Mahanyelo Ya Vakreste eXikolweni
1 Loko u ri muntshwa wa Mukreste la ha riki exikolweni, u fanele ku va ni ripfumelo leri tiyeke leswaku u hlayisa vutshembeki bya wena. U hlangana ni vanghana lavo biha ni swiyimo leswi nga ringaka ripfumelo ra wena. I swa nkoka leswaku u tirhisa ndzayo ya Petro leyi nge “hanyani hi mukhuva lowo saseka exikarhi ka vamatiko, leswaku . . . va ta vona mintirho ya n’wina leyo saseka, va dzunisa Xikwembu.” (1 Pet. 2:12) Mi fanele ku va ni xivindzi ni ku tiyimisela leswaku mi langutana ni ntlhontlho lowu.
2 Loko mi ri exikolweni ni loko mi humile, mi hlaseriwa hi minkucetelo leyi onhaka ya rimbewu emahlweni ka vukati, nhlambha, fole ni ku tirhisa swidzidzirisi hi ndlela yo biha. Siku rin’wana ni rin’wana, mi langutana ni miringo leyi xungetaka ku onha rhekhodo ya n’wina ya mahanyelo lamanene. Ku fana ni lavakulu, mi fanele mi “lwela vupfumeri” loko mi lava ku tiyisela miringo yo tano.—Yuda 3; vona Xihondzo xo Rindza xa July 15, 1991, matluka 23-6.
3 Exikolweni, ku ni minkhuvo ya ku dzunisa tiko ni tiholideyi ta misava. Xana ma swi tiva leswaku i tiholideyi tihi ta tiko ni ta vukhongeri leti seketeriwaka exikolweni xa ka n’wina? Loko ku va ni xiyimo lexi tlhontlhaka, xana mi nga va ni “moya wa ku olova, . . . leswaku lava sandzaka mahanyelo ya n’wina layo lulama ya xikriste, va ta khomiwa hi tingana”?—1 Pet. 3:16.
4 Mi nga ha ringiwa hi ntlhamu wa mintlangu ya xikolo kumbe swinkhubyana swa ku tihungasa. Mi fanele ku xalamukela ku tiva ndlela leyi swiendlo leswi swi vonakaka swi tsakisa swi nga mi endlaka mi landzula ripfumelo ra n’wina ha yona. Ku ni xilaveko xo hlawula vanghana lava mi nga tsakelaka ku “tiyisana swin’we,” un’wana ni un’wana a akiwa hi ripfumelo ra un’wana.—Rhom. 1:12.
5 Mi Nga Tiyisela, Hi Mpfuno Wa Yehovha: Sathana u tshama a ri karhi a ringa ripfumelo ra n’wina. Miringo leyi mi faneleke ku yi tiyisela yi nga ha vava, kambe hakelo yi endla leswaku yi va ya nkoka. (1 Pet. 1:6, 7) Mi nga ka mi nga swi koti ku tiyisela hi n’wexe; mi fanele ku langutela mpfuno wa Yehovha. Yesu u khutaze vadyondzisiwa vakwe: “Hitekani mi khongela, leswaku mi nga weli emiringweni.” (Mt. 26:41) Ku titshinya ni ku tikhoma i swa nkoka.—1 Kor. 9:27.
6 Nkarhi na nkarhi tsundzukani leswaku mi ta tihlamulela eka Yehovha malunghana ni mahanyelo ya n’wina. (Ekl. 11:9) Hambi loko leswi mi swi endlaka swi nga voniwi hi van’wana, Yehovha wa swi vona leswi mi swi endlaka naswona u ta mi avanyisa. (Hev. 4:13) Loko hi navela ku n’wi tsakisa hi mbilu hinkwayo hi fanele hi susumeteleka ku ‘tirhela ku ponisiwa ka hina hi ku chava ni ku rhurhumela.’ (Flp. 2:12) Ku hlaya Rito ra Xikwembu siku na siku swa pfuna swinene. Ri tele hi tindzayo letinene ni swikombiso swa kahle leswi hi nga swi tekelelaka.—Hev. 12:1-3.
7 Vatswari, mi endla xiphemu xa nkoka. Mi fanele ku langutela vana va n’wina, tivani swiphiqo leswi va langutanaka na swona, naswona mi va pfuna loko swi fanerile. Xana mi na byona vuxaka lebyinene ni vana va n’wina? Xana mi byale ku twisisa ni ku tlangela milawu ni misinya ya milawu ya Xikwembu eka vona? Loko va langutane ni ntshikilelo kumbe miringo, xana vana va n’wina va tiyile, kumbe va hela matimba hi ku olova? Xana va hela matimba hikwalaho ka leswi va faneleke ku va lava hambaneke ni tintangha ta vona? N’wina vatswari, mi ni vutihlamuleri byo va pfuna. (Det. 6:6, 7) Loko mi endla ntirho wa n’wina kahle, mi nga va pfuna leswaku va va vahluri enyimpini ya ripfumelo.—Swiv. 22:6.