Ku Pfuna Van’wana Leswaku Va Dzunisa Muvumbi Wa Hina
1 Xana hi titwa hi laha mupisalema a titweke ha kona loko a ku: “Yehova!. . . nseledyana ya v̌utomi yi na wena”? (Ps. 36:5, 9) Xana hina hi nga va pfuna njhani van’wana leswaku va tlangela ni ku dzunisa Yehovha tanihi Mutumbuluxi wa hina? Hi ku fambisa buku leyi nge Bibele—I Rito Ra Xikwembu Kumbe I Ra Munhu? hi June. Buku leyi i yinene hakunene hikuva yi nyikela vumbhoni lebyi tiyeke mayelana ni vutsari bya Xikwembu naswona yi komba kahle leswaku ha yini Bibele yi nga tsariwanga hi munhu. Yi tlhela yi endla leswaku hi tshemba Bibele.
2 Hi leri rungula ro olova, leri kongomeke.
Endzhaku ko xeweta n’wini wa muti, n’wi kombise xifaniso lexi nga eka tluka 4, ivi u n’wi vutisa:
◼ “Ha yini hi hlaya Bibele? Xana ya ha ri buku leyi tirhaka esikwini ra hina? Xana wa tshemba leswaku Bibele yi nga hi pfuna ku tlhantlha swiphiqo swa hina swo tala? [Yimela nhlamulo.] Buku leyi yi nyikela tinhlamulo leti pfumelelanaka hi ku helela ni Bibele. Ndzi rhandza leswaku u tikumela yona leswaku u ta kambisisa vumbhoni lebyi hinkwabyo ivi u tiendlela xiboho. Hi ku siyela buku leyi leyinene hi munyikelo wa R3,00.”
3 Endzhaku ko titivisa u nga ha ku:
◼ “Xana wa pfumela leswaku hinkwerhu hi lava nkongomiso wa vutlharhi leswaku hi ta hambeta hi hanya? [Yimela nhlamulo.] Xiya leswi Bibele yi swi vulaka laha eka Swivuriso 14:12. [Hlaya.] Nkongomiso lowu hoxeke wu nga vanga khombo. Laha eka Swivuriso 2:6, 7, Bibele yi komba leswaku Yehovha u nyikela nkongomiso wa vutlharhi. [Hlaya.] Ku ni xilaveko xa xihatla xa leswaku hinkwerhu ka hina hi hundzukela eBibeleni leswaku hi ta kuma vutlharhi bya Xikwembu. Buku leyi yi kombisa leswaku Bibele i xihlovo lexi tshembekaka xa xitsundzuxo lexi twalaka mayelana ni swiphiqo leswi vanhu va langutaneke na swona. Ndzi kombela u xiya leswi tsariweke laha eka ndzima 2 tluka 5. [Hlaya.] Ndzi rhandza ku ku siyela buku leyi hi munyikelo wa R3,00.” Loko n’wini wa muti a kombisa ku tsakela, n’wi byele leswaku enkarhini lowu taka loko u vuya u ta vulavula hi xivutiso lexi nge, Xana hi byihi vumundzuku bya vanhu ni bya misava?
4 Kumbe, loko n’wini wa muti a vonaka a khomekile swinene, u nga ha ku:
◼ “Handle ko kanakana u ta pfumela leswaku vanhu va langutane ni swiphiqo swo tala.” Kutani hlaya ndzimana yo sungula eka ndzima 1. Endzhaku ka loko n’wini wa muti a hlamule xivutiso lexi nga emakumu ka ndzimana yoleyo, u nga ha ku: “Bibele yi hi byela leswaku ku nga ri khale Xikwembu hi xoxe xi ta tlhantlha swiphiqo swa vanhu leswi rharhanganeke hinkwaswo. Buku leyi yi nyikela vumbhoni bya matimba swinene lebyi kombisaka leswaku Bibele i Rito Ra Xikwembu. Ndzi rhandza leswaku u tikumela yona hi munyikelo wa R3,00 ntsena.”
5 Loko u ya endlwini leyi swi tikombaka leswaku ku ni vana, u nga ha ku:
◼ “A hi vulavula ni vatswari endhawini leyi mayelana ni ndlela leyi va kongomisaka vana va vona ha yona. Vatswari vo tala va karhatekile hikwalaho ka ku pfumaleka ka nkongomiso wa vana wa ku tikhoma edyondzweni ya xikolo. Xana u xi xiyile xiphiqo xo tano? [Yimela nhlamulo.] Swa tsakisa leswi Bibele yi kombisaka leswaku hina ni vana va hina hi lava nkongomiso wa vutlharhi. Xiya leswi tsariweke laha eka Swivuriso 14:12. [Hlaya.]” Pfula eka tluka 174, ebukwini leyi nge Rito Ra Xikwembu ivi u hlaya ndzimana yo hetelela eka ndzima yoleyo. Fambisa buku yoleyo hi R3,00. Loko n’wini wa muti a teka buku, vutisa xivutiso lexi nga ta hlamuriwa eriendzweni ra wena leri landzelaka.
6 Xana u navela ku pfuna van’wana leswaku va dyondza ntiyiso lowu hlamarisaka mayelana ni Mutumbuluxi wa hina ni xikongomelo xakwe xa rirhandzu hi swivumbiwa swakwe tanihi leswi swi nga eBibeleni? Buku leyi nge Rito Ra Xikwembu yi nga ku pfuna ku endla tano. Yi dzunisa Mutumbuluxi wa hina Lonkulu, Yehovha, Hosi Leyikulu. Hambeta u pfuna va timbilu letinene ensin’wini ya ka n’wina leswaku va pfuneka hi nkongomiso wa vutlharhi lowu nga eBibeleni.—2 Pet. 1:19-21.