TINHLAMULO TA SWIVUTISO SWA BIBELE

Xana vubihi byi huma kwihi?

Hi ntolovelo vanhu va rhandza ku rhula, ku tshembeka ni musa. Loko swi ri tano, ha yini ku tele madzolonga, ku kala vululami ni tihanyi? Mahungu yo chavisa ma tolovelekile. Xana ku ni loyi a endlaka leswaku vanhu va endla swilo swo biha?—Hlaya 1 Yohane 5:19.

Xana Xikwembu xi endle vanhu va ri ni vubihi? Doo! Yehovha Xikwembu u vumbe vanhu hi xifaniso xakwe, va ri ni ku navela ku tekelela rirhandzu ra yena. (Genesa 1:27; Yobo 34:10) Kambe Xikwembu xi nyike vanhu lunghelo ra ku tihlawulela. Vatswari va hina vo sungula Adamu na Evha a va yingisanga naswona a va landzelanga nkongomiso wa Xikwembu kutani va ve lava nga hetisekangiki. A hi hetisekanga hikwalaho ka leswi hi kumeke xidyoho eka vona.—Hlaya Deteronoma 32:4, 5. 

Xana hi ta tshamela ku endla swilo swo biha?

Xikwembu xi lava leswaku hi hlula vubihi. (Swivuriso 27:11) Xi hi dyondzisa ndlela ya ku balekela ku endla swilo swo biha kutani hi kuma ntsako wa xiviri. Sweswi a hi nge swi koti ku tekelela rirhandzu ra Xikwembu hi ku helela.—Hlaya Pisalema 32:8.

Hambileswi sweswi vubihi byi ya ka byi nyanya, Xikwembu xi byi pfumelela swa nkarhinyana leswaku vanhu hinkwavo va vona vuyelo bya kona byo biha. (2 Petro 3:7-9) Hambiswiritano, ku nga ri khale misava yi ta tala hi vanhu lava tsakeke ni lava yingisaka Xikwembu.—Hlaya Pisalema 37:9-11.