Hi Xihi Xikongomelo Xa Vutomi?

Nhlamulo ya Bibele

Xivutiso lexi nga laha henhla xi nga ha vutisiwa hi tindlela to tala, to tanihi leyi nge, “Ha yini hi ri laha”? kumbe “Xana vutomi bya mina byi ni xikongomelo”? Bibele yi kombisa leswaku xikongomelo xa hina xa vutomi i ku va ni vuxaka lebyinene na Xikwembu. Xiya tin’wana ta tidyondzo ta xisekelo leti Bibele yi ti paluxaka.

• Xikwembu i Muvumbi wa hina. Bibele yi ri: ‘Hi xona lexi hi endleke, a hi tiendlanga.’—Pisalema 100:3; Nhlavutelo 4:11.

• Xikwembu xi ni xikongomelo eka hinkwaswo leswi xi swi tumbuluxeke, ku katsa na hina.​—Esaya 45:18.

• Xikwembu xi hi vumbe hi ri ni ‘xilaveko xa moya’ lexi katsaka ku navela ku tiva xikongomelo xa vutomi. (Matewu 5:3) Xi lava leswaku hi enerisa ku navela koloko.​—Pisalema 145:16.

• Hi enerisa xilaveko xa hina xa moya hi ku va ni vuxaka lebyinene ni Xikwembu. Hambileswi eka van’wana swi nga ha vonakaka swi tika ku va munghana wa Xikwembu, Bibele ya hi khutaza: “Tshinelani eka Xikwembu, kutani xi ta tshinela eka n’wina.”—Yakobo 4:8; 2:23.

• Leswaku hi va vanghana va Xikwembu, hi fanele hi hanya hi ku pfumelelana ni xikongomelo xa xona. Bibele yi vule xikongomelo lexi eka Eklesiasta 12:13: “Chava Xikwembu xa ntiyiso u hlayisa swileriso swa xona. Hikuva leyi hi yona mfanelo hinkwayo ya munhu.”

• Enkarhini lowu taka, hi ta vona ku hetiseka ka xikongomelo xa Xikwembu loko xi herisa ku xaniseka ni ku nyika vanghana va xona lava xi gandzelaka vutomi lebyi nga heriki.—Pisalema 37:10, 11.