Ku Twarisa Mahungu Lamanene

Hi Laha Ku Humelelaka Swinene Hi Ku Yingisa

1 Leswaku hi humelela evutirhelini bya hina, hi fanele hi swi xiya leswaku a va kona vanhu vambirhi lava fanaka. Un’wana ni un’wana u na mintokoto yo hambana evuton’wini kun’we ni minkhathalelo ni ku navela ko hambana ka munhu hi xiyexe. Mphikamakaneta i ku endla rungula ra Mfumo ri va ra yena ku nga ku kombisa munhu loyi hi vulavulaka na yena leswi ri vulaka swona eka yena hi yexe. Leswaku hi endla leswi hi laha ku humelelaka, nakambe hi fanele hi yingisa hi vukheta.

2 Vahuweleri vo tala hi vutlhari va tirhisa swivutiso eka swingheniso swa vona, naswona leswi swi pfuna ku katsa n’wini wa muti ebulwini. Swivutiso swa mavonelo leswi nga khomisiki n’wini wa muti tingana swa humelela swinene. Kambe loko n’wini wa muti a vulavula, i swa nkoka leswaku hi yingisa leswi a swi vulaka. Ku yingisela swi kombisa rirhandzu ni xichavo xa muakelani, naswona hi ku endla tano hi kuma ku twisisa mianakanyo ya munhu. Ku tiva swiyimo swa munhu swi hi endla hi swi kota ku va ni ntwela-vusiwana, hi tiveka eka xiyimo xa yena. Kutani hi nga avelana na yena nchavelelo ni ntshembo lowu humaka eBibeleni.

VANA LA CINCA-CINCAKA

3 Muapostola Pawulo u tsundzuxile: “Dyondzani ndlela leyinene yo vulavurisana ni munhu un’wana ni un’wana loyi mi hlanganaka na yena.” (Vakol. 4:6, New English Bible) Hambi leswi hi nga swi tiviki ka ha ri emahlweni leswi munhu a nga swi vulaka hi ku kongoma, hi tolovelanile ni swiphiqo leswi vanhu vo tala va langutanaka na swona namuntlha. Xisweswo, hi nga “dyondza” ni ku lunghiselela hi tlhelo ra miehleketo leswaku hi amukela swiyimo swo hambana-hambana.

4 Hi xikombiso, hi nga ha va hi lunghiselele ku vulavula hi mhaka ya ku rhula ka misava, kambe n’wini wa muti a boxa leswaku u lahlekeriwe hi ntirho wa yena. Xana hi fanele ku honisa nhlamuselo leyi ke? Handle ko kanakana, mhaka ya ku phamela ndyangu wa yena yi tikela mianakanyo ni mbilu ya yena. Xana u nga hlamula njhani eka swilaveko swa yena? U nga n’wi twela vusiwana, u kombisa nkhathalelo wa xiviri hi xiyimo xa yena. Kutani hi musa kongomisa nyingiso wa yena eka matsalwa lama kombisaka ndlela leyi ha yona hulumendhe ya Xikwembu yi nga ta nyikela ntirho lowu anerisaka ni swilaveko swa hina hinkwerhu.—Esaya 65:17, 21, 22, 24.

5 Kumbexana hi tiva leswaku munhu un’wana kumbe xirho xa ndyangu wa yena ku nga ri khale a xi ri muhlaseriwa wa vugevenga kumbe xi tokote ku homboloka ko karhi. Nkhathalelo wa hina wa ntwela-vusiwana ni swilaveko swa munhu hi xiyexe etimhakeni leti swi nga ha olovisa mbilu ya munhu, swi endla swi koteka ku n’wi kombisa leswaku Yehova Xikwembu u swi xiya kahle swiphiqo leswi vavaka naswona ku nga ri khale u ta teka goza ro susa vuhomboloki hinkwabyo.—Vona Reasoning From the Scriptures, matluka 10, 12, 229-31.

6 Vuxaka lebyi tsaneke exikarhi ka vanhu hakanyingi byi va kona hikwalaho ka leswi va nga vulavurisanangiki kahle. Loko un’wana a vulavula, munhu loyi un’wana a nga ha va a nga nyikeli nyingiso hi mianakanyo ni mbilu ya yena. Mikhuva yo tano leyi tsaneke ya ku yingisa yi nga vangela swidoledole kumbe ku kayivela minkarhi yo pfuna un’wana. Hi ku hlakulela mukhuva lowunene wa ku yingisa hi xichavo, hi nga twarisa mahungu lamanene hi laha ku humelelaka swinene, hi kombisa ku tsakela ka Yehova ko pfumala vutianakanyi eka van’wana, naswona hi pfuna van’wana ku kurisa vuxaka lebyinene ni Muvumbi wa hina la nga ni rirhandzu na vanhu va yena.—Yak. 1:19; g74 11/22 matl. 21-3.