TINHLAMULO TA SWIVUTISO SWA BIBELE

Xana misava leyi nga riki na vusweti yi ta va kona?

Vanhu va timiliyoni lava hanyaka evuswetini va fa lembe ni lembe hikwalaho ka vuvabyi ni ku kayivela ka swakudya. Hambileswi matiko man’wana swi ma fambelaka kahle, ka ha ri ni vanhu vo tala lava hanyaka evuswetini lebyikulu. Bibele yi kombisa leswaku vusweti i xiphiqo lexi karhateke vanhu ku sukela khale.—Hlaya Yohane 12:8.

Swi nga ha lava mfumo wa misava hinkwayo ku leswaku vusweti byi hela. Mfumo wolowo wu fanele wu kota ku ava rifuwo leri nga kona hi ndlela leyinene wu tlhela wu herisa ni tinyimpi, hikuva hi tona xivangelo lexikulu xa vusweti. Xikwembu xi hi tshembisa mfumo wo tano.—Hlaya Daniyele 2:44.

I mani loyi a nga ta herisa vusweti?

Xikwembu xi veke N’wana wa xona Yesu leswaku a fuma misava hinkwayo. (Pisalema 2:4-8) Yesu u ta kutsula swisiwana a tlhela a herisa ku tshikileriwa ni madzolonga.—Hlaya Pisalema 72:8, 12-14.

Tanihi laha swi profetiweke hakona, Yesu “Hosana ya Ku Rhula,” u ta tisa ku rhula ni nsirhelelo emisaveni. Kutani vanhu hinkwavo va ta va ni makaya, va tsakela ntirho lowu enerisaka ni swakudya swo tala.—Hlaya Esaya 9:6, 7; 65:21-23.