I Yini Leswi Bibele Yi Swi Vulaka?

Diyavulosi i mani?

XANA A WU TA VULA leswaku Diyavulosi i . . .

• Munhu wa moya?

• Vubihi lebyi nga embilwini ya munhu?

• Nchumu lowu vanhu va wu anakanyaka ntsena?

LESWI BIBELE YI SWI VULAKA

Diyavulosi u vulavule na Yesu a tlhela a n’wi ‘ringa.’ (Matewu 4:1-4) Hikwalaho Diyavulosi a hi nchumu lowu anakanyiwaka kumbe xikombiso xa vuhomboloki byo karhi. I munhu wa moya wo homboloka.

HI SWIHI SWIN’WANA LESWI HI NGA SWI DYONDZAKA EBIBELENI?

• Eku sunguleni Diyavulosi a a ri ntsumi yo kwetsima, kambe “a nga yimanga a tiyile entiyisweni.” (Yohane 8:44) U ve muhembi naswona u xandzukele Xikwembu.

• Tintsumi tin’wana ti xandzukile ti landzela Sathana.—Nhlavutelo 12:9.

• Diyavulosi u pfala vanhu vo tala mahlo leswaku va nga swi voni leswaku i wa xiviri.​—2 Vakorinto 4:4.

Xana Diyavulosi a nga swi kota ku lawula vanhu?

VANHU VAN’WANA VA VULA leswaku a swi koteki ku lawuriwa hi Diyavulosi, loko hi hala tlhelo van’wana va chava ku ngheniwa hi mimoya leyo biha. Wena u anakanya yini?

LESWI BIBELE YI SWI VULAKA

“Misava hinkwayo yi le hansi ka matimba ya lowo homboloka.” (1 Yohane 5:19) Diyavulosi u ni nkucetelo lowukulu eka vanhu, kambe a nga lawuli vanhu hinkwavo.

HI SWIHI SWIN’WANA LESWI HI NGA SWI DYONDZAKA EBIBELENI?

• Diyavulosi u tirhisa vuxisi leswaku a kanganyisa vanhu hilaha a nga kotaka hakona.​—2 Vakorinto 11:14.

• Minkarhi yin’wana mimoya leyo biha yi nga va lawula vanhu.​—Matewu 12:22.

• Hi ku pfuniwa hi Xikwembu u nga swi kota ku “kaneta Diyavulosi.”​—Yakobo 4:7.