Buku Leyintshwa Yi Nyanyula Timiliyoni

XIENDLAKALO xa Mintsombano ya “Varhandzi Va Ntshunxeko” leyi sunguleke hi June leyi hundzeke a a ku ri nkulumo leyi nge “Nghwazi Leyi Tshameke Yi Hanya.” Lexi tsakisaka a a ku ri ku humesiwa ka buku leyi nga ni vito leri fanaka. Vanhu va timiliyoni to tlula tsevu emisaveni hinkwayo ana se va ve kona eka minongonoko leyi ya mintsombano naswona va yi twile nkulumo leyi, leyi humelelaka yi cinciwe kantsongo eka swihloko swimbirhi leswi hundzeke swa magazini lowu.

Ku tlula 12 wa timiliyoni ta tikopi ta buku leyi nge Nghwazi Leyi Tshameke Yi Hanya ti kandziyisiwile hi tindzimi ta kwalomu ka 60. Yi kona na hi tindzimi ta le Yuropa Vuxa, hi Xialbania, Xicroatia, Xihungary, Ximacedonia, Xipolixi, Xirussia, Xiserbia ni Xislovenia. Ngopfu-ngopfu vanhu vo tlula 74 000 lava veke kona eka mintsombano ya nkombo eSoviet Union a va tsakile hi ku yi kuma hi ririmi ra Xirussia.

Masungulo Ya Buku

Mhaka ya buku leyi eku sunguleni yi humelele hi swiphemu eka minkandziyiso ya 149 leyi landzelelanaka ya Xihondzo xo Rindza, ku sukela eka nkandziyiso wa April 1, 1985 hi Xinghezi. Vahlayi vo tala va vule leswaku a va ri ni gome loko swiphemu swi hela eka kandziyiso wa June 1, 1991. Le Italy, Melissa wa malembe ya 12 hi vukhale, a tele mihloti ematihlweni ya yena loko a hlaya mhaka yo hetelela eka Xihondzo xo Rindza. U te: “Vusiku bya le mahlweni ka ntsombano wa hina, ndzi khongele eka Yehova ndzi kombela buku ya vutomi bya Yesu. Loko buku yi humesiwa, ndzi phokoterile ndzi ko ndzi nga ha swi koti.”

Mhaka leyi endliweke swiphemu eka Xihondzo xo Rindza yi hleriwile ivi yi hlanganisiwa yi va buku leyintshwa yo saseka ya swifaniso, ya matluka ya 448 ya tindzimana ta 133. Matshalatshala ma endliwile leswaku ku humesiwa mhaka yin’wana ni yin’wana leyi vuriweke hi Yesu ni xiendlakalo xin’wana ni xin’wana lexi rhekhodiweke evuton’wini bya yena bya le misaveni, ku katsa ni swifaniso ni mahlori ya yena hinkwawo. Hi laha swi kotekaka ha kona, hinkwaswo swi hlamuseriwa hi ndlela leyi swi humeleleke ha yona. Emakumu ka ndzima yin’wana ni yin’wana ku na nxaxamelo wa matsalwa ya Bibele lawa ndzima yi sekeriweke eka wona.

Un’wana a nga ha va a anakanya leswaku, ‘Phela, se ndzi yi hlayile buku leyi hikuva ndzi hlaye swiphemu swa yona eka Xihondzo xo Rindza.’ Kambe vahlayi va Xihondzo xo Rindza va kume mhaka ya vutomi bya Yesu hi swiphemu swintsongo leswi humesiweke eka swihloko leswi humeleleke endzhaku ka mavhiki man’wana ni man’wana mambirhi enkarhini wo tlula malembe ya tsevu. Hambi leswi swihloko a swi dyondzisa hi xivumbeko xa swiphemu, anakanya ntsako wo hlaya mhaka hinkwayo hi nkarhinyana ni ku vona xifaniso hinkwaxo xa nghwazi leyi tshameke yi hanya!

Yi Tiyisa Ripfumelo

Wansati wa le Washington, D.C., U.S.A., wa vika: “Ndzi hete ku hlaya buku hi mavhiki mambirhi, loko ndzi ri karhi ndzi hlaya, mihloti a yi xiririka emahlweni ya mina. A ndzi tshika ku hlaya ivi ndzi khongela naswona ndzi rila. Yi ndzi endle ndzi titwa onge a ndzo va na Yesu kwalaho hi xiviri, ndzi xaniseka na yena. Hambi ku ri endzhaku ka vhiki ndzi hlayile buku, mihloti a ya ha huma emahlweni ya mina loko ndzi anakanya hi leswi ndzi swi hlayeke. Naswona ndzi titwa ndzi ri kusuhi na Yehova hi ku va a nyikele N’wana wakwe.”

Wansati wa le Pittsburgh, Pennsylvania, U.S.A., u tsarile: “Ndzi hete buku leyi vulavulaka hi Yesu namuntlha, a yi tsakisa. Ndzi ve ni mihloti emahlweni ya mina loko ndzi ri karhi ndzi hlaya tindzima ti nga ri tingani to hetelela. Ku hlaya buku xikan’we a swi tsakisa. A ndzi swi koti ku hlamusela ndlela leyi ndzi titwaka ha yona ehenhleni ka yona—ntsena hi leswaku ndza yi rhandza swinene!”

Swifaniso swo saseka swa buku swi engetela nsusumeto wa mintlhaveko, hi laha muhlayi la tlangelaka a xiyaka, a ku: “Yi ndzi endla ndzi titwa onge ndza va twa va rilela n’wana la feke (ndzima 47) kumbe leswaku ha swi tiva leswi Yesu a a swi anakanya loko wansati la nga ni nkhuluko wa ngati a n’wi khumba ivi a hanyisiwa (ndzima 46). Swikombiso swa tinghohe ta vona i swa ku vaviseka ka xiviri. . . . Ematshan’wini ya leswaku ku hlaya ku va ntirho, buku leyi yi ku endla ku fana ni ku tihungasa kumbe ku tshungula eku heleni ka siku ra mina. Ndlela leyi khumbaka leyi buku yi tsariweke ha yona a yi vuli leswi Yesu a swi endleke ntsena kambe yi komba leswi a a swi anakanya ni ku swi twa.”

Ku Yi Tirhisa Ko Hambana

Vo tala va sungule ku tirhisa buku leyi eka dyondzo ya vona ya ndyangu ya Bibele. Vatswari va le Silverton, Oregon, U.S.A., va tsala: “Hi ni vana vanharhu lavantsongo, naswona buku leyi yi fanela ‘dyondzo ya hina ya ndyangu ya madyambu man’wana ni man’wana.’ Entiyisweni, swi fanela swonghasi leswaku hi dyondza hi vukheta masungulo ya Hosi ya hina leyi rhandzekaka Kriste Yesu.”

Nhwana wa kondlo-a-ndzi-dyi wa le Japani wa hlamusela: “Tata wa mina a a hi hlayela loko hi wisa endzhaku ka swakudya swa madyambu. Tanihi hi ndyangu, hi hlaya ku sukela eku sunguleni, kambe ndzi anakanye ku hlaya ndzima hi vusiku byin’we ku suka endzhaku ka buku ndzi nga si ya eku etleleni. Hambi swi ri tano, buku ya nyanyula swinene lerova hakanyingi ku va awara ya n’we ehenhla ka nhloko ni mixo ndzi nga si xiya nkarhi.”

Vo tala va hlamarisiwa hi ndlela leyi vuxokoxoko byo tala byi katsekaka ha yona etimhakeni. Mbhoni yin’wana yi tsarile: “Ndzi dyondze swilo swo tala leswi a ndzi nga swi tivi.” Papila ro huma eCalifornia, le U.S.A., ri te: “Mina ni nsati wa mina hi vile entiyisweni ku tlula malembe ya 35, naswona hi nga vula hi ku tiyiseka leswaku a hi si tshama hi va ni buku leyi nyanyulaka swonghasi tanihi leyi.”

Buku leyi yi fanele yi pfuna ku herisa vunwa bya leswaku Timbhoni ta Yehova a ti pfumeli eka Yesu. Muhlayi un’wana la tlangelaka u hlamusele hi ndlela leyi: “A ndzi nga koti ku yi veka hansi, hikuva a yi ri nkaneto lowukulu eka ku honisa ka lava vulaka leswaku vanhu va Yehova a va pfumeli kumbe ku xixima Yesu Kriste. Lexi hi faneleke ku xi endla sweswi i ku veka nhlamulo leyi ya ku honisa ka vona emavokweni ya vona.”

Hakunene buku leyi yi ta va ni xiphemu xa nkoka evutirhelini bya Timbhoni ta Yehova. Mbhoni yin’wana yi tsarile: “Ndzi nyike wansati loyi ndzi dyondzaka na yena Bibele kopi ya yona, naswona mpfuno lowu yi veke na wona eka yena wu vonaka wu ri hlori. U dyondze ku ringana lembe, naswona ndzi vile ni xiphiqo xo n’wi endla leswaku a ta eminhlanganweni.” Endzhaku ka loko xichudeni lexi xi hlaye tindzima ta 45 ta buku leyintshwa, Mbhoni yi hlamuserile, “u ndzi byela leswaku u ta va kona enhlanganweni hi Sonto hikuva a ku ri nkarhi wa yena wo teka goza.”

Swivumbeko Swa Nkoka

Kahle-kahle, Nghwazi Leyi Tshameke Yi Hanya yi nyika nhlamuselo eka Tievhangeli. Tinhlamuselo ta swilo swo tala leswi Yesu a swi vuleke ni ku swi dyondzisa swa nyikeriwa, kutani buku yi nga tirhisiwa tanihi xitirho xa ndzavisiso wa nkoka, hikuva yi namarhela swinene etimhakeni ta Bibele.

Xivumbeko lexinene ngopfu hi leswaku hinkwaswo swi hlamuseriwa hi ndzandzelano wa minkarhi. Hi ku olova loko u phendla u ri na leswi emianakanyweni yi nga tikomba yi ri mpfuno wa ntiyiso eku tiveni ka nkarhi lowu swiendlakalo swo karhi swi humeleleke ha wona evutirhelini bya Yesu. Vahlayi va Tievhangeli hakanyingi va xiya leswi vonakaka swi nga twanani. Buku leyintshwa, handle ko kokela nyingiso eka leswi, ya swi twananisa hi ku swi veka ka yona.

Tanihi Vakriste, entiyisweni a hi fanelanga hi honisa dyondzo ya vukheta ya vutomi bya Xikombiso xa hina lexi tshembekaka, Yesu Kriste. Hikwalaho, a hi ti xiyeni kahle timhaka ta Tievhangeli hi mpfuno wa buku leyintshwa leyi nge Nghwazi Leyi Tshameke Yi Hanya.