TINHLAMULO TA SWIVUTISO SWA BIBELE

Xana vutomi byi ta tshama byi ri hi ndlela leyi?

Xana u tshame u tivutisa loko vutomi byi ri ni swo tala ku tlula ku tlanga, ku tirha, ku teka kumbe ku tekiwa, ku kurisa vana ni ku dyuhala? (Yobo 14:1, 2) Bibele yi vula leswaku hambi ku ri vanhu vo tlhariha va tivutisa hi mhaka leyi.—Hlaya Eklesiasta 2:11.

Xana vutomi byi ni xikongomelo? Xo sungula, hi fanele hi tivutisa leswaku vutomi byi ve kona njhani? Endzhaku ko xiya ndlela yo hlamarisa leyi byongo ni miri wa hina swi endliweke ha yona, vo tala va hetelele hi ku vula leswaku Muvumbi loyi a nga ni vutlhari hi yena a hi vumbeke. (Hlaya Pisalema 139:14.) Hikwalaho u hi vumbe hi xikongomelo. Ku dyondzo hi xikongomelo xexo swi nga endla leswaku vutomi bya hina byi va ni xikongomelo.

Xana vanhu va vumbiwe hi xikongomelo xihi?

Xikwembu xi katekise vatekani vo sungula xi tlhela xi va nyika ntirho lowu tsakisaka. Xikongomelo xa xona a ku ri leswaku va hanya hilaha ku nga heriki, va tata misava ni ku yi endla paradeyisi.—Hlaya Genesa 1:28, 31.

Xikongomelo xa Xikwembu xi kavanyetiwile loko vanhu va xandzukela vulawuri bya xona. Kambe Xikwembu a xi hi tshikanga naswona a xi xi cincanga xikongomelo xa xona hi hina ni misava. Bibele ya hi tiyisekisa leswaku Xikwembu xi le ku tirheni leswaku xi ponisa vanhu vo tshembeka ni leswaku xikongomelo xa xona hi misava xi ta hetiseka. Kutani Xikwembu xi lava leswaku u tsakela vutomi hi ndlela leyi a xi lava ha yona. (Hlaya Pisalema 37:29.) Dyondza eBibeleni leswaku u nga pfuneka njhani hi xikongomelo xa Xikwembu.

Leswaku u kuma rungula leri engetelekeke, hlaya ndzima 3 eka buku leyi nge Xana Bibele Yi Dyondzisa Yini Hakunene?, leyi kandziyisiweke hi Timbhoni ta Yehovha

Ya kumeka ni le ka www.jw.org/ts