‘Ku Lumeka Ndzilo Wa Ku Lava Ku Tiva eMbilwini Ni Le Mianakanyweni’
“Ndza tsandzeka ku hlamusela ntsako lowu hambetaka wu kula loko ndzi hlaya buku leyi nge Is There a Creator Who Cares About You? Yi endla leswaku munhu a navela—e-e, a lava—ku tiva leswi engetelekeke. Ndza mi nkhensa hileswi mi lumekeke ndzilo wa ku lava ku tiva embilwini ni le mianakanyweni ya mina.”
YOLEYO i ndlela leyi un’wana wa Timbhoni ta Yehovha wa le Carolina N’walungu, eU.S.A., a titweke ha yona hi buku leyi humesiweke hi Sosayiti ya Watch Tower eMintsombanweni ya Miganga ya “Ku Hanya Hi Ndlela Ya Xikwembu” leyi khomiweke hi 1998/99. Hambiloko u nga ri na yona buku leyi, xiya ndlela leyi van’wana va anguleke ha yona.
Endzhaku ka masiku yo karhi loko wanuna un’wana a kume kopi yakwe entsombanweni wa le San Diego, California, eU.S.A., u tsarile: “Ndzi kume leswaku buku leyi yi tiyisa ripfumelo swinene. Yi endla leswaku ndzi yi tlangela hi mbilu ya mina hinkwayo mintirho ya Yehovha ya ku tumbuluxa. Se ndzi fike eka tluka 98, naswona ndza tivutisa leswaku ndzi ta titwa njhani loko ndzi fika emakumu ka yona! Ya ndzi tsakisa swinene.”
Wansati un’wana wa le Vuxeni u tsarile a ku: “Xivulavuri entsombanweni xi tirhise xiga lexi nge ‘buku yo hlawuleka,’ naswona xiga xexo xa swi fanela hakunene leswi tameriweke hi buku leyi. Mhaka ya nkoka hileswaku buku leyi a yi sindzisi muhlayi ku pfumela leswaku Xikwembu xi kona, kambe yi andlala mintiyiso erivaleni.”
Mintiyiso ya kona yi katsa swilo leswi tsakisaka leswi sayense yi swi tshubuleke malunghana ni vuako, vutomi na hina vanhu. Leswi swi tsakise vo tala. “Ku vula ntiyiso, ndzi tsandzeka ku hlamusela ndlela leyi xibukwana lexi xi ndzi khumbeke swinene ha yona,” ku tsala wansati un’wana wa le California. “A ndzi nga swi koti ni ku veka buku leyi ehansi, tanihi leswi tluka rin’wana ni rin’wana a ri hlamusela mintshubulo leyi engetelekeke malunghana ni vuako bya hina ni vutomi hi byoxe. Hakunene ndzi dyondze swo tala ngopfu! Xibukwana lexi i xa risima swinene eka mina, naswona ndzi ta xi avela vanhu vo tala hilaha swi nga kotekaka hakona.”
Nchumu lowu tsakiseke vo tala i ndlela leyi buku leyi yi nyikaka nkatsakanyo wa Bibele ha yona, yi kombisa vumunhu bya Mutumbuluxi. Vo tala va ri: “Nkatsakanyo wa Bibele, lowu nyikeriweke emakumu ka buku leyi, i nkatsakanyo lowunene ngopfu eka hinkwayo leyi ndzi tshameke ndzi yi hlaya.” Endzhakunyana ka ntsombano wo sungula wa le New York, eU.S.A., un’wana u tsarile a ku: “Buku leyi leyintshwa yi tikomba yi tsakisa swinene eka hinkwato leti mi tshameke mi ti kandziyisa. Ndzi tsakisiwe hi vumbhoni bya sayense bya leswaku ku ni Mutumbuluxi. Nkatsakanyo wo koma wa Bibele wu ringene ku veka tinhla erivaleni, naswona wu endla leswaku munhu a hisekela ku hlaya leswi engetelekeke.”
Sayense Leyi Twisisekaka
Rungula ra sayense eka tindzima to sungula ri nga vonaka ri nonon’hwa ku ri twisisa, kambe vo tala va vula leswi landzelaka.
Wanuna un’wana wa le Canada u tsarile a ku: “Buku leyi yi hambanile swinene ni tibuku to rharhangana leti vatsari va tona va ringetaka ku hi tsakisa hi marito yo tika. Mahlamuselelo ya n’wina ma hlawulekile, hileswi ma endlaka leswaku timhaka ta swa ntumbuluko, vukhemisi, xitekela lexi vuriwaka DNA na ti-chromosome, ni swin’wana, hi swi twisisa kahle. A mi ta va mi pfunile loko a mi lo tsala tibuku-mpfuno ta le yunivhesiti leti ndzi ti dyondzeke malembe lama hundzeke!”
Profesa wa swa ntumbuluko wa le yunivhesiti u tsarile a ku: “[Yi] veka timhaka erivaleni handle ko boxa vuxokoxoko byo nonon’hwa. Buku leyi yi pfuna muhlayi ku anakanya naswona yi tshaha marito ya vativi vo tala va sayense lava dumeke. Yi ‘faneriwa hi ku hlayiwa’ hi mani na mani loyi a lavaka ku tiva masungulo ya vuako ni vutomi, hambi i mutivi wa sayense kumbe i munhu ntsena.”
Nhwanyana un’wana loyi a dyondzelaka vuongori u te: “Ndzi sale ndzi hlamele loko ndzi pfula ndzima 4 kutani ndzi kuma ku tshahiwe marito ya buku leyi hi yi tirhisaka exikolweni! Ndzi teke buku leyi ndzi yi nyika profesa wa hina kutani ndzi n’wi byela leswaku ndza tiyiseka leswaku rungula ra kona ri ta n’wi tsakisa. Ndzi n’wi pfulele eka tluka 54 laha ku vulavuriwaka hi byongo. U tihlayele rona kutani a ku, ‘Leyi i mhaka yo tsakisa! Ndzi ta yi kambisisa kahle.’”
Xirho xa palamendhe eBelgium xi tsarile xi ku: “Lexi xi ndzi hlamariseke ni ku ndzi tsakisa a ku ri rungula leri vulavulaka hi sayense leri kombaka leswaku sayense ya manguva lawa a yi kanetani ni dyondzo ya Bibele ya leswaku ku ni Xikwembu xin’we ntsena, kambe yi pfumelelana na yona. Leri i vonelo ro hlawuleka swinene.”
Ku Tiva Mutumbuluxi Ku Antswa
Buku leyi yi pfune vanhu va matiko yo tala ku tiva Xikwembu ku antswa ni ku titwa va ri ni vuxaka lebyikulu na xona. Muhlayi un’wana le Dorobeni ra Fukuoka, eJapani, u te: “Swi vonaka onge i ro sungula Yehovha a hlamuseriwa kahle. Buku leyi ya khorwisa swinene. Ndzi kote ku tiva Yehovha hi ndlela leyi a ndzi nga si tshama ndzi yi anakanya ku fikela sweswi.” Wanuna un’wana wa le El Salvador u tsarile a ku: “Mi swi veke erivaleni swinene leswaku Xikwembu xi ni tintswalo, nsovo, xi hlwela ku kariha naswona xi ni tintswalo letikulu ta rirhandzu. Ina, hi swona leswi hi swi lavaka leswaku hi va ni vuxaka lebyikulu na xona ni N’wana wa xona. I buku yo sungula leyi hlamuselaka mintlhaveko ya Yehovha ni ya N’wana wa yena Yesu, loko a ha ri munhu wa nyama.” Naswona muhlayi un’wana wa le Zambia u te: “Ndzi sungule ku va ni mianakanyo leyintshwa hi ku helela malunghana na Yehovha.”
Ina, Timbhoni ta Yehovha ti tsakela ku yi nyika van’wana buku leyi nge Is There a Creator Who Cares About You? Wansati un’wana u te: “Loko ndzi heta ku hlaya ndzima 10 [“Loko Mutumbuluxi A Khathala, Ha Yini Ku Ri Ni Ku Xaniseka Swonghasi?”], ndzi boheke ku vula ndzi ku, ‘Leyi hi yona buku leyi hi yi lavaka laha Japani!’ Ndzi lava ku ri tiva kahle rungula leri nga eka ndzima leyi, kutani ndzi ri tirhisa hi ku phindha-phindha entirhweni wa nsimu.” Wansati un’wana u dyondza Bibele ni nhwanyana un’wana loyi a kuriseriweke etempeleni leyi tata wakwe a nga muprista eka yona. “Swa n’wi tikela ku amukela dyondzo ya leswaku ku ni Mutumbuluxi. A ku na nchumu lexi sindzisaka munhu ku pfumela nhlamuselo ya buku leyi, kambe timhaka ti le rivaleni, kutani ndzi anakanya leswaku hambi ku ri Mabudha ma nga yi hlaya hi mbilu yo basa. Nakambe yi endla leswaku hi ri twisisa swinene rirhandzu leri Yehovha a nga na rona eka hina.”
Ku ve ni xiviko xo tsakisa lexi humaka eNghilandhi lexi nge: “Ndza ha ku heta ku hlaya buku leyi nge Creator, naswona ndzi lava ku tlhela ndzi yi hlaya. I buku yo hlamarisa swonghasi! Loko munhu a yi hlaya u susumeteleka ku va ni rirhandzu eka Yehovha. Kopi yin’wana ndzi yi nyike muakelani loyi endzhaku ko hlaya tindzima timbirhi ntsena a nga te, ‘Ndzi nge yi veki ehansi, ya tsakisa swinene.’ Ndza tiyiseka leswaku yi ta pfuna vanhu vo tala ku tiva Mutumbuluxi wa hina Lonkulu ni ku n’wi rhandza.”
Wanuna un’wana wa le Maryland, eU.S.A., u te: “Entiyisweni yi nghene emarhambyini ni le mongweni wa mina wa moya! Ndzi kunguhate ku siya kopi eka mani na mani loyi a ndzi qachaka. Minkarhi yin’wana swa ndzi tikela ku nyikela vumbhoni eka vanhu vo tano lava tshamaka va khomekile, lava dyondzekeke. Sweswi buku leyi yi ta ndzi pfuna ku kuma ndlela leyi tsakisaka ni leyi humelelaka yo vulavula ni vanhu.”
Kunene, buku leyi nge Is There a Creator Who Cares About You? yi ta va ni vuyelo lebyinene eka vanhu emisaveni hinkwayo.
[Laha Xifaniso Xi Humaka Kona eka tluka 25]
Cover photo above, Eagle Nebula: J. Hester and P. Scowen (AZ State Univ.), NASA