TINHLAMULO TA SWIVUTISO SWA BIBELE

Xana Diyavulosi u huma kwihi?

Xikwembu a xi tumbuluxanga Diyavulosi. Ematshan’weni ya sweswo, Xikwembu xi tumbuluxe ntsumi leyi eku heteleleni yi veke Diyavulosi, loyi nakambe a tiviwaka tanihi Sathana. Yesu u vule leswaku Diyavulosi u tshame a vulavula ntiyiso naswona a nga ri na nandzu. Kutani eku sunguleni, Diyavulosi a ri ntsumi leyi tshembekeke leyi a yi ri n’wana wa Xikwembu.—Hlaya Yohane 8:44.

Xana swi tise ku yini leswaku ntsumi leyi, leyinene yi va ntsumi yo biha?

Ntsumi leyi veke Diyavulosi yi hlawule ku kaneta Xikwembu kutani yi hlohlotela mpatswa wo sungula wa vanhu leswaku wu yi joyina. Xisweswo, yi hundzuke Sathana, leswi vulaka “Mukaneti.”—Hlaya Genesa 3:1-5; Nhlavutelo 12:9.

Ku fana ni swivumbiwa swin’wana swa Xikwembu leswi tlhariheke, ntsumi leyi veke Diyavulosi a yi ri ni ntshunxeko wa ku hlawula exikarhi ko endla leswinene ni leswo biha, kambe yi sungule ku navela ku gandzeriwa. Yi navele ku vangamisiwa ku tlula ku va yi tsakisa Xikwembu.—Hlaya Matewu 4:8, 9; Yakobo 1:13, 14.

Xana Diyavulosi u hambete a kucetela vanhu hi ndlela yihi? Xana u fanele u n’wi chava? U nga kuma tinhlamulo ta swivutiso leswi eBibeleni.