Yehovha I Muvumbi Wa Hina
1 Timiliyoni ta vanhu ta pfumela leswaku Xikwembu i musunguri wa vutomi. Van’wana vo tala va pfumela eka hundzuluko. Kasi ku ni lava va nga swi tiviki leswi va nga swi pfumelaka. Buku leyi nge Bibele—I Rito Ra Xikwembu Kumbe I Ra Munhu? i ya vanhu lavo tano hinkwavo. Entiyisweni buku leyi ya hlamarisa hakunene hikwalaho ka leswi yi nyikelaka vumbhoni lebyi tiyeke bya leswaku Bibele i Rito ra Xikwembu hakunene. Hi June, hi ta va hi fambisa buku leyi leyinene.
2 Hi lexi xingheniso xo olova, lexi kongomeke.
Endzhaku ko xeweta n’wini wa muti, kombisa xifaniso lexi nga eka tluka 4, kutani u vutisa:
◼ “Ha yini u hlaya Bibele? Xana i buku leyi tirhaka ya siku ra hina? Xana wa pfumela leswaku Bibele yi nga hi pfuna ku ololoxa swiphiqo swa hina leswo tala? [Yimela nhlamulo.] Buku leyi yi nyika tinhlamulo leti pfumelelanaka swinene ni Bibele. Ndzi tsakela leswaku yi va ya wena leswaku u ta vona vumbhoni hinkwabyo kutani u tiendlela xiboho. Hi ta ku siyela yona hi munyikelo wutsongo wa R3,50.”
3 Endzhaku ka ku titivisa, u nga ha ku:
◼ “Xana u nga pfumela leswaku hinkwerhu hi lava nkongomiso wa vutlhari leswaku hi ta humelela evuton’wini? [Yimela nhlamulo.] Xiya leswi Bibele yi swi vulaka laha eka Swivuriso 14:12. [Hlaya.] Nkongomiso lowu hoxeke wu nga tisa khombo. Laha eka Swivuriso 2:6, 7 Bibele yi kombisa leswaku Yehovha u nyika vutlhari bya ntiyiso. [Hlaya.] I swa xihatla eka hina hinkwerhu leswaku hi ya eBibeleni leswaku hi kuma vutlhari bya ntiyiso. Buku leyi yi kombisa leswaku Bibele i xihlovo xo tshembeka xa ndzayo leyinene eka swiphiqo leswi vanhu va langutaneke na swona. Ndzi kombela u xiya leswi vuriweke laha eka ndzimana 2 eka tluka 5. [Hlaya.] Ndzi tsakela ku ku siyela buku leyi hi munyikelo wa R3,50.” Loko n’wini wa muti a kombisa ku tsakela, n’wi byele leswaku nkarhi lowu taka loko u vuya mi ta bula hi xivutiso lexi nge, Hi byihi vumundzuku bya munhu ni misava?
4 Kumbe, loko n’wini wa muti a vonaka a khomekile, u nga ha ku:
◼ “Ndza tshemba wa pfumela leswaku ku ni swiphiqo swo tala leswi vanhu va langutaneke na swona.” Kutani hlaya ndzimana ya xingheniso eka ndzima 1. Endzhaku ka nhlamulo ya n’wini wa muti ya xivutiso xo hetelela eka ndzimana yoleyo, u nga ha ku: “Bibele yi hi byela leswaku sweswinyana Xikwembu hi xoxe xi ta ololoxa swiphiqo hinkwaswo swa vanhu leswi karhataka. Buku leyi yi nyikela vumbhoni bya matimba lebyi kombisaka leswaku Bibele i Rito ra Xikwembu. Ndzi tsakela leswaku buku leyi yi va ya wena hi munyikelo wa R3,50.”
5 Loko u ya emutini lowu swi tikombaka leswaku ku ni vana, u nga ha ku:
◼ “Hi vulavula ni vatswari endhawini leyi malunghana ni swiletelo leswi va nga swi nyikaka vana va vona. Vatswari vo tala va karhateka hi ku pfumaleka ka nkongomiso wa mahanyelo eka vana efambiselweni ra xikolo. Xana u xi vonile xiphiqo xa leswi? [Yimela nhlamuselo.] Swa tsakisa leswi Bibele yi kombisaka xilaveko xa hina ni vana va hina xo kuma nkongomiso wa vutlhari. Xiya leswi kombisiweke laha eka Swivuriso 14:12. [Hlaya.]” Pfula eka tluka 174 ra buku leyi nge Rito Ra Xikwembu kutani u hlaya ndzimana yo hetelela eka ndzima yoleyo. Fambisa buku hi R3,50. Loko n’wini wa muti a amukela buku, vutisa xivutiso lexi nga ta hlamuriwa eriendzweni ra wena ra nkarhi lowu taka.
6 Xana u navela ku pfuna van’wana leswaku va dyondza hi mintiyiso leyi hlamarisaka malunghana ni Muvumbi wa hina ni xikongomelo xa yena xa rirhandzu lexi nga eBibeleni mayelana ni ntumbuluko wa yena? Buku leyi nge Rito Ra Xikwembu yi nga ku pfuna ku endla sweswo. Yi xixima Muvumbi wa hina Lonkulu, Yehovha Hosi Leyikulu. Hambeta u pfuna vanhu va timbilu letinene ensin’wini ya ka n’wina leswaku va vuyeriwa eka nkongomiso lowu wo tshembeka lowu kumekaka eBibeleni.—2 Pet. 1:19-21.
7 Buku leyi yi nga va mpfuno eka vanhu lavanene lava kanganyisiweke hi lava nga riki na ripfumelo eka Yehovha kumbe Rito ra yena. Rungula ra xiviri leri buku leyi nge Rito Ra Xikwembu yi ri tameleke ri nga pfuna vanhu lavo tano leswaku va kurisa ku tlangela Muvumbi wa hina, loyi a hi khathalelaka hi rirhandzu.