Chivirika Eku Hangalaseni Ka Rungula Ra Mfumo
1 Yehova i Xikwembu xa mintirho leyinene, naswona wa chivirika leswaku a yi hetisisa. Xin’wana ni xin’wana lexi a xi endlaka i xa ku pfuna lava va n’wi tirhelaka. Yesu u veke xikombiso lexinene eku tekeleleni ka ku chivirika ka Tata wa yena. Eka khamba rin’wana, ku chivirikela yindlu ya Yehova swi n’wi susumetele ku humesa etempeleni lava a va yi hundzula yindlu ya mabindzu. (Yoh. 2:14-17) Na hina hi fanele hi kombisa ku chivirika eku tirheleni ka hina Yehova Xikwembu loko hi lava ku funghiwa tanihi vanhu lava “chivirikelaka ku endla leswinene.”—Tito 2:14.
2 Mintirho leyinene ya Vakriste yi pfuna van’wana. Nchumu lowu pfunaka swinene lowu hi nga wu endlelaka munhu un’wana i ku n’wi pfuna ku tiva ni ku tirhela Yehova. (Yoh. 17:3) Hi fikelela mpfuno wo tano hi ntirho wa hina wa ku chivirika wa ku chumayela hi ta Mfumo ni wa ku endla vadyondzisiwa.
3 Ku chivirika i yini ke? Ku chivirika i ku hiseka. Ku chivirika ka Vakriste ku vangiwa hi ku navela lokukulu ka ku endla leswi lulameke ni leswi faneleke. Rito ra Xigriki ra “ku chivirika” ri vula “ku vila.” Tanihi vatirheli va Xikwembu, hi fanele ku kombisa mfanelo leyi loko hi hangalasa rungula ra Mfumo. Xana ha chivirika evutirhelini ke? Xana hi endla hinkwaswo leswi hi nga swi kotaka leswaku hi pfuna van’wana ku dyondza hi ta swikongomelo swa Yehova?
KOMBISA KU CHIVIRIKA HI KU NYIKELA TIBROXARA
4 Hi n’hweti ya August, hi ta tlhela hi va ni lunghelo ro nyikela yin’wana ni yin’wana ya tibroxara ta matluka ya 32 handle ka leyi yi nge School and Jehovah’s Witnesses. Hi nga nyikela Tsakela Vutomi eMisaveni hi Masiku!, “Vonani, Ndzi Endla Swilo Hinkwaswo Swi Va Leswintshwa”!, Xana U Fanele Ku Pfumela Eka Vunharhu-un’we?, Vito Ra Xikwembu Leri Nga Ta Tshama Hi Masiku, kumbe Hulumendhe Leyi Nga Ta Tisa Paradeyisi. Tilulamiseli ku nyikela broxara yin’wana ni yin’wana leyi vonakaka yi ri leyi fanelaka swinene ensin’wini kun’we ni le ka munhu loyi u hlanganaka na yena emutini.
5 Leswaku hi chivirika eku chumayeleni ka rungula ra Mfumo, hi fanele ku va lava tiyimiseleke swinene. Xana hi tolovelanile ni Mhaka Yo Vulavurisana ya sweswinyana? Xana hi nga yi hlanganisa njhani Mhaka Yo Vulavurisana ni broxara leyi hi yi nyikelaka? I tinhla tihi leti kongomeke leti nga eka tibroxara leti hi nga ti boxaka? Loko hi teka nkarhi leswaku hi tolovelana ni tibroxara leti ta ntlhanu ivi hi aka ku ti hisekela emianakanyweni ya hina vini, hi ta hlomisiwa leswaku hi ti nyikela hi ku chivirika eka lava va nga ensin’wini ya hina.
SWIRINGANYETO SWO NYIKELA TIBROXARA
6 Endzhaku ko titivisa, u nga ha ku: “Xana u tshama u tivutisa loko Xikwembu xi khumbeka hi vuhomboloki lebyi nga emisaveni namuntlha? [Pfumelela nhlamulo.] Bibele yi hlamusela leswaku ku nga ri khale vanhu lavo homboloka va ta herisiwa. [Hlaya Psalma 92:7.] Leswi leswi swi nga tano, xana hi nga hundzulukela eka mani leswaku hi kuma vukongomisi ni nsirhelelo wa ntiyiso? [Hlaya Psalma 145:20.] Kutani matshalatshala ma ri woxe ya hina ya ku ponisiwa i ku va ni vuxaka ni Muvumbi wa hina, Yehova Xikwembu. Hi fanele ku xiya mikateko leyi a yi tshembisaka vanhu hinkwavo lava yingisaka.” Kutani u nga pfula xifaniso 49 eka broxara leyi nge Vutomi eMisaveni ivi u hlaya marito ya nhlamuselo, u kandziyisa mikateko leyi kombisiweke. Kumbe pfula tluka 29 eka broxara leyi nge Hulumendhe, ivi u hlamusela mikateko leyi hlamuseriweke kwalaho. Van’wana va nga ha navela ku tirhisa tindzimana 49 na 50 eka broxara leyi nge “Vonani” ku hlamusela leswi Mfumo wa Xikwembu wu nga ta swi endlela vanhu.
7 Leswi leyi ku nga minkarhi leyo nonon’hwa, rungula leri hi nga na rona i ra xihatla. Ku ni xilaveko xa leswaku hi chivirika eku hangalaseni ka rungula ra Mfumo, hi khutaza van’wana leswaku va tolovelana na Xikwembu ni Rito ra xona. Hi ku hangalasa vutivi lebyi byi nyikaka vutomi hi ku chivirika, hi nyikela vumbhoni bya ku chava ka hina Xikwembu ni rirhandzu ra hina eka Yehova. Tivutise: ‘Xana ndza yi chivirikela mintirho leyinene? Xana nseketelo wa mina wa ntirho wo chumayela wu nga hlamuseriwa tanihi wa ku hiseka ni wa moya-xiviri hinkwawo (whole-souled)?’ Tinhlamulo ta hina ti ta hi byela swo tala ehenhleni ka ntikelo wa ku chivirika ka hina. Loko hi hlanganyela swinene eku hangalaseni ka rungula ra Mfumo, ku chivirika ka hina ku ta kula. Van’wana va ta swi vona leswaku hakunene hi vanhu lava chivirikelaka mintirho leyinene.