Xana A Wu Swi Tiva?

I Mukhuva Wihi Wa Vayuda Lowu Endleke Leswaku Yesu A Sola Swihlambanyo?

ENAWINI wa Muxe ku hlambanya a ku ri nchumu wa nkoka swinene. Hambiswiritano enkarhini wa Yesu ku hlambanya a ku hundzuke mukhuva lerova vanhu a va hlambanya eka nchumu wun’wana ni wun’wana lowu va wu vulaka. Mukhuva lowu wo biha a ku vuriwa leswaku wu endleriwe ku tiyisa leswi munhu a swi vulaka. Nilokoswiritano Yesu u wu sorile mukhuva wolowo. U dyondzise a ku: “Ina wa n’wina a a ve Ina, E-e wa n’wina a va E-e.”—Mat. 5:33-37; 23:16-22.

Theological Dictionary of the New Testament yi vula leswaku “mhaka ya leswaku Vayuda a va tolovele ku tiyisa nchumu wun’wana ni wun’wana lowu a va wu vula hi xihlambanyo ya vonaka eka Talmud, ku nga buku ya vayuda leyi kombisaka swihlambanyo leswi a swi ri swa nkoka ni leswi a swi nga vuli nchumu.

A hi Yesu ntsena loyi a lwisana ni ku tirhisiwa loku ko biha ka swihlambanyo. Hi xikombiso, n’wamatimu wa Muyuda la vuriwaka Flavius Josephus u vule leswi hi Vayuda va le nkarhini wakwe: “Va fanele va tshika ku hlambanya hikuva xihlambanyo a xi vuli nchumu eka vona, ku va va hlambanya eka nchumu wun’wana ni wun’wana swi vula leswaku va pfumela leswaku munhu a nge tshembiwi handle ko hlambanya.” Buku ya matsalwa ya Vayuda leyi vitaniwaka Wisdom of Sirach kumbe Ecclesiasticus (23:11) na yona yi ri: “Munhu la rhandzaka ku hlambanya u tlula nawu.” Hikwalaho Yesu u sole mukhuva wa ku nga swi xiximi swihlambanyo. Loko hi vulavula ntiyiso mikarhi hinkwayo a swi kali swi lava leswaku hi hlambanya leswaku vanhu va hi tshemba.