I Yini Leswi Hi Nga Ta Swi Endla Eka Lembe Leri Ra Ntirho?
1 Leswi ku sungulaka lembe ra ntirho ra 1994 hi September 1, i nkarhi lowunene sweswi eka hina hinkwerhu tanihi vanhu va Yehovha leswaku hi anakanya hi leswi hi lavaka ku swi endla hi ri swerhu ni tanihi nhlengeletano eka lembe leri ra ntirho.
2 Hambetani Mi Kula eMoyeni: Loko ha ha ku nghena entiyisweni, hi fanele hi navela ku tiya eripfumelweni. (Hev. 6:1-3) Loko se hi tiyile emoyeni, hi fanele ku pfuna lavantshwa ni van’wana hi tlhela hi khathalela vumoya bya hina, hi nga tshuki hi vona onge hi ni vutivi hinkwabyo lebyi lavekaka bya Bibele ni ntokoto lowu ringaneke evuton’wini bya Vukreste. Xana ha yi kambisisa ndzimana ya siku, hi fambisana ni nongonoko wa ku hlaya ka Bibele lowu andlariweke eka Xiyimiso xa Xikolo xa Vutirheli bya le Tilweni ni ku lunghiselela Dyondzo ya Buku ya Vandlha ni Dyondzo ya Xihondzo xo Rindza? Yoleyo ku fanele ku va pakani ya un’wana ni un’wana wa hina. Hi fanele hi hambeta hi kula emoyeni leswaku hi ta pona ndzoviso wa mafambiselo lawa ya swilo yo biha kutani hi nghena emisaveni leyintshwa ya Xikwembu.—Ringanisa Vafilipiya 3:12-16.
3 Tshamani Mi Basile eMoyeni: Leswaku hi amukeleka kahle emahlweni ka Yehovha, hi fanele hi tihlantswa “tšhyaka hikwaro ra mmiri ni ra moya.” (2 Kor. 7:1) Loko se hi basile, xana hi nga swi lavela yini ku tlhela hi ‘puluvundza endzhopeni’ wa misava leyi ya khale? (Ringanisa 2 Petro 2:22.) Hi fanele hi tiyimisela ku tshama hi tiyile, hi basile emoyeni. Kutani hi nga ka hi nga honisi marhengu ya Sathana ivi hi kanganyisiwa, hi wela exidyohweni ivi hi lahlekeriwa hi tintswalo ta Yehovha.—2 Kor. 2:11.
4 Yingisani Ndzayo Ya Vutlharhi: Swivuriso 15:22 (NW) yi ri: “Laha ku nga ni vatsundzuxi vo tala ku ni ku humelela.” Kambe, tsundzuka leswaku munhu loyi a nga vula marito wolawo, Solomoni, endzhaku ka nkarhi u pfumelele ‘vasati va yena va xisa mbilu yakwe yi landzela swikwembu swin’wana’ hikuva u hluleke ku yingisa ndzayo ya Xikwembu leswaku a nga teki vasati va matiko mambe. (1 Tih. 11:1-4) Kutani loko hi nga yingisi ndzayo ya vutlharhi, xana hi nga swi langutela ku humelela entirhweni wa Yehovha kumbe ku veka xikombiso lexi xi nga tekeleriwaka? (1 Tim. 4:15) Ndzayo ya Bibele yi ta hi pfuna ku hlayisa mbilu ya hina. (Swiv. 4:23) Ku rhandza leswi rhandziwaka hi Yehovha, hi venga leswi a swi vengaka, hi hamba hi lava ku kongomisiwa hi yena ni ku endla leswi n’wi tsakisaka i xisirhelelo xa ntiyiso.—Swiv. 8:13; Yoh. 8:29; Hev. 1:9.
5 Ku gandzela ka hina Yehovha a hi nchumu lowu tiendlekelaka, a hi xiyimo xa ku chava Xikwembu lexi fanaka ni xa lava tivulaka Vakreste emisaveni, kambe i xa moya, lexi tiyeke ni lexi hanyaka hi ku fambisana ni ntiyiso lowu kumekaka eRitweni ra Xikwembu.—Yoh. 4:23, 24.
6 Ku tiyimisela ka hina ku endla ku rhandza ka Xikwembu ku nga ha xungetiwa siku na siku. Hi fanele hi tiyisiwa hi ku tiva leswaku ‘nhlengeletano hinkwayo’ ya vamakwerhu yi langutane ni miringo leyi fanaka ni leswaku Yehovha hi yena loyi a hi tiyisaka. (1 Pet. 5:9, 10, ringanisa NW.) Xisweswo hi ta swi kota ku hetisisa vutirheli bya hina hi xitalo eka lembe ra ntirho ra 1994.—2 Tim. 4:5.