Swivutiso Swa Vahlayi . . .

Xana Xikwembu Hi Xona Lexi Vumbeke Diyavulosi?

▪ Leswi Bibele yi vulaka leswaku Xikwembu xi “tumbuluxe swilo hinkwaswo,” van’wana va gimete hileswaku hi xona lexi vumbeke Diyavulosi. (Vaefesa 3:9; Nhlavutelo 4:11) Bibele yi swi veka erivaleni leswaku a hi xona xi n’wi vumbeke.

Yehovha u vumbe ntsumi leyi hundzukeke Diyavulosi. Xisweswo, vukona bya mukaneti lonkulu wa Xikwembu byi fanele byi kambisisiwa hi ku ya hileswi Matsalwa ma swi vulaka hi Yehovha la nga Muvumbi. Ku vuriwa leswi hi Yehovha: “Ntirho wakwe wu hetisekile, hikuva tindlela takwe hinkwato i vululami. Xikwembu xa vutshembeki, lexi nga riki na vuhomboloki; xi ni vululami naswona xi hava xisandzu.” (Deteronoma 32:3-5) Hi ku ya hi marito lawa, hi nga gimeta hileswaku enkarhini lowu hundzeke Sathana a a hetisekile, a a lulamile naswona a a ri un’wana wa vana va Xikwembu lava nga tintsumi. Eka Yohane 8:44, Yesu u vule leswaku Diyavulosi “a nga yimanga a tiyile entiyisweni,” a kombisa leswaku eku sunguleni Sathana a a vulavula ntiyiso naswona a nga ri na nandzu.

Hambiswiritano, ku fana ni swivumbiwa leswin’wana hinkwaswo leswi tlhariheke swa Yehovha, ntsumi leyi veke Sathana a yi ri ni ntshunxeko wo tihlawulela exikarhi ka leswinene ni leswo biha. Hi ku hlawula ndlela leyi lwisanaka ni Xikwembu yi tlhela yi hlohlotela mpatswa wo sungula leswaku wu yi joyina, yi tiendle Sathana, leswi vulaka “Mukaneti.”—Genesa 3:1-5.

Xivumbiwa xexo xa moya xo homboloka xi tlhele xi tiendla Diyavulosi, leswi vulaka “Mulumbeti.” Sathana hi yena loyi a a vulavula hi ku tirhisa nyoka leswaku a kanganyisa Evha leswaku a nga n’wi yingisi Muvumbi loyi nawu wakwe a wu ri erivaleni. Hi yona mhaka leyi Yesu a vuleke leswaku Sathana i “tata wa mavunwa.”—Yohane 8:44.

Kambe swi tise ku yini leswaku xivumbiwa xa moya lexi hetisekeke—lexi a xi nga ri na ku tsana kumbe swilo leswi nga xi kucetelaka ku endla swilo swo biha—xi va ni mboyamelo wo biha? Swi le rivaleni leswaku a xi navela vugandzeri lebyi a byi ri bya Xikwembu ntsena ni leswaku vanhu va fumiwa hi xona ku nga ri Yehovha. Ematshan’weni yo bakanya mianakanyo yoleyo, xivumbiwa lexi xa moya xi yi tshike yi akela eka xona kukondza xi endla leswi a xi swi navela. Leswi xi swi endleke swi hlamuseriwa ebukwini ya Yakobo leyi nge: “Un’wana ni un’wana u ringiwa hi ku kokiwa ni ku wongiwa hi ku navela ka yena n’wini. Kutani ku navela, loko ku xurhe, ku veleka xidyoho.”—Yakobo 1:14, 15; 1 Timotiya 3:6.

Hi xikombiso: Anakanya hi munhu la tirhaka hi timali loyi a pfulekeriwaka hi nkarhi wo endla vuxisi leswaku a ta yiva mali ya khampani. Loko a swi lava a nga bakanya miehleketo yoleyo hi ku hatlisa. Kambe loko a yi tshika yi akela eka yena a nga ha yiva. Loko a endla tano u ta va a tiendle khamba. Loko a hemba hi vukhamba lebyi a byi endleke, u ta hundzuka muhembi. Hilaha ku fanaka, hi ku navela swilo swo biha ni ku anakanyisisa ha swona, ntsumi leyi Xikwembu xi yi vumbeke yi tirhise ntshunxeko lowu a yi ri na wona leswaku yi kanganyisa ni ku xandzukela Tata wa yona, xisweswo yi tiendla Sathana Diyavulosi.

Lexi tsakisaka hileswaku Sathana Diyavulosi u ta lovisiwa hi nkarhi lowu faneleke wa Xikwembu. (Varhoma 16:20) Enkarhini wa sweswi, vagandzeri va Yehovha Xikwembu va lemukisiwa hi marhengu ya Sathana va tlhela va byeriwa ndlela leyi va nga tisirhelelaka ha yona eka wona. (2 Vakorinto 2:11; Vaefesa 6:11) Kutani endlani hinkwaswo leswi nga ematimbeni ya n’wina leswaku mi “kaneta Diyavulosi, kutani u ta mi balekela.”—Yakobo 4:7.

[Marito lama tshahiweke exihlokweni lama nga eka tluka 21]

Hi ku hlawula ndlela leyi lwisanaka ni Xikwembu, ntsumi leyi hetisekeke yi tiendle Sathana