Khutaza Van’wana Leswaku Va Yisa Nyingiso Eka Yesu

¹ Buku leyi nge Nghwazi Leyi Tshameke Yi Hanya yi hlawulekile. Tindzima ta yona ta 133 ti nga khutaza vahlayi leswaku va yisa nyingiso eka Yesu ni ku va susumetela ku landza xikombiso xakwe. I ntiyiso leswaku tihosi hinkwato leti nga tshama ti fuma, loko ti hlanganisiwile, a ti si tshama ti khumba vutomi bya vanhu va misava leyi hi matimba ku fana na Yesu. Lava yisaka nyingiso eka Yesu va ta vuyeriwa hakunene.

² Yesu u dyondzise vadyondzisiwa vakwe hi Tata wa yena naswona u kombise timfanelo ta risima ta Xikwembu. Timbilu ta hina ta khumbeka loko hi languta vuswikoti bya Yesu lebyi xiyekaka tanihi mudyondzisi, ku rhangela ka yena handle ko chava ni ntwela-vusiwana wakwe. Loko hi tsundzuka ku xaniseka ka yena loko a nyikela vutomi byakwe leswaku a hi kutsula, hi tala hi ku tlangela! Buku leyi nge Nghwazi Leyi Tshameke Yi Hanya yi nga pfuna vanhu leswaku va languta Yesu hi ndlela leyi.

³ Lunghiselela Khwatsi: Lungheka kahle leswaku u sungula bulo ra Bibele leri nga ta khutaza van’wana leswaku va yisa nyingiso eka Yesu. Mintlawa ya ndyangu ni van’wana va nga titoloveta swin’we. Lwela ku pfuxa ku tsakela ni ku nyika vanhu matimba ya ku hlaya buku leyi nge Nghwazi. Ku endla sweswo swi nga lava leswaku u khoma mabulo yo tala ni munhu. Loko munhu a nga swi koti ku xava buku kumbe a nga yi tsakeli, u nga ha fambisa timagazini ta sweswi kumbe u siya xiphephana. Loko ku tsakela ko sungula ku ri kutsongo, hi nga siya xiphephana kumbexana hi siya broxara kumbe magazini.

⁴ Loko hi famba hi yindlu na yindlu hi December, hi ta va hi bula hi Yesu ni ku khutaza vanhu leswaku va n’wi tiva ku antswa. Hi ku kombisa mianakanyo leyi phofuriweke ebukwini leyi nge Nghwazi, hi nga pfuna vanhu ku languta Yesu tanihi N’wana wa Xikwembu ni Hosi leyi fumaka ya hulumendhe leyi nga ta lunghisa swiphiqo hinkwaswo swa vanhu, hayi leswaku va n’wi languta tanihi munhu wa matimu ntsena.

⁵ Hi laha swi kandziyisiweke ha kona eka Vutirheli Bya Hina Bya Mfumo n’hweti leyi hundzeke, hi fanele hi ti tirhisa hi vutlharhi tibuku ta hina. Hi December, hi nkarhi lowu vanhu vo tala va anakanyaka hi Yesu, hi ta kuma minkarhi yo tala ya ku fambisa buku leyi nge Nghwazi. Nakambe hi fanele hi xalamukela ku fambisa buku leyi eka vumbhoni bya xitshuketa. Anakanya hi tindlela ta ku veka vumbhoni eka vayeni, maxaka, vatirhi-kulorhi ni vanhu lava hi hlanganaka na vona loko hi ya eku xaveni. Kunguhata ka ha ri emahlweni, u va ni tibuku leti nge Nghwazi leti ringaneke leswaku u ti fambisa entirhweni wa yindlu na yindlu ni loko u veka vumbhoni hi xitshuketa.

⁶ Munhu un’wana loyi a nga swi tsakeliki ngopfu ku hlaya, u kombise ku tlangela buku leyi nge Nghwazi, a vula leswaku yi endle leswaku a titwa a lava ku hlaya eku heleni ka siku rakwe. A hi pfuneni van’wana va titwa hi ndlela leyi, hi endla matshalatshala hinkwawo ya ku va khutaza leswaku va yisa nyingiso eka Yesu hi ku hlaya buku leyi nge Nghwazi Leyi Tshameke Yi Hanya hi ku tsakela ka ntiyiso.