“A Ku Ri Nyiko Leyinene Ngopfu Leyi Ndzi Nga Tshama Ndzi Nyikiwa Yona”

Leyi i ndlela leyi xinhwanyatana lexi nga ni malembe ya 13 xi titweke ha yona endzhaku ko nyikiwa mbyana tanihi nyiko. Wansati un’wana loyi a nga n’wamabindzu loyi a humeleleke u vule leswaku khomphyuta leyi tata wakwe a n’wi nyikeke yona loko a ha ri exikolweni, ku ve nyiko leyi cinceke vutomi byakwe. Wanuna loyi a ha ku nghenelaka vukati u vula leswaku khadi leri endliweke hi nsati wakwe ra ku tsundzuka siku ra mucato wa vona, a ku ri nyiko leyinene ngopfu leyi a nga tshama a nyikiwa yona.

Lembe ni lembe, vanhu vo tala va heta nkarhi va ri karhi va endla matshalatshala leswaku va kuma nyiko “leyinene” leswaku va nyika munghana kumbe xaka eka xiendlakalo xa nkoka. Vanhu vo tala va tsakela ku vona vanhu lava va va nyikaka tinyiko va tsakile, ku fana ni lava hi buleke ha vona eku sunguleni. Xana u nga swi tsakela ku nyika kumbe ku amukela tinyiko letinene?

Sweswo swi nga tsakisa hakunene ku nga ri ntsena eka loyi a amukelaka nyiko kambe ni le ka munyiki wa yona. Bibele yi ri: “Ku nyika swi tisa ntsako lowukulu ku tlula ku amukela.” (Mintirho 20:35) Hakunene swa hi tsakisa loko hi vona leswaku nyiko leyi hi yi nyikeke van’wana va yi teka yi ri ya nkoka.

Kutani hi nga swi endlisa ku yini leswaku tinyiko leti hi ti nyikaka van’wana ti hi tsakisa swin’we ni lava hi va nyikaka? Hi nga endla yini leswaku tinyiko ta hina ti va leti tsakisaka