Ku Twarisa Mahungu Lamanene

Hi Tiholideyi

1 Hambi leswi minkhuvo yo tala leyi hlanganaka ni Khisimusi ni Lembe Lerintshwa yi humaka evuhedenini, ku tlula biliyoni ya Vakriste vo tivulela ntsena va tlangela tiholideyi leti lembe rin’wana ni rin’wana. Vanhu vo tala va pfumela hi xiviri leswaku minkhuvo leyi ya amukeleka eka Xikwembu. Hi nga fikelela timbilu ta vanhu vo tano hi mahungu lamanene hi nguva ya holideyi hi ndlela yihi?

VANA LA EHLEKETELELAKA NI XICHAVO

2 Vakulu va endla malunghiselelo yo hlawuleka ya ku veka vumbhoni hi holideyi, tanihi leswi vo tala va hina va vaka ni nkarhi wo wisa entirhweni wo tihanyisa. Nkarhi wo sungula ntirho wa yindlu na yindlu wu fanele ku lulamisiwa hi ku ehleketelela vini va miti lava va nga vaka va etlela nkarhi wo leha ku tlula lowu tolovelekeke hi masiku lawa.

3 Loko hi yisa vutirheli bya hina emahlweni, kumbexana hi ta kuma vanhu vo tala va khomeke swinene hi vaendzi ni ku lunghiselela swakudya. Hi ku xiya leswaku i nkarhi wo hlawuleka eka vona, hi xichavo hi nga endla mhaka ya hina yi koma naswona yi kongoma. Xichavo xa hina xa Vukriste xi nga pfula ndlela ya ku nyikela vumbhoni lebyi engetelekeke enkarhini lowu taka.

4 A hi hlanganyeli eka minkhuvo ya vukhongeri bya misava naswona a hi hlanganyeli eka maxewetelo ya mikhuva ya holideyi. Hikwalaho, vutlhari bya laveka emhakeni ya leswaku hi hlamula njhani eka maxewetelo yo tano. A ku na xilaveko xo endla mphikamakaneta hi maxewetelo, kambe hi minkarhi yo tala hi nga nkhensa n’wini wa muti hikwalaho ka ku hi navelela ka yena mikateko. Loko vanhu va vutisa ehenhleni ka ku pfumela ka hina, hi nga va tiyisekisa leswaku hi xixima Kriste Yesu, tanihi leswi sweswo swi lavekaka eka lava va chavaka Xikwembu. (Yoh. 5:23) Hambi swi ri tano, mikhuva yo tala ya holideyi a yi n’wi xiximi Kriste kumbe Xikwembu. Loko vanhu va tsakela rungula leri engetelekeke hi nkarhi wolowo kumbe endzhakunyana, hi nga avelana na vona mhaka leyi nga ebukwini leyi nge Reasoning eka matluka 176-8 na 180.

SWINGHENISO

5 Tanihi leswi tiholideyi ta Khisimusi ti nga ni xivumbeko xa vukhongeri, hi nga ha kuma vanhu vo tala lava va voyameleke ngopfu eku vulavuleni hi Xikwembu hi nkarhi lowu ku tlula nkarhi wihi na wihi wun’wana wa lembe. Hi nga tirhisa yinhla leyi eka xingheniso xa hina hi laha ku humelelaka. Hi xikombiso, hi nga ha ku: “Timiliyoni ta vanhu emisaveni hinkwayo ti tlangela Khisimusi ni Siku ra Lembe Lerintshwa. Xana u anakanya leswaku mintlangu leyi yi tisa vanhu ekusuhi ni Xikwembu?” Hambi n’wini wa muti u vona onge minkhuvo leyi i yinene kumbe yi bihile, endzhaku ko amukela tinhlamuselo ta yena, hi nga ku: “Vanhu vo tala va navela leswaku va va ni vuxaka byo antswa ni Xikwembu, kumbe va twa onge Xikwembu xi le kule na vona. Xana u ehleketa leswaku Xikwembu hakunene xa khathala ha hina na hi planete ya misava?” Kutani yana emahlweni ni Mhaka Yo Vulavurisana.

6 Loko hi teka ku tshinelela kun’wana, hi nga ku: “Hi nkarhi lowu wa Khisimusi, hakanyingi hi twa vanhu va kombisa ntshembo wa leswaku ku ta va ni ku rhula emisaveni ni vunene eka vanhu. Xana u anakanya leswaku Xikwembu xi ta tisa ku rhula emisaveni enkarhini wa hina?” Endzhaku ka sweswo hi nga ya emahlweni hi kombisa leswaku Yesu Kriste i ‘Hosana ya ku Rhula’ leyi vhumbiweke. (Esa. 9:6, 7) Tanihi Mufumi loyi a hlawuriweke eka hulumendhe ya Xikwembu, Kriste hi xihatla u ta teka goza ro tisa ku rhula loku nga heriki emisaveni.—Dan. 2:44; Nhlav. 21:3-5.

7 Hambi leswi vanhu vo tala va nga ri tsakeriki rungula ra Mfumo, kambe va tsakela tiholideyi ta vukhongeri bya vona bya mavunwa, handle ko kanakana Yehova u ta katekisa matshalatshala ya hina yo kuma valavi va ntiyiso, hikuva yena “ú lava vagandzeri lavo tano,” naswona u ta va kongomisa enhlengeletanweni ya yena.—Yoh. 4:23, 24.