Vra Bokisi Ra Swivutiso

● Xana swi pfumelelekile ku tshama ensin’wini ya bandlha rin’wana kambe u khoma minhlangano kun’wana?

Sosayiti yi kume mapapila yo hlayanyana mayelana ni xivutiso lexi nga laha henhla. Hikwalaho hi kunguhata ku phindha marungula man’wana lama a ma humesiwe eka Our Kingdom Service ya April 1976.

Hi ku komisa, hi khutaza vahuweleri ku hlanganyela eka minhlangano ya bandlha leri khomaka nsimu leyi va tshamaka eka yona. Hi xitalo, leswi swi tikomba swi pfuna swinene eka ndyangu, tanihi leswi hakanyingi swi endlaka swi olova ku va kona eminhlanganweni, ku hlanganyela entirhweni wa nsimu ensin’wini leyi nga kusuhi ni ku tirhisa mpfuno lowu nyikeriwaka hi vakulu.

Ku nga ha va ni swivangelo leswinene leswi endlaka leswaku muhuweleri kumbe ndyangu wu nga swi koti ku fambisana ni ndzayo leyi nga laha henhla. Nhloko yin’wana ni yin’wana ya ndyangu yi byarha vutihlamuleri ekaya ra yona n’wini. A swi ta va swinene ha yona ku bula timhaka ni vakulu ku kuma mpfuno wa xitsundzuxo xa vona a nga si boha kungu. Endzhaku ko xiya timhaka hinkwato leti katsekaka, u ta fanela ku hlawula leswi antswaka. A ku na xivangelo xo xopa-xopa kungu ra yena loko ri endliwile.

Emadorobeni, hakanyingi ku na nhlayo leyikulu ya mabandlha lama akiweke endhawini ya le kusuhi. Ku nga ha va ni swivangelo swo tala leswi endlaka vakulu va kunguhata leswaku timhaka ta ntirho a a ti ta yisiwa emahlweni hi ku cinca vahuweleri. Hi xikombiso, swi nga ha va swi fanerile ku tiyisa bandlha leri nga ni vahuweleri vantsongo. Vakulu eka bandlha rin’wana ni rin’wana va nga kombisa leswi swi tikombaka swi pfuna kutani va kombela leswaku ndyangu wun’wana ni un’wana lowu khumbekaka wu swi xiya. Leswi fanaka swi ta va tano hi vakulu, malandza ya vutirheli kumbe maphayona lama komberiwaka loko va ta swi kota ku ya kun’wana va ya pfuna bandlha leri lavaka mpfuno. Nkarhi wun’wana mulanguteri wa xifundza a nga ha xiya leswaku bandlha rin’wana ri na vakulu vo tala kasi bandlha leri nge kusuhi ri na vakulu va nga ri vangani kutani ri lava mpfuno. Mulanguteri wa xifundza a nga tivisa xilaveko ebandlheni leri ku nga na vakulu vo tala. Loko va swi xiyile swilaveko swa vona vini, va nga ha kunguhata leswaku nkulu wun’we kumbe vambirhi, kun’we ni mindyangu ya vona, va ya pfuna bandlha ro tano. (Vona Kingdom Ministry, April 1973.) Hi ku landzela switsundzuxo leswi nga laha henhla hi laha swi kotekaka ha kona, “hinkwaswo [swi ta endliwa] hi mukhuva lowo saseka, hi nawu wa kona.”—1 Vakor. 14:40.