Tshama U Ri Ni Langutelo Lerinene
1 Vona ndlela leyi hi tsakaka ha yona loko hi hlaya hi ku andza loku hlamarisaka ematikweni yo tala! Kambe, hi xiya leswaku etindhawini tin’wana vahuweleri va Mfumo hakanyingi va langutana ni rivengo, ku nga tsakeli hambi ku ri ku kanetiwa hi ku kongoma entirhweni wa hina wo chumayela. Hi nga ri hlayisa njhani langutelo lerinene loko leswi swi humelela ensin’wini ya hina? Hi nga ri sivela njhani langutelo ro biha leri nga hi tekelaka ntsako wa hina kumbe ku tsanisa ku hisekela ka hina ntirho wo endla vadyondzisiwa?
2 Langutelo lerinene ri ta hi pfuna leswaku hi ringanisela. Hambi loko hi ri ehansi ka swiyimo leswi ringaka, a hi fanelanga hi pfumelela mianakanyo leyo biha yi lawula langutelo ra hina. Yesu u hi vekele xikombiso lexi hetisekeke. A ku ri vanhu va nga ri vangani ntsena lava amukeleke leswi a swi dyondziseke. Vo tala va khunguvanyisiwe hi dyondzo yakwe. U langutane ni swiyimo leswi ringeke swinene ku tiyisela kakwe. Varhangeri va vukhongeri va sole ntirho wakwe ni ku kunguhata ku n’wi dlaya. U tshwuteriwe hi marhi, a makariwa, a hlekuriwa, a biwa naswona eku heteleleni va n’wi dlayile. Kambe, u kume ntsako entirhweni lowu a a wu endla. Ha yini? Hikuva u xiye nkoka wa ku endla ku rhandza ka Xikwembu, naswona a nga helanga matimba.—Yoh. 4:34; 13:17; Hev. 12:2.
3 Ku Hlayisa Langutelo Lerinene eVutirhelini Bya Hina: Leswaku hi ta kota ku endla leswi, hi fanele ku tsundzuka tinhla ti nga ri tingani. Tsundzuka leswaku hi ni rungula leri vanhu vo tala va ri honisaka kumbe ku ri landzula. (Mt. 13:14, 15) Hambi leswi vaapostola va lerisiweke hi nawu leswaku va nga ha dyondzisi hi vito ra Yesu, va tshame va tshembekile entirhweni wa vona wo chumayela, naswona ntshovelo a wu ya emahlweni. (Mint. 5:28, 29; 6:7) Hi swi tiva ka ha ri emahlweni leswaku emasin’wini man’wana, vanhu va nga ri vangani va ta yingisela. (Mt. 7:14) Hikwalaho, hi ni xivangelo xo tsaka loko munhu un’we ntsena ensin’wini ya hina a yingisela. Nakambe tsundzuka leswaku hambi ku ri lava kanetaka va fanele ku nyikiwa nkarhi wa ku twa mahungu lawa. (Ezek. 33:8) Vakaneti van’wana eku heteleleni va hundzuka va va vagandzeri va Yehovha. Hikwalaho, loko byi langutiwa kahle, vutirheli bya hina byi endla hi titwa hi hetisise ntirho wo karhi, hambi loko ku ri vatsongo lava yingisaka. Vukona bya hina emakaya ya vanhu ni rungula ra Mfumo wa Xikwembu i vumbhoni.—Ezek. 2:4, 5.
4 Hi ni xivangelo lexinene xo va ni langutelo lerinene. Ku humelela ka ntirho wa misava hinkwayo ni vumbhoni lebyi yaka emahlweni bya leswaku hi le kusuhi ni nhlomulo lowukulu hinkwerhu, swi fanele ku hi susumetela ku tikarhatela ku tirha hi ku tinyiketela eka Xikwembu. (2 Pet. 3:11, 14) Ku tirha hi ku hiseka hi August ku ta va ndlela leyinene yo kombisa ku tlangela ka hina leswi hi swi dyondzeke. Nakambe hi lava leswaku lava ha ku sungulaka ku hlanganyela va kombisa langutelo lerinene hi ku tirhisa leswi va dyondzisiwaka swona. Loko swin’wana swa swichudeni swa hina swa Bibele swi endle nhluvuko ku fika laha swi lunghekeleke ku va vahuweleri lava nga khuvuriwangiki, n’hweti ya August yi nga ha va nkarhi lowunene wo sungula ku va vahuweleri.
5 Hambi hi tirha tanihi vahuweleri kumbe maphayona, hinkwerhu ha pfuneka loko hi tsundzuka leswaku leswi Yehovha a hi kombelaka swona a swi tiki. (1 Yoh. 5:3) U tshembisa ku hi seketela. (Hev. 13:5b, 6) Ku nga khathariseki ku nga tsakeli ka vanhu, rivengo kumbe ku kanetiwa, hi fanele ku va ni langutelo lerinene ni ku hambeta hi chumayela, hikuva i ku rhandza ka Xikwembu leswaku hi endla tano.—1 Tim. 2:3, 4.