Pfuna Van’wana Va Dyondza Hi Nghwazi

¹ Vunyingi lebyi hlayeke buku leyi nge Nghwazi Leyi Tshameke Yi Hanya byi tlangela swinene hi ndlela leyi yi khumbeke vutomi bya vona ha yona. Un’wana u tsarile: “Loko ndzi fika eku heleni ka buku, ndzi titwe onge ndzi vitaniwe hi Yesu leswaku ndzi va swin’we na yena, ndzi tshama na yena, ndzi xaniseka na yena, ndzi twa leswi a swi twaka, eka vutirheli byakwe hinkwabyo. . . . Ku hlaya buku leyi swi fana ni ku hlalela filimi ya vutomi bya Yesu.”

² Buku leyi nge Nghwazi yi hi pfuna ku tolovelana ku antswa na Yesu swin’we na Yehovha. (Yoh. 14:⁠9) N’wana wa malembe ya 12 hi vukhale u vule leswi malunghana ni buku leyi: “Yi ndzi chavelerile swinene lerova ndzi khongele Yehovha hi mihloti ya ntsako loko ndzi heta ku yi hlaya. Embilwini a ndzi tiyisiwile hi ku tiva leswaku Yehovha na Yesu va hi rindza.” Yesu u vule hi laha ku tsariweke ha kona eka Yohane 17:⁠3, leswaku eka hina swi vula vutomi lebyi nga heriki ku tiva Yehovha ni N’wana wakwe. Ku dyondza buku leyi malunghana ni vutomi bya Yesu swi hi nyika vutlharhi byo hlawuleka eka vumunhu bya Yehovha hikuva Yesu i ‘xikombiso xa leswi a nga swona hi xiviri.’​​—⁠⁠Hev. 1:⁠3.

³ Ku kandziyisiwe tikopi to tlula 19 wa timiliyoni ta buku leyi nge Nghwazi hi tindzimi to tlula 70. Leswi swi komba ndlela leyi buku leyi yi amukeriwaka kahle ha yona. Vo tala va hlaya buku hinkwayo loko va yi kuma. Munhu un’wana la tsakelaka u yi hlaye hinkwayo ku nga si hela mavhiki mambirhi a yi kumile. Mufundhisi loyi a amukeleke buku leyi u te: “A ndzi swi koti ku veka buku leyi ehansi. Mina ni nsati wa mina ha yi hlayanyana hi nga si ya eku etleleni.”

⁴ Ku Veka Vumbhoni Hi Xitshuketa: Makwerhu un’wana u kombe vanhu lava a tirhaka na vona buku leyi nge Nghwazi. Ku twakale mhaka ya leswaku u ni buku leyi, kutani va byelana leswi yi swi tameleke. Lava a tirhaka na vona va tsale mavito ya lava va yi lavaka. U fambise tibuku ta 461! Ntlhanu wa lava va yi kumeke va dyondza. Makwerhu un’wana wa xisati loko a famba hi xihaha-mpfhuka, u fambise buku leyi nge Nghwazi eka muprista loyi a ya laha ku vekiwaka kona muprista-nkulu lontshwa. Muprista loyi a a ri le Vatican ku ringana malembe ya 40. Hinkwerhu hi fanele hi tirhisa kahle minkarhi yo byela van’wana hi buku leyi.

⁵ Vantshwa Va Yi Rhandza: Vana va yi tsakela ngopfu buku leyi. Un’wana wa malembe ya kaye u tsarile: “Buku leyi ndzi yi rhandzaka ngopfu i Nghwazi Leyi Tshameke Yi Hanya hikuva ndzi dyondza swo tala eka yona.” Loko hi hlangana ni vana entirhweni wa nsimu, hi fanele hi tinyika nkarhi loko vatswari va vona va pfumela, hi komba vana lava buku leyi ni ku pfuxeta tinhla-nkulu tin’wana ta yona ni swifaniso. Hi nga ha kota ku fambisa tibuku eka vana lava. Loko va nyikiwa nkarhi wo tiva Yesu, vantshwa namuntlha va nga vulavula hi yena. Yesu a a ri munhu la tshinelelekaka.​​—⁠⁠Mt. 19:​14, 15.

⁶ Ku hlaya buku leyi nge Nghwazi swi nga hundzula mahanyelo ya vanhu. Ringeta ku toloveta vo tala hi laha swi kotekaka ha kona, va tolovete leswi yi swi tameleke. Tirhisa mhaka leyi nga eka tluka ro hetelela ra xingheniso xa buku, ehansi ka xihlokwana lexi nge “Pfuneka Hi Ku Dyondza Hi Ta Yena.” Mhaka leyi yi ta pfuna ku kombisa leswi va nga ta swi kuma hi ku hlaya buku leyi. Vanhu vo tala ensin’wini ya ka n’wina va nga ha vula hi laha ku vuleke un’wana loko a heta ku hlaya buku leyi: “I buku leyinene eka leti ndzi tshameke ndzi ti hlaya! Yi hundzule vutomi bya mina.”