Endla Swichudeni Swa Bibele Swi Lunghekela Vutirheli
1 Pakani-nkulu eku fambiseni ka tidyondzo ta Bibele i ku endla vadyondzisiwa lavantshwa, vatirhi lava nga ta hlanganyela na hina eku dyondziseni ka van’wana. (Mt. 28:19, 20) Kutani xikongomelo xa dyondzo a hi ku nyika vutivi ntsena; yi fanele yi nghenisa ripfumelo leri tiyeke eka swichudeni swa hina ni ku swi endla swi lunghekela ku avela van’wana ntshembo wa swona. (2 Kor. 4:13) Xana hi nga va pfuna hi tindlela tihi leti tirhaka leswaku va fanelekela ku dyondzisa van’wana?—2 Tim. 2:2.
2 Endla Vutirheli Byi Va Pakani: Ku sukela eku sunguleni, swi veke erivaleni leswaku vugandzeri bya ntiyiso byi katsa ‘ku vulavula erivaleni leswaku u pona.’ (Rhom. 10:10) Vito ra hina leri nge Timbhoni ta Yehovha, ri vula leswaku hi fanele ku vulavula ni van’wana. Hi va pfuna va vona leswaku ku dyondzisiwa ka vona a hi ka ku ponisa vona ntsena. Loko vona va va vadyondzisi, lava va va yingiselaka na vona va kota ku pona.—1 Tim. 4:16.
3 Pfuxetani Leswi Dyondziwaka: Mimpfuxeto ya nkarhi na nkarhi ya leswi dyondziwaka i xipfuneto xa nkoka eku dyondzeni. Swi pfuna xichudeni leswaku xi kula emoyeni tanihi leswi ntiyiso lowu xa ha ku wu dyondzaka wu yaka wu dzika emianakanyweni ni le mbilwini ya xona. Hina hi swi vonile leswi loko hi hlamula swivutiso swa mpfuxeto leswi katsiwaka eDyondzweni ya Xihondzo xo Rindza. Lunghiselela swivutiso swo olova, leswi kongomeke leswaku xichudeni xa wena xi swi hlamula hi marito ya xona.
4 Mpfuxeto wa wena wu nga ha endliwa onge hi loko u ri entirhweni wa nsimu. Vutisa xivutiso kumbe u hlamusela xiyimo lexi hakanyingi xi vaka kona loko u nyikela vumbhoni eka van’wana. Wena u nga ha va n’wini wa muti, kutani xichudeni xa wena xi kombisa leswi a xi ta swi vula. Xi bumabumele laha xi endleke kahle, u tlhela u nyikela swiringanyeto leswi tirhaka leswi nga ta xi pfuna leswaku xi humelela swinene enkarhini lowu taka. Ndzetelo lowu wu ta xi pfuna ku tirhisa leswi xi swi dyondzeke ni ku kurisa vutshila bya xona eku tirhiseni ka Bibele.
5 Buku Leyi Nge Reasoning: Tiyiseka leswaku xichudeni xa wena xi na yona buku leyi nge Reasoning, naswona u xi dyondzisa ku yi tirhisa. Kombisa ndlela leyi yi nyikelaka swiringanyeto swo sungula mabulo ha yona, swo hlamula swivutiso swa Bibele kumbe swo hlula minkaneto. Tirhisa buku leyi edyondzweni u kombisa tindlela to vulavula ni van’wana hi mukhuva lowu khorwisaka. Buku leyi yi nga n’wi nyika xivindzi, yi n’wi nyika matimba yo twarisa rungula ra Mfumo.
6 Kandziyisa Nkoka Wa Minhlangano: Minhlangano ya vandlha, ngopfu-ngopfu Nhlangano wa Ntirho ni Xikolo xa Vutirheli bya le Tilweni, swi hleleriwe ku hi endla hi lunghekela ntirho wa nsimu. Tinhla hinkwato ta nkoka ta ku nyikela vumbhoni hi laha ku humelelaka ta kambisisiwa, ti tlhela ti kombisiwa hi lava nga ni ntokoto ni vuswikoti. Kandziyisa nkoka wa minhlangano, naswona u tikarhatela ku n’wi pfuna a va kona. Ku va kona eminhlanganweni nkarhi na nkarhi swi nga nyika xichudeni xa wena ntamu lowu xi wu pfumalaka leswaku xi va mudyondzisiwa wa ntiyiso wa Yesu.
7 Xikombiso lexi u xi vekaka a xi fanelanga xi honisiwa. Ku tiyimisela ka wena ni ku va kona nkarhi na nkarhi entirhweni wo chumayela swi kombisa ku tlangela ka wena ntiyiso hi vuenti. Ndlela yo tano yi khutaza xichudeni xa wena leswaku xi tirha hi matimba ku kombisa ripfumelo ra xona. (Lk. 6:40) Hinkwaswo leswi swi nga pfuna munhu lontshwa leswaku a languta vutirheli tanihi lunghelo a tlhela a tsakela ku byi endla.—1 Tim. 1:12.