Xana Xikwembu Xi Vumbe Diyavulosi Leswaku A Hi Ringa?

Nhlamulo ya Bibele

Bibele yi vula leswaku Xikwembu a xi vumbanga Diyavulosi. Ematshan’weni ya sweswo, xi vumbe ntsumi leyi veke Diyavulosi. Malunghana ni Xikwembu, Bibele yi ri: “Ntirho wakwe wu hetisekile, hikuva tindlela takwe hinkwato i vululami. Xikwembu xa vutshembeki, lexi nga riki na vuhomboloki; xi ni vululami naswona xi hava xisandzu.” (Deteronoma 32:3-5) Hi ku ya hi marito lawa, hi nga gimeta hileswaku Sathana Diyavulosi u tshame a va yin’wana ya tintsumi ta Xikwembu leyi hetisekeke yo lulama.

Eka Yohane 8:44, Yesu u vule leswaku Diyavulosi “a nga yimanga a tiyile entiyisweni,” leswi vulaka leswaku Sathana u tshame a va xivumbiwa xo tshembeka lexi nga riki na nandzu.

Hambiswiritano, ku fana ni swivumbiwa leswin’wana hinkwaswo swo tlhariha swa Yehovha, ntsumi leyi veke Sathana a yi ri ni ntshunxeko wo tihlawulela ku endla leswinene kumbe leswo biha. Leswi yi hlawuleke ku lwisana ni Xikwembu ni ku kucetela mpatswa wo sungula leswaku wu yi joyina, yi tiendle Sathana, leswi vulaka “Mukaneti.”—Genesa 3:1-5; Nhlavutelo 12:9.