swi ku hlamarisi? Vanhu vo tala va dzunisa Muvumbi hikwalaho ka ndlela leyi swilo leswi hanyaka swi tumbuluxiweke ha yona.—Hlaya Pisalema 139:13-17; Vaheveru 3:4.

Loyi a tumbuluxeke vuako hinkwabyo ku katsa ni misava leyi ku hanyiwaka eka yona, hi yena a endleke leswaku ku va ni vutomi. (Pisalema 36:9) U vulavurisane ni vanhu a tlhela a hi byela hi vumunhu bya yena.—Hlaya Esaya 45:18.

Xana hi huma eka swiharhi?

Miri ya hina yi fana ni ya swiharhi hi tindlela to tala. Kambe sweswo swi endliwa hi ku va swiharhi ni vanhu va endliwe hi Muvumbi leswaku va hanya emisaveni. U endle munhu wo sungula, ku nga ri hi xiharhi kambe hi ntshuri.—Hlaya Genesa 1:24; 2:7.

Vanhu va hambanile ni swiharhi hi tindlela timbirhi ta nkoka. Yo sungula, vanhu va kota ku tiva, ku rhandza ni ku xixima Muvumbi. Ya vumbirhi, ku hambana ni vanhu, swiharhi a swi tumbuluxeriwanga ku hanya hilaha ku nga heriki. Kambe sweswi, vanhu hinkwavo va fa hi leswi wanuna wo sungula a nga yingisangiki Muvumbi.—Hlaya Genesa 1:27; 2:15-17.