Vutengi Byi Dzunisa Xikwembu
1 Nawu wa Muxe a wu ri ni swilaveko leswi nga hundzukiki swa ku hlayisa vutengi. Wu hlawule Vaisrayele tanihi vanhu lava a ku laveka leswaku va tihlayisa va basile emirini ni le moyeni. (Levh. 11:35, 36; 15:1-11; Esa. 52:11) Xiyimo lexo tenga xi dzunise Xikwembu naswona xi nghenise xandla erihanyweni ra rixaka.
2 Ni namuntlha, ku basa i mfungho lowu funghaka vanhu va Yehovha. Kambe tanihi leswi swi funghaka vanhu va Yehovha tanihi ntlawa, xana swi tano ni le ka un’wana ni un’wana wa hina hi yexe? Ndlela leyikulu leyi hi khathalelaka vutengi ni ku basa ha yona, yi kombisa ndlela leyi hi tsakelaka ha yona swilaveko swa Yehovha.
3 Ku vuriwa yini hi ku languteka ka makaya ya hina? Xana ku endla leswaku vanhu va nga ri tsakeli rungula ra Mfumo leri hi ri byarheke? Xana swi nga endleka leswaku vanhu van’wana va nga hi tshembi kahle loko hi vulavula hi ku hundzula misava leyi yi va paradeyisi hikuva makaya ya hina a ma basanga naswona switandi swa hina swi tlhumile hi byanyi? Loko makaya ya hina ma nga hlelekanga kumbe ma nuha hikwalaho ka futa, xana ku nga vuriwa leswaku hi le ku sunguleni ka “tindlela to basa leti nga ta faneleka eka Misava Leyintshwa ehansi ka Mfumo wa Xikwembu”?—om-TS matl. 130-1.
4 Ku vuriwa yini hi movha lowu hi wu tirhiselaka vutirheli bya nsimu? Xana wu basile endzeni ni le handle, leswaku ku vonakala ka wona ku nga tisi xisolo entirhweni wa hina? Ku vuriwa yihi hi swiambalo swa hina, minkwama ya hina ya tibuku ni ku tilunghisa ka hina? Xana swi basile naswona swa languteka, a swi tisi xisandzu? I swa nkoka leswaku hi tihlayisa hi basile ni swiambalo swa hina, hi ku hlamba ni ku swi hlantswa nkarhi na nkarhi.—wTS89 6/1 matl. 16-19.
5 Ku vuriwa yini loko makwerhu a ri ni futa lerova mahanyelo yakwe ni ndhawu leyi a tshamaka eka yona swi tisa xisolo evandlheni? Kumbexana u lava mpfuno wa rirhandzu hikwalaho ko dyuhala kumbe hi mhaka ya vuvabyi. Loko swi ri tano, ku ta va ku ri tintswalo ku n’wi pfuna. Un’wana a nga ha va a ri ni xiphiqo naswona a nga xi voni; xitsundzuxo xa tintswalo xi nga ha n’wi susumetela ku lulamisa xiyimo lexi. Vanhu lava hambetaka va veka xikombiso lexi nga riki xinene emhakeni leyi a va nge fanelekeli malunghelo lama engetelekeke evandlheni. I ntiyiso, vakulu va fanele va tivonela leswaku va nga kandziyisi mimpimanyeto ya vona vini kumbe leswi va swi rhandzaka.
6 Vanhu lavantshwa lava tsakelaka va rhambiwa leswaku va ta tsakela swakudya swa moya eHolweni ya hina ya Mfumo. Hakanyingi, hi hisekela ku va rhamba hikuva holo ya languteka naswona yi basile. Kambe, swi lava ku tirha, leswaku hi yi hlayisa yi ri tano. Rhalarhala eholweni ya n’wina. Xana switulu, ni le hansi ni le khumbini ku basile? Xana swihambukelo swa basisiwa nkarhi na nkarhi? Loko se hi tolovele ku vona tapeti leyi nga ni misava kumbe pende leyi kwamukaka emakhumbini, hi nga ha swi vona swi amukelekile. Hambi swi ri tano, vanhu lava taka ro sungula va nga swi vona swi nga tsakisi nikatsongo. Hi fanele hi endla hi laha hi nga kotaka ha kona ku hlayisa holo yi languteka naswona yi tsakisa, hi tirha hi matimba loko ku fika nkarhi wo basisa kumbe wo pfuxeta. Loko Holo ya n’wina ya Mfumo yi ri na nsimu, na yona yi fanele yi khathaleriwa nkarhi hinkwawo. Xana yi hlelekile ni ku koka mahlo? Xana byanyi bya tsemiwa nkarhi na nkarhi?
7 Handle ko vulavula, hi nga kwetsimisa Xikwembu hi ku vonakala ka hina ni ku basa ka makaya ya hina, ka timovha ta hina ni ka Tiholo ta hina ta Mfumo. Xikombiso xa hina lexinene xi nge khunguvanyisi munhu kambe xi ta nyikela vumbhoni bya leswaku vugandzeri bya hina byi basile naswona byi lulamile.—1 Kor. 10:31, 32; Yak. 1:27.