Tshama U Tiyile eMoyeni, Tshama U Tengile eNtirhweni Wa Yehova
1 Eka Esaya 60:22 Yehova u endle xitshembiso lexi hetisekaka emahlweni ya hina: “Lontsongo u ta va khume ra madzana, lontsongo ngopfu, u ta va tiko lera matimba. Mina, Yehova, ndzi hatlisisa swilo leswi eminkarhini ya swona.” Loko hi ehleketa hi tiko, hi anakanya ntlawa lowukulu wa vanhu lava hlanganisiwaka hi xikongomelo xin’we, lava tirhaka ehansi ka vulawuri bya hulumendhe leyi vekiweke.
2 Xiviko xa ntirho wa nsimu xa 1991 xi kombe nhlohlorhi ya vahuweleri va mahungu lamanene va 4 278 820 emisaveni hinkwayo, ku engeteleka ka 6,5 wa tiphesente ku tlula n’wexemu. Hakunene Yehova u hlengelete ntshungu lowukulu wa vanhu lavanene lava navelaka ku tihambanisa ni mafambiselo lawa lama tshikelelaka leswaku va va vafumiwa vo tshembeka va hulumendhe ya Mfumo wa Vumesiya hi N’wana wakwe, Yesu Kriste. Lembe na lembe nhlayo ya lava hlengeletiweke yi hambeta yi andza. Ha tsaka leswi hi nga xiphemu xa tiko leri hi ku kongoma ri nga hlamuseriwaka tanihi vandla ra misava leyintshwa. Eka nkhuvo wa Xitsundzuxo wa 1991, nhlayo ya lava veke kona a ku ri 10 650 158, ku andza ka tiphesente ta 7 ku tlula hi 1990. Leswi swi kombisa ku koteka lokukulu ka leswaku lava engetelekeke leswaku va hi joyina tanihi vafumiwa va Mfumo.
3 Kavula, ha swi xiya leswaku a hi vanhu hinkwavo lava katsiweke eka nhlayo leyi nga laha henhla ya lava veke kona eXitsundzuxweni, lava tihambaniseke ni misava leyi, ku fikela eka mpimo lowu faneleke wa leswaku va amukeriwa tanihi vanhu va Yehova. Vanhu lava humaka ematikweni hinkwawo va ‘tlhandlukela endlwini ya Yehova,’ kambe va fanele va ‘dyondzisiwa tindlela ta yena’ hi xitalo leswaku va ta ‘famba emitileni ya yena.’ (Esa. 2:2-4) Ku tlula timiliyoni ta mune ta lava veke kona eXitsundzuxweni va amukele ndzetelo wa Xikwembu, va kuma matimba ya moya lama va susumeteleke ku tshama va tengile emahanyelweni ni ku fanelekela ku hlanganyela entirhweni wo chumayela wa Mfumo lowu sweswi wu hetisisiwaka. (Mat. 24:14) Lavo tano va na xiyimo lexinene emahlweni ka Yehova naswona va kuma mimpfuno ya malunghiselelo lawa a va endleleke wona. Xana nhlayo leyi saleke ya lava tlulaka timiliyoni ta tsevu yi fanele yi endla yini loko na yona yi lava ku tiya emoyeni ni ku tenga entirhweni wa Yehova?
4 Va fanele ku “lwela ripfumelo hi matimba.” (Yuda 3, NW) Loko va hlawula ku famba endleleni ya Yehova, va tshikileriwa hi Diyavulosi loyi a tirhisaka miringo ni minkucetelo yo biha. Ku fana na Pawulo, va fanele va languta eka Yehova leswaku va kuma matimba yo tiyisela. (Vafil. 4:13) Yehova u nyika lavo tano matimba hi ku tirhisa lava ana se va tiyeke eripfumelweni. Pawulo u tsundzuxe leswaku “hina lava hi nga ni matimba, hi fanele ku rhwala ku hluleka ka lava tsaneke.” (Varhoma 15:1, 2) Loko la tsaneke ni loyi a tiyeke va hlangana, ku va ni matimba yo yima va tiyile. “Vambirhi va tlula un’we. . . . Hambi un’wana a nga pfukela la nga swakwe ematimba, loko va ri vambirhi va nga n’wi hlula.”—Ekl. 4:9, 12.
5 Leswi swi vula leswaku lavantshwa va langute eka hina leswaku va kuma matimba lama humaka eka Yehova. Lava va nga Vakriste lava tinyiketeleke exikarhi ka hina va fanele ku titiyisa emoyeni loko va ta kota ku pfuna lavantshwa. Vakriste lava tiyeke va swi kota ku ‘avela tinyiko ta moya,’ leswi vangaka ku “tiyisana.” (Varhoma 1:11, 12) Leyi i yin’wana ya tindlela letikulu leti Yehova a ti tirhisaka leswaku a hi hlanganisa hinkwerhu ni ku hi ‘tiyisa.’—1 Pet. 5:9-11.
6 Hi fanele hi swi endla pakani ya hina ku pfuna vanhu lava lavantshwa loko hi nkarhi lowu fanaka hi tshama hi ri karhi hi khathalela swilaveko swa hina vini swa moya. (Mat. 5:3) Vumoya hi byona byi nyikaka matimba. Leyi i mfanelo leyi faneleke ku hlakuleriwa ni ku tiyisiwa hi ku dya swakudya swa moya nkarhi na nkarhi. Hi ku tirhisa nhlengeletano yakwe, Yehova u nyikela minongonoko leyi eneleke ya ku dyondza Rito rakwe. Minhlangano ya ntlhanu ya vhiki ya bandlha yi na xiphemu xa nkoka eku hi tiyiseni, ‘hi kombana rirhandzu ni mintirho leyinene.’—Vahev. 10:24.
7 Ku pfuna ka minhlangano leyi ka kula loko ku hlanganisiwa ni mikhuva leyinene ya dyondzo ya munhu hi xiyexe ni ya ndyangu. Hinkwerhu ka hina hi fanele hi swi endla mhaka leyi bohaka, ku hlaya ni ku kambisisa ndzimana ya siku na siku, ku fambisana ni nongonoko wa ku hlaya ka Bibele loku hleriweke eka Xiyimiso xa Xikolo xa Vutirheli bya le Tilweni, ni ku lunghiselela Dyondzo ya Buku ya Bandlha na Dyondzo ya Xihondzo xo Rindza. Ndyangu wun’wana ni wun’wana wu ta vona leswaku leswi swi ta hleriwa njhani, wu tiyiseka leswaku leswi swa endliwa minkarhi hinkwayo. Nakambe, nhloko ya ndyangu yi fanele ku vona leswaku nongonoko lowu wa dyondzo wu endliwa leswaku wu fikelela swilaveko swa ndyangu swa moya. Hi ndlela leyi “ndyangu wu ta akiwa . . . wu tiyisiwa.” (Swiv. 24:3, NW) Loko hi khathalela mikhuva ya hina yo dyondza hi munhu hi yexe na hi mindyangu, hi nga tiyiseka leswaku Yehova u ta hi katekisa naswona moya wa yena wu ta hi pfuna ku tiyisela miringo yo hambana-hambana hi laha ku humelelaka.—Yak. 1:2, 3; 1 Pet. 4:11.
8 Tshama U Tengile Naswona U Pfumala Xisandzu: Loko Yehova a hi rhamba leswaku hi tshinela eka yena, hi nkarhi lowu fanaka, u swi endla swi va erivaleni leswaku leswi swi endliwa exisekelweni xa ku kombisa ka hina ripfumelo engatini ya Yesu leyi halakeke, leyi ‘hi basisaka eka swidyoho hinkwaswo.’ (1 Yoh. 1:7; nakambe vona Vaheveru 9:14.) Hi nga hambeta hi tiyisa ripfumelo ra hina hi dyondzo ya munhu hi xiyexe ya Rito ra Xikwembu na hi ku tirhisa leswi hi swi dyondzeke. Sweswinyana van’wana va lahlekeriwa hikwalaho ko tsandzeka ku dya swakudya swa moya kumbe ku endla matshalatshala yo swi tirhisa evuton’wini bya vona. Leswi swi endla leswaku Sathana a va hlasela hi ku olova. Van’wana va tsanile emoyeni, swi endla ni leswaku va tshika ku hlanganyela. Lexi khomisaka gome, van’wana va wele exidyohweni lexikulu, leswi va vangeleke ku susiwa. Pawulo u tsundzuxile: “Loyi a anakanyaka leswaku wa ha yimile, a a tivonele leswaku a nga wi.” (1 Vakor. 10:12) Loko hi honisa dyondzo, ku va kona eminhlanganweni, ni le nsin’wini hi vomu, hi nga ha phasiwa hi ku olova hi minkucetelo ni miringo leyi nyameke.—Vahev. 2:1; 2 Pet. 2:20-22.
9 I swa nkoka leswaku hi tshama hi tengile etimhakeni hinkwato: emirini, emianakanyweni, emoyeni ni le mahanyelweni. (2 Vakor. 7:1) Misava leyi yi hi rhendzeleke yi ya yi homboloka ni ku onhaka siku rin’wana ni rin’wana. Diyavulosi u hambeta a tisa tindlela leti kanganyisaka swinene leswaku a hi phasa. Ku tshama hi tiyile emoyeni swi hi tiyisekisa leswaku a hi nge ma ‘honisi mano ya yena ivi hi phasiwa.’ (2 Vakor. 2:11) Swiletelo ni switsundzuxo leswi hi swi kumaka enhlengeletanweni ya Yehova swi hi endla hi kota ku vona ni ku ala minkucetelo yo biha.
10 Lava rhangelaka ebandlheni va ni vutihlamuleri byo veka xikombiso lexinene eka van’wana leswaku va tshama va tiyile ni ku tshama va tengile. Pawulo u kandziyise vutihlamuleri lebyi loko a te: “Anakanyani vafambisi va n’wina. . . . Ehleketani vutomi bya vona ni mahetelelo ya byona, mi landza ntila wa ku pfumela ka vona.” (Vahev. 13:7) I swa nkoka leswaku vakulu ni malandza ya vutirheli va va xikombiso hi mahanyelo ya vona hi voxe kun’we ni le ku khathaleleni ka vutihlamuleri bya vona tanihi tinhloko ta mindyangu. Va fanele va lwela ku fana na Timotiya lontsongo, la khutaziweke “[ku va xikombiso] hi mavulavulelo ni mahanyelo ya [y]ena, hi rirhandzu ni ku pfumela ni ku tenga.” (1 Tim. 4:12; 1 Pet. 5:3) Hinkwerhu ka hina hi ni vutihlamuleri lebyi byo va swikombiso leswinene hi ku hlayisa mahanyelo lama xiximekaka. Lavantshwa hakanyingi va vona ntiyiso kun’we ni nhlengeletano ya Yehova, hi leswi va swi vonaka eka hina. Hi lava ku tiyiseka leswaku leswi va swi vonaka swa va khutaza leswaku va tixaxameta ni nhlengeletano ya Yehova leyi tengeke.
11 Ku hlengeleteriwa ku pona “nhlomulo lowukulu” ku hambeta ku kula nkarhi hinkwawo. (Nhlav. 7:14) Hi lava ntsena va tiyaka emoyeni ni ku tshama va tengile lava nga ta pona eku heteleleni. Swi titshege ngopfu hi tinhla leti: (1) ku va ni mukhuva lowunene wa dyondzo ya munhu hi yexe ni ku anakanyisisa hi Rito ra Xikwembu; (2) ku kombisa ku tsakela ka munhu hi xiyexe eka van’wana hi ku navela ku va nyika xikhutazo; ni (3) ku tirha swin’we hi vun’we eku hlayiseni ka mahanyelo lama tengeke lama nga ta xixima vito ra Yehova. Ku endla leswi swi ta hi tiyisekisa leswaku hi ta kuma nkateko ni nsirhelelo wa Yehova loko misava leyi yi fika emakumu ya yona. Hi nga tiyiseka leswaku hi ta va exikarhi ka ‘lavo tshembeka lava Yehova a va hlayisaka.’—Ps. 31:23.