Ku Aka Ripfumelo Eka Mutumbuluxi Wa Vanhu
1 Vanhu vo tala va le nsin’wini ya ka hina va vula leswaku va ni ripfumelo ro karhi eka Mutumbuluxi ni le Ritweni rakwe, ku nga Bibele. Leswi twisaka ku vava, hi leswaku vo tala va vona va enerisiwa hi vutivinyana byitsongo bya Bibele naswona a va khathali ngopfu hi ku endla vuxaka bya munhu hi xiyexe ni Xikwembu. Buku leyi nge Rito Ra Xikwembu yi kambisisa Bibele hi vuenti ivi yi nyikela vumbhoni lebyi hlamarisaka bya leswaku hakunene i Rito ra Xikwembu. Xana hi nga va pfunisa ku yini vanhu lavanene lava kombiseke ku tiyimisela ku yingisa? Hi ku endla maendzo yo vuyela. Loko hi vuyela, minkarhi hinkwayo i swinene ku tiva leswi hi nga ta swi vula, leswi nga ta aka ripfumelo eka Yehovha tanihi Mutumbuluxi wa hina ni le Ritweni rakwe, ku nga Bibele.
2 Loko munhu a kombise ripfumelo eBibeleni, xingheniso lexi xi nga ha va lexinene eku sunguleni ka bulo ra wena:
◼ “Timotiya wa Vumbirhi 3:16, 17 yi nyikela xivulwa xa matimba mayelana ni masungulo ya Bibele; ndzi rhandza ku tiva leswaku u ehleketa yini hi swona. [Hlaya ivi u yimela nhlamulo.] Xana a wu pfumeli leswaku loko vanhu vo tala a va ri ni langutelo leri mayelana ni Bibele, swiphiqo leswikulu ni vaakelani va hina a swi nga ta tala?” Yimela nhlamulo. Ebukwini leyi nge Rito Ra Xikwembu, hlaya ndzimana 4 eka tluka 176. Vutisa n’wini wa muti leswaku xana u nga vuya hi nkarhi lowu faneleke leswaku u ta yisa bulo emahlweni.
3 U nga ha sungula bulo ra wena hi swin’wana swo fana ni leswi:
◼ “Eriendzweni ra mina ro hetelela, ndzi vutise xivutiso lexi nge, Xana hi byihi vumundzuku bya vanhu ni bya misava? Xiya ndlela leyi buku leyi ndzi ku siyeleke yona yi xi hlamulaka ha yona xivutiso xexo.” Pfula tluka 161 ebukwini leyi nge Rito Ra Xikwembu ivi u n’wi khutaza ku hlaya tindzimana 29 na 30. Loko a kombisa ku tsakela loku yaka emahlweni, u nga ha n’wi vutisa: “Loko leswi ku ri leswi vumundzuku byi hi khomeleke swona, kutani ha yini misava yi tele hi madzolonga ni swilo swin’wana swo biha?” Loko swi fanerile, mi nga ha vulavula hi yinhla leyi hi nkarhi wolowo kumbe eriendzweni ra wena leri landzelaka hi ku vulavula hi ndzima 10 ya buku leyi nge Rito Ra Xikwembu.
4 Loko n’wini wa muti a teke buku leyi nge “Rito ra Xikwembu” eriendzweni ra wena ro sungula, u nga ha ku:
◼ “Eriendzweni ra hina ro sungula hi vulavule hi xilaveko xa nkongomiso wa vutlharhi eminkarhini leyi yo nonon’hwa. Ebukwini leyi ndzi ku siyeleke yona, ku ni ndzima yin’wana leyi hinkwayo ka yona yi vulavulaka hi yinhla leyi. Xana u nga rhandza ku ta ni kopi ya wena ya buku leyi? Vona ndzima 12, eka tluka 162 leyi nga ni xihloko lexi nge ‘Xihlovo Lexi Tlakukeke Xa Vutlharhi.’ A hi bule hi tindzimana ti nga ri tingani to sungula eka ndzima leyi.” Hlaya ndzimana 1 na 2 u tlhela u bula ha tona. Endla malunghiselelo ya ku vuyela u ta yisa bulo emahlweni.
5 Ndlela yin’wana leyi u nga sungulaka riendzo ro vuyela ha yona i ku vula leswi:
◼ “Vanhu va vaviseke ngopfu ni ku dyiwa hi mbitsi hikwalaho ka vubihi ni vuhomboloki. Bibele, ku nga Rito ra Xikwembu ya hlamusela leswaku ha yini hi langutane ni swiphiqo leswi. [Pfula eka tluka 134, ndzima 10 ivi u hlaya ndzimana 1.] Lava va tinyikaka nkarhi wa ku kambela Bibele va ta swi kota ku twisisa vuprofeta lebyi xiyekaka bya Bibele naswona va ta tlhela va langutela ntshembo wa ku vona misava leyi yi hundzuriwa paradeyisi.” Hlamusela n’wini wa muti mayelana ni lunghiselelo ra hina ra dyondzo ya mahala ya Bibele, u tinyikela ku tlhela u vuya hi nkarhi lowu n’wi lulameleke.
6 Vahuweleri lava nga ni ntokoto va swi xiyile leswaku swa antswa ku hlela nkarhi wa maendzo yo vuyela. Ku va ni malunghiselelo lama tiyeke ya ntirho lowu swi ta hi pfuna ku landzelela ku tsakela nkarhi na nkarhi. Kuma nkarhi lowu lulameleke wena ni vanhu lava tshamaka ensin’wini yoleyo. Loko u hlanganyela nkarhi hinkwawo entirhweni lowu, u ta kuma ntsako eku hetisiseni ka xiavelo xo “endla vadyondzisiwa.”—Mt. 28:19, 20.