Leti Humaka Eka Vahlayi

Vantshwa Va Vutisa . . . Xana Ku Rhuketela Swi Bihe Kwihi? (March 2008) Ndzi kurisiwe endyangwini wa Vakreste, kambe ndzi ngheniwe hi mukhuva wo rhuketela. Ndzi ringetile hi tindlela hinkwato ku tshika kambe ndzi tsandzeka. Hambiswiritano, xihloko lexi xi ndzi pfunile leswaku ndzi kota ku tikhoma. Hilaha swi boxiweke hakona exihlokweni lexi, a ndzi swi lavi ku tirhisa nyiko yo vulavula hi ndlela yo biha. Hikwalaho sweswi ndzi anakanyisisa hi vukheta ndzi nga si vulavula. Ndza nkhensa swinene.

C. P., Brazil

Ndzi na 12 wa malembe. Exikolweni ndzi tshamela ku twa vanhu va ri karhi va rhuketela naswona ndza chava leswaku siku rin’wana ndzi nga tikuma ndzi vule rito ra nhlambha. A ndzi ri kusuhi ni ku tsala ndzi kombela leswaku ku tsariwa xihloko lexi vulavulaka hi mhaka leyi eka “Vantshwa Va Vutisa,” hiloko ku humesiwa xihloko lexi eka Xalamuka! Xihloko lexi xi ndzi tsundzuxe leswaku ha yini ku rhuketela swi bihile naswona xi ndzi khutazile leswaku ndzi nga rhuketeli. Tshamani mi ri karhi mi tsala swihloko swo fana ni lexi!

A. P., United States

Mina ni nuna wa mina hi tirha ntirho wo basisa tiyindlu, kutani n’wini wa yindlu yin’wana leyi hi yi basisaka u hi byele “swilo leswi a tiyimiseleke ku swi endla hi lembe lerintshwa,” ku nga ku tshika ku rhuketela. U vule leswaku u khongela masiku hinkwawo a kombela Xikwembu leswaku xi n’wi pfuna a tshika mukhuva wolowo wo biha. U tlhele a kombela leswaku ndzi n’wi nyika buku yihi na yihi leyi a ndzi ri na yona leyi vulavulaka hi mhaka leyi. Ndzi khongele hi mhaka leyi naswona hilaha a ndzi tolovele ku endla hakona, ndzi kope rungula ra timagazini ta sweswinyana eka Web site ya www.jw.org ndzi ri hoxa eka MP3 ya mina. Ndzi tsake ngopfu loko ndzi yingisela swihloko leswi nga eka timagazini toleto hi siku leri landzelaka. Hambileswi xihloko xolexo a xi tsaleriwe vantshwa, a ndzi swi tiva leswaku n’wini wa yindlu yoleyo hi yi basisaka u ta kuma switsundzuxo leswinene, leswi nga ta n’wi pfuna. A ndzi swi langutele hi mahlo-ngati ku bula na yena.

S. C., United States

Vukongomisi Bya Swihaha-mpfhuka—Xana Byi Tirha Njhani Leswaku U Famba U Hlayisekile? (April 2008) Loko ndzi heta ku hlaya xihloko xexo ndzi te: “Xi sirhelelekile naswona xi lunghekele ku haha!” Ndzi khutazekile naswona ndzi titwe ndzi hlayisekile hikuva Xalamuka! yi ndzi kombe leswaku vakongomisi va swihaha-mpfhuka va khathala swinene hi vuhlayiseki bya hina. Ndza nkhensa.

T. S., Brazil

U Nga Hlamula Njhani? Ndzi na 12 wa malembe naswona ndzi tshama edzongeni wa Ireland. Ndzi rhandza ku mi nkhensa malunghana ni swivutiso swo hlawuleka swa vana leswi kumekaka emakumu ka Xalamuka! I swivutiso swa kahle. Swi endla leswaku vana va katseka eku hlayeni ka magazini. Ndzi kombela mi hambeta mi swi nghenisa. Ndzi ba mandla ndzi vuyelela.

A. C., Ireland