Xivutiso 1: Xana Vutomi Bya Mina Byi Ni Xikongomelo?

ROSALIND loyi a kuleleke eNghilandhi a a swi navela swinene ku kuma vutivi. Nakambe a a lava ku pfuna vanhu. Endzhaku ka loko a thwase exikolweni, u kume ntirho wa xiyimo xa le henhla lowu a wu katsa ku pfuna vanhu lava pfumalaka makaya naswona u pfune lava nga ni swiphiqo swa ku dyondza. Hambileswi a a ri ni ntirho lowu enerisaka ni leswi a a hanya bya ka byandlana, u ri: “Ku ringana malembe yo tala a ndzi tivutisa leswaku, ‘Ha yini hi ri laha?’ naswona ‘Hi xihi xikongomelo xa vutomi?’”

Ha yini u vutisa?

Vanhu a va fani ni swiharhi leswi nga anakanyiki. Hi ni vuswikoti byo dyondza swilo swa nkarhi lowu nga hundza, byo kunguhata vumundzuku ni ku va ni xikongomelo evuton’wini bya hina.

Xana van’wana va ri yini?

Vanhu vo tala va anakanya leswaku xikongomelo xo sungula xa vutomi i ku kuma rifuwo kumbe ndhuma leswaku va ta va ni ntsako.

Xana nhlamulo yoleyo yi kombisa langutelo rihi?

Yi kombisa leswaku hi tivekela tipakani ta hina evuton’wini. Ku navela ka hina i ka nkoka ku tlula ku rhandza ka Xikwembu.

Xana Bibele yi dyondzisa yini?

Hosi Solomoni u hlengelete rifuwo ro tala a tlhela a titsakisa kambe u kume leswaku swilo sweswo a swi n’wi endlanga a va ni xikongomelo xa xiviri. U hlamusele leswi n’wi tiseleke xikongomelo xa xiviri evuton’wini hi ku tsala a ku: “Loko hinkwaswo swi twiwile, makumu ya mhaka hi lawa: Chava Xikwembu xa ntiyiso u hlayisa swileriso swa xona. Hikuva leyi hi yona mfanelo hinkwayo ya munhu.” (Eklesiasta 12:13) Xana ku hlayisa swileriso swa Xikwembu swi katsa yini?

Xin’wana xa xikongomelo xa Xikwembu ha hina hileswaku hi tiphina hi vutomi. Solomoni u tsale a ku: “Malunghana ni munhu a ku na nchumu xo antswa ku tlula leswaku a dya ni ku nwa, a endla leswaku moya-xiviri wakwe wu vona leswinene hikwalaho ka ku tikarhata kakwe. Leswi na swona ndzi swi vonile, leswaku swi huma evokweni ra Xikwembu xa ntiyiso.”—Eklesiasta 2:24.

Nakambe Xikwembu xi lava leswaku hi rhandza mindyangu ya hina ni ku yi khathalela. Xiya nkongomiso wo olova ni lowu twisisekaka lowu nyikiweke xirho ha xin’we xa ndyangu.

• “Vavanuna va fanele ku rhandza vasati va vona ku fana ni mimiri ya vona.”—Vaefesa 5:28.

• “Wansati u fanele ku va ni xichavo xo enta eka nuna wakwe.”—Vaefesa 5:33.

• “Vana, yingisani vatswari va n’wina.”—Vaefesa 6:1.

Loko hi tirhisa milawu yoleyo ya Bibele, hi ta kuma ntsako ni ku eneriseka. Hambiswiritano, nchumu wa nkoka lowu hi nga wu endlaka i ku dyondza hinkwaswo leswi hi nga swi kotaka hi Muvumbi wa hina ni ku tshinela ekusuhi na yena tanihi Munghana wa hina. Entiyisweni, Bibele yi hi rhamba leswaku hi ‘tshinela eka Xikwembu.’ Kutani yi tlhela yi vula xitshembiso lexi, lexi xiyekaka: “Xi ta tshinela eka n’wina.” (Yakobo 4:8) Loko u amukela xirhambo lexi, vutomi bya wena byi ta va ni xikongomelo xa xiviri.

Rosalind, loyi a tshahiweke eku sunguleni, sweswi wa swi xiya leswaku u kume xikongomelo evuton’wini. U nga hlaya leswi a swi vuleke leswi endleke leswaku a cinca langutelo rakwe exihlokweni lexi nge “Bibele Yi Hundzula Vutomi Bya Vanhu”.