Bokisi Ra Swivutiso

● Ha yini swi ri swa nkoka ku heta ku hlaya tibuku timbirhi hi ku helela ni vadyondzisiwa lavantshwa hambi loko va khuvuriwa buku ya vumbirhi yi nga si hetiwa?

Yehova u katekisa nhlengeletano ya yena hi ntshungu wa lavantshwa lava nghenaka emabandlheni. Ha tsaka hi ku vona ku hlangana loku kukulu. Hambi swi ri tano, hi twisisa leswaku vanhu lava va fanaka ni tinyimpfu va lava mpfuno lowu yaka emahlweni ni nkongomiso leswaku va dyondza ku tirhela Yehova.

Lavantshwa va lava mpfuno leswaku va fikelela vutivi lebyi kongomeke bya ntiyiso. (Vakol. 1:9, 10) Hi na lunghelo ro va pfuna ku kuma ku twisisa lokunene ka tidyondzo ta xisekelo ta Bibele ni ku twisisa kahle leswi Bibele yi swi dyondzisaka malunghana ni mimpimanyeto ya mahanyelo, vutomi bya Vukriste ni timhaka leti yelanaka na tona. Leswi swi ta va pfuna ku yima va tiyile entiyisweni leswaku va hlula miringo yihi na yihi leyi nga vaka kona.

Swichudeni nakambe swi fanele ku kula hi xitalo ematimbeni ya swona ya ku twisisa. (1 Vakor. 14:20) Ntokoto wu kombise leswaku ku fikelela xiyimo xa wanuna loyi a kuleke hi xitalo emoyeni, dyondzo ya Bibele ya munhu hi xiyexe ni mudyondzisi swa pfuna. Xisweswo, hambi loko munhu o khuvuriwa a nga si heta dyondzo ya yena ya tibuku timbirhi, vutlhari byi kombisa leswaku dyondzo ya yena ya le kaya ya Bibele yi fanele ku ya emahlweni ku kondza a heta dyondzo ya tibuku ha timbirhi.

ENDZHAKU KA NKHUVULO

Yesu u te hi fanele ku endla vadyondzisiwa—hi va khuvula ni ku va dyondzisa. (Mat. 28:19, 20) Swo tala swa swiletelo swa vadyondzisiwa swi endliwa endzhaku ka nkhuvulo. Vutivi lebyi munhu a nga byi kumaka eka buku yin’we ntsena hi ntolovelo a byi anelanga ku hlanganisa ndzetelo wa yena wa moya. Ndzetelo lowu engetelekeke wa laveka leswaku a fanelekela ntirho wa vutirheli ni ku n’wi hlomisela ku papalata mintshikilelo leyi taka ehenhla ka lava va tirhelaka Yehova emasikwini lawa ya makumu. Ku tsandzeka ku nyikela ndzetelo lowu ringaneke swi nga siya xichudeni xi nga tiyanga hi tlhelo ra moya lerova xi nga tiyimela hi xoxe. Endzhaku ka loko munhu lontshwa a khuvuriwile, hi ya emahlweni hi n’wi pfuna ku endla nhluvuko lowu engetelekeke hambi a hetile ku hlaya tibuku timbirhi kumbe a nga hetanga. Buku yo sungula leyi dyondziweke yi nyikela ku twisisa ka swisekelo. Buku ya vumbirhi yi hlanganisa timfanelo ta Vukriste. Tibuku leti ku nga ha va buku leyi nge Hanya Hi Masiku kutani ku va buku leyi nge United in Worship kumbe buku leyi nge Ku Rhula Ka Ntiyiso. Loko tibuku leti ti nga ri kona, tin’wana leti nga ni rungula leri fanaka ti nga tirhisiwa. Ku yisa dyondzo ya Bibele emahlweni ku kondza buku ya vumbirhi yi hetiwa swi nyikela dyondzo leyi twalaka eka swikongomelo swa Yehova kun’we ni mimpimanyeto ya yena leyi tlakukeke ni timfanelo ta yena ta Vukriste. Leswi swi pfuna munhu lontshwa ku twisisa nhlamuselo ya misinya ya milawu ya Vukriste ni ku yima a tiyile eripfumelweni. (Vakol. 2:7) Leswaku u kuma vuxokoxoko ni rungula leri engetelekeke eku vikeni ka tidyondzo to tano, vona Bokisi Ra Swivutiso eka Vutirheli Bya Hina Bya Mfumo bya November 1987.

Kavula, endzhaku ka nkhuvulo vanhu lavantshwa va fanele ku languteriwa ku endla nhluvuko wa moya. (Vahev. 6:1-3) Hakanyingi a swi teki nkarhi wo leha ku heta buku ya vumbirhi. Xisweswo munhu lontshwa u nyikiwa xisekelo lexi tiyeke.