“Endlani Hinkwaswo Leswaku Mi Vangamisa Xikwembu”

LESWI hi nga malandza ya Xikwembu lama tinyiketeleke, hi fanele hi kombisa ku vangama ka Yehovha eka hinkwaswo leswi hi swi vulaka ni leswi hi swi endlaka. Muapostola Pawulo u hi nyike nawu lowu hi kongomisaka loko a tsala a ku: “Hambi mi dya kumbe mi nwa kumbe mi endla yini na yini, endlani hinkwaswo leswaku mi vangamisa Xikwembu.” (1 Kor. 10:31) Leswi swi katsa ku hanya hi milawu yo lulama ya Yehovha leyi kombisaka vumunhu byakwe lebyi hetisekeke. (Kol. 3:10) Hi fanele hi tekelela Xikwembu hi ku va vanhu lava kwetsimaka.—Efe. 5:1, 2.

² Loko muapostola Petro a tsundzuxa Vakreste leswaku va xiya xilaveko lexi, u tsale a ku: “Tanihi vana lava yingisaka, tshikani ku hanya hi ku ya hi ku navela loku a mi ri na kona eku sunguleni hi ku pfumala ka n’wina vutivi, kambe, hi ku landza Mukwetsimi loyi a mi vitaneke, kwetsimani na n’wina eku tikhomeni ka n’wina hinkwako, hikuva ku tsariwile: ‘Mi fanele mi kwetsima, hikuva mina ndza kwetsima.’” (1 Pet. 1:14-16) Ku fana ni le Israyele wa khale, hinkwavo evandlheni ra Vukreste va fanele va tshama va ri karhi va kwetsima. Leswi swi vula leswaku swi fanele ku tshama swi nga ri na xivati, swi nga ri na thyaka ra xidyoho ni ra moya wa misava. Hi ndlela yoleyo swi va swi kwetsimisiwile leswaku swi ta endla ntirho wo kwetsima.—Eks. 20:5.

³ Munhu u tshama a ri la kwetsimaka hi ku namarhela misinya ya milawu ya Yehovha, leyi nga erivaleni eMatsalweni yo Kwetsima. (2 Tim. 3:16) Loko hi ri karhi hi dyondza Bibele, hi dyondze hi Yehovha ni hi tindlela takwe kutani hi tshinela eka yena. Leswi hi swi dyondzeke eBibeleni swi hi khorwisile leswaku hi fanele hi lava Mfumo wa Xikwembu ku sungula nileswaku hi teka ku endla ku rhandza ka Yehovha ku va nchumu wa nkoka evuton’wini bya hina. (Mat. 6:33; Rhom. 12:2) Leswi swi lava leswaku hi ambala vumunhu lebyintshwa.—Efe. 4:22-24.

KU BASA EMOYENI NI LE MAHANYELWENI

⁴ Ku hanya hi ku pfumelelana ni milawu yo lulama ya Yehovha swi pfa swi tika minkarhi yin’wana. Nala wa hina, Sathana Diyavulosi u lava ku hi hambukisa entiyisweni. Minkucetelo yo homboloka ya misava leyi hi hanyaka eka yona ni mboyamelo wa hina wa ku dyoha swi endla leswaku minkarhi yin’wana swilo swi tika. Ku hanya hi ku pfumelelana ni ku tinyiketela ka hina swi lava leswaku hi lwa nyimpi ya moya. Matsalwa ma hi byela leswaku hi nga hlamali loko hi kanetiwa kumbe hi ringiwa. Hi ta xaniseka hikwalaho ka ku yimela ntiyiso. (2 Tim. 3:12) Hi fanele hi tsaka loko hi langutana ni miringo, hikuva ha swi tiva leswaku miringo yo tano i vumbhoni bya leswaku hi endla ku rhandza ka Xikwembu.—1 Pet. 3:14-16; 4:12, 14-16.

⁵ Hambileswi Yesu a a hetisekile, u dyondze ku yingisa eka swilo leswi a xanisekeke ha swona. A nga si tshama a pfumela ku hlula hi miringo ya Sathana kumbe a hlakulela ku navela ka misava. (Mat. 4:1-11; Yoh. 6:15) Yesu a nga si tshama a teriwa hi mianakanyo yo endla swo biha. Hambileswi ku tshembeka kakwe ku endleke leswaku a vengiwa hi misava, minkarhi hinkwayo a a namarhela milawu ya Yehovha leyi lulameke. Emahlweninyana ko va Yesu a fa, u tsundzuxe vadyondzisiwa vakwe leswaku misava a yi ta va venga na vona. Ku sukela hi nkarhi wolowo ku ya emahlweni, valandzeri va Yesu va langutane ni nhlomulo, kambe ku tiva leswaku N’wana wa Xikwembu u hlule misava swi va nyike xivindzi.—Yoh. 15:19; 16:33; 17:16.

⁶ Leswaku na hina hi nga vi xiphemu xa misava, hi fanele hi namarhela milawu ya Yehovha leyi lulameke, hilaha N’wini wa hina a endleke hakona. Hi fanele hi papalata ku katseka etimhakeni ta tipolitiki ta misava ni le ka matshalatshala ya yona yo antswisa mahanyelo ya vanhu, hi tlhela hi lwa ni moya lowu khutazaka mahanyelo yo biha. Hi fanele hi yi tekela enhlokweni ndzayo leyi kumekaka eka Yakobo 1:21, leyi nge: “Cukumetani thyaka hinkwaro ni nchumu lowu nga fanelangiki, ku nga vubihi, kutani mi ku amukela hi ku rhula ku nghenisiwa ka rito leri kotaka ku ponisa mimoya-xiviri ya n’wina.” Hi ku dyondza ni ku va kona etinhlengeletanweni ta vandlha, hi ‘nghenisa rito’ ra ntiyiso emianakanyweni ni le timbilwini ta hina naswona a hi nge tshuki hi navela leswi misava yi hi nyikaka swona ni siku ni rin’we. Mudyondzisiwa Yakobo u tsale a ku: “Xana a mi swi tivi leswaku ku va ni xinakulobye ni misava i vulala ni Xikwembu? Hikokwalaho, mani na mani la lavaka ku va nakulobye wa misava u tiendla nala wa Xikwembu.” (Yak. 4:4) Hikwalaho, Bibele yi hi laya hi matimba leswaku hi namarhela milawu yo lulama ya Yehovha nileswaku hi nga vi xiphemu xa misava.

⁷ Rito ra Xikwembu ra hi lemukisa leswaku hi nga hlanganyeli eka mahanyelo yo biha lama khomisaka tingana. Yi hi byela leswi: ‘Ku tikhoma loko biha ka rimbewu ni thyaka ra muxaka wun’wana ni wun’wana kumbe makwanga swi nga vuriwi hambi ku ri ku vuriwa exikarhi ka n’wina, hilaha swi fanelaka hakona vanhu lava kwetsimaka.’ (Efe. 5:3) Hikwalaho a hi fanelanga hi pfumelela mianakanyo ya hina yi dzika eka swilo leswi thyakeke, leswi khomisaka tingana kumbe leswi nga manyala naswona hi nga tshuki hi bula ha swona swi nga fanelanga. Hi ndlela yoleyo, hi kombisa leswaku hi lava ku namarhela milawu ya Yehovha leyi baseke ni leyi lulameke.

KU BASA EMIRINI

⁸ Handle ko basa emoyeni ni le mahanyelweni, Vakreste va swi tiva leswaku i swa nkoka ku va lava baseke emirini. Le Israyele wa khale, Xikwembu xo kwetsima a xi lava leswaku nxaxa wu tshama wu basile. Na hina hi fanele ku tshama hi basile leswaku Yehovha “a nga voni nchumu lowu nga tengangiki” eka hina.—Det. 23:14.

⁹ Ku kwetsima ni ku basa emirini swa fambisana swinene eBibeleni. Hi xikombiso, Pawulo u tsale a ku: “Varhandziwa, a hi tibasiseni eka swilo hinkwaswo leswi nyamisaka nyama ni moya, hi hetisekisa vukwetsimi hi ku chava Xikwembu.” (2 Kor. 7:1) Hikwalaho, vavanuna ni vavasati lava nga Vakreste va fanele va lwela ku tshama va basile emirini hi ku tshama va ri karhi va hlantswa swiambalo swa vona ni ku hlamba mimiri ya vona. Hambileswi swiyimo swi nga faniki hi ku ya hi matiko, hi ntolovelo ha swi kota ku kuma xisibi ni mati leswaku hi tshama hi basile emirini ni ku tiyiseka leswaku vana va hina va tshama va basile na vona.

¹⁰ Hikwalaho ka ntirho wa hina wo chumayela, hakanyingi ha tiveka emugangeni lowu hi tshamaka eka wona. Ku va hi hlayisa makaya ya hina ma basile ehandle ni le ndzeni, i ndlela yin’wana leyi hi va chumayelaka ha yona vanhu van’wana. Lowu i ntirho lowu ndyangu hinkwawo wu nga katsekaka eka wona. Vamakwerhu va xinuna va fanele va khathalela makaya ni majarata ya vona, va tsundzuka leswaku vanhu a va tshiki ku vulavula kahle hi jarata leri tshamaka ri basile. Loko va khathalela makaya ya vona swin’we ni ku rhangela eka swilo swa moya, swi kombisa leswaku va ungamela mindyangu ya vona hi ndlela leyinene. (1 Tim. 3:4, 12) Vamakwerhu va xisati na vona va ni vutihlamuleri byo khathalela swilo, ngopfu-ngopfu endzeni ka yindlu. (Tito 2:4, 5) Vana lava leteriweke kahle va hoxa xandla hi ku tshama va basile ni ku hlayisa makamara ya vona ma basile naswona ma languteka. Hi ndlela yoleyo, ndyangu hinkwawo wa khomisana leswaku wu hlakulela mikhuva leyinene ni xikombiso lexinene xa ku basa leswi nga ta endliwa emisaveni leyintshwa loko ku ta va ku fuma Mfumo wa Xikwembu.

¹¹ Vanhu vo tala va Yehovha namuntlha va tirhisa timovha loko va ya etinhlengeletanweni ta vandlha. Etindhawini tin’wana swa boha leswaku u famba hi movha ensin’wini. Xisweswo, movha wu fanele wu tshama wu basile naswona wu lunghisiwe kahle. Makaya ni timovha ta hina swi fanele swi kombisa leswaku hi vanhu va Yehovha lava baseke ni lava kwetsimaka. Nawu lowu wu tirha ni le ka tibege ta hina ta nsimu ni Tibibele ta hina.

¹² Ndlela leyi hi ambalaka ni ku tilunghisa ha yona swi fanele swi pfumelelana ni misinya ya milawu ya Xikwembu. A hi nge pfuki hi endzele vatirhela-mfumo lava dumeke hi ambale hi ndlela leyi nga xiximekiki. Swi le rivaleni leswaku hi fanele hi khathala swinene hi ndlela leyi hi langutekaka ha yona loko hi ri ensin’wini kumbe exitejini hikuva hi yimela Yehovha! Ku tilunghisa ni maambalelo ya hina swi nga endla leswaku vanhu va va ni langutelo lerinene kumbe ro biha hi vugandzeri bya Yehovha. Kunene, a hi fanelanga hi honisa ndlela leyi vanhu van’wana va titwaka ha yona. (Mik. 6:8; 1 Kor. 10:31-33; 1 Tim. 2:9, 10) Hikwalaho, loko hi lunghekela ku ya ensin’wini kumbe hi hlengeletana leswaku hi ta gandzela evandlheni, etinhlengeletanweni ta muganga kumbe etinhlengeletanweni ta xifundzha, hi fanele hi tsundzuka leswi Matsalwa ma swi vulaka hi ku basa emirini ni ku languteka hi ndlela leyi xiximekaka. Minkarhi hinkwayo hi lava ku dzunisa ni ku vangamisa Yehovha.

¹³ Nawu lowu fanaka wa ha tirha loko hi endzela ntsindza wa misava hinkwayo kumbe rhavi ra Timbhoni ta Yehovha. Tsundzuka leswaku vito leri nge Bethele ri vula “Yindlu ya Xikwembu.” Hikwalaho, hi fanele hi ambala ni ku tikhoma hi ndlela leyi a hi ta endla ha yona loko hi ya eHolweni ya Mfumo.

¹⁴ Hambiloko hi ri eku hungaseni, hi fanele hi yi tekela enhlokweni ndlela leyi hi ambalaka ni ku tilunghisa ha yona. Hi nga ha tivutisa, ‘Xana ndlela leyi ndzi ambaleke ha yona yi ta endla leswaku ndzi khomiwa hi tingana loko ndzi fanele ndzi chumayela hi xitshuketa?’

VUHUNGASI LEBYINENE

¹⁵ Ku wisa ni ku beriwa hi moya swi endla leswaku hi va ni rihanyo lerinene. Yesu u tshame a byela vadyondzisiwa vakwe leswaku va famba na yena endhawini leyi tumbeleke leswaku va ta “wisanyana.” (Mar. 6:31) Ku kuma nkarhi wo wisa ni vuhungasi lebyinene swi nga endla leswaku miehleketo ya hina yi phyuphya. Hi nga phyuphya, ivi endzhaku ka sweswo hi ya emahlweni ni ntirho wa hina lowu tolovelekeke.

¹⁶ Leswi ku nga ni swilo swo tala swo hungasa ha swona namuntlha, Vakreste va fanele va va ni vuxiyaxiya, va kombisa vutlhari bya Xikwembu eka leswi va swi endlaka. Hambileswi swi faneleke leswaku hi va ni nkarhi wo hungasa, kambe a hi fanelanga hi hanyela byona. Hi lemukisiwa leswaku “emasikwini yo hetelela” vanhu va ta va lava “rhandzaka mintsako ku ri ni ku rhandza Xikwembu.” (2 Tim. 3:1, 4) Swilo swo tala leswi vanhu va tihungasaka ha swona, a hi swinene eka lava navelaka ku hanya hi milawu ya Yehovha leyi lulameke.

¹⁷ Vakreste vo sungula a va fanele va lwisana ni mahanyelo yo biha ya vanhu lava a va hanya exikarhi ka vona, lava a va hlongorisa ntsako. Eka tisorokisi ta le Rhoma, vahlaleri a va hungasa hi ku hlalela vanhu loko va ri karhi va xanisiwa. Swilo leswi vanhu a va hungasa hi swona ngopfu a swi talele hi madzolonga, ku halata ngati ni ku tikhoma ko biha ka rimbewu, kambe Vakreste vo sungula a va papalata swilo swo tano. Namuntlha, swo tala swa swilo leswi vanhu va tihungasaka ha swona swi katsa swilo swo tano naswona hi swona leswi vanhu va swi lavaka. Hi fanele ku ‘tshama hi ri karhi hi languta’ ndlela leyi hi fambaka ha yona, hi fularhela vuhungasi lebyi onhaka mahanyelo lamanene. (Efe. 5:15, 16; Ps. 11:5) Hambiloko vuhungasi hi byoxe byi ri byinene, hakanyingi swilo leswi swi katsekaka eka byona swi nga endla leswaku byi nga amukeleki.—1 Pet. 4:1-4.

¹⁸ Ku ni tindlela tin’wana leti Vakreste va nga hungasaka ha tona leswaku va phyuphyisa miehleketo ya vona. Vo tala va vuyeriwile hi ku tirhisa ndzayo ya Matsalwa ni swiringanyeto leswinene leswi kumekaka eminkandziyisweni ya hina.

¹⁹ Minkarhi yin’wana mindyangu yo hlayanyana yi nga rhambiwa ekaya ra Mukreste-kulobye leswaku yi ta tiphina hi xinakulobye. Kumbe, vamakwerhu va nga ha rhambiwa enkhubyeni wa vukati kumbe enkhubyeni wo karhi lowu fanaka na wona. (Yoh. 2:2) Lava va endzeriweke va fanele va byarha vutihlamuleri bya leswi endlekaka. Swi le rivaleni leswaku munhu u fanele a tshama a pfule mahlo loko ku ri ni vanhu vo tala enkhubyeni. Ntshunxeko lowu vaka kona eminkhubyeni yo tano wu endle leswaku van’wana va rivala leswaku i Vakreste, kutani va dya va tlhela va nwa ku tlula mpimo, van’wana va kala va wela eswidyohweni leswikulu. Hikwalaho ka sweswo, Vakreste lava wupfeke a va rhambi vanhu vo tala ngopfu naswona a va heti nkarhi wo leha ngopfu eminkhubyeni yo tano. Loko ko tshuka ku va ni byala, lava nwaka va fanele va nwa va ringanisela. (Filp. 4:5) Loko ku endliwa matshalatshala hinkwawo leswaku swinkhubyana swa Vakreste swi va leswinene naswona swi phyuphyisa emoyeni, vanhu a va nge ehleketi ngopfu hi swakudya ni swakunwa.

²⁰ I swinene ku va ni malwandla. (1 Pet. 4:9) Loko hi rhamba Vakreste van’wana emakaya ya hina leswaku va ta dya, va phyuphya ni ku va ni xinakulobye, hi nga rivali lava nga evuswetini. (Luka 14:12-14) Loko hi rhambiwe eminkhubyeni yo tano, ndlela leyi hi tikhomaka ha yona yi fanele yi pfumelelana ni ndzayo leyi kumekaka eka Marka 12:31. Minkarhi hinkwayo i swinene ku nkhensa tintswalo leti van’wana va hi kombeke tona.

²¹ Vakreste va tiphina hi tinyiko to tala leti humaka eka Xikwembu naswona va swi tiva leswaku va nga ‘dya, kunene va nwa, va kuma leswinene entirhweni wa vona hinkwawo wa matimba.’ (Ekl. 3:12, 13) Loko hi ‘endla hinkwaswo leswaku hi vangamisa Xikwembu,’ lava rhambaka van’wana swin’we ni lava rhambiweke va nga ha tsundzuka swinkhubyana swo titsakisa leswi va tshameke va rhambiwa eka swona kutani va titwa va enerisekile hileswi va phyuphyisiweke emoyeni.

MINTIRHO YA XIKOLO

²² Vana va Timbhoni ta Yehovha va vuyeriwa hi dyondzo ya misava leyi n’wana un’wana ni un’wana a faneleke a yi kuma. Loko va ya exikolweni, va lava ku dyondza ku hlaya ni ku tsala kahle. Tidyondzo tin’wana leti dyondzisiwaka eswikolweni, ta va pfuna vana loko va lava ku tivekela tipakani ta moya. Loko va ha ri exikolweni, va lava ku endla hinkwaswo leswi va nga swi kotaka leswaku va ‘tsundzuka Mutumbuluxi wa vona’ hi ku rhangisa swilo swa moya.—Ekl. 12:1.

²³ Loko u ri muntshwa la nga Mukreste naswona wa ha nghena xikolo, tivonele leswaku u nga ti hlanganisi ni vantshwa va misava swi nga fanelanga. (2 Tim. 3:1, 2) Leswi Yehovha a hi nyikeke nsirhelelo lowu hi wu lavaka, ku ni swo tala leswi u nga swi endlaka leswaku u papalata nkucetelo wa misava. (Ps. 23:4; 91:1, 2) Kutani leswaku u sirheleleka, tirhisa malunghiselelo ya Yehovha.—Ps. 23:5.

²⁴ Leswaku vantshwa lava nga Timbhoni va tshama va hambanile ni misava loko va ri exikolweni, va hlawula ku nga hlanganyeli emintirhweni leyi endliwaka loko xikolo xi humile. Swi nga ha endleka leswaku vadyondzi-kulobye kumbe vadyondzisi swi va tikela ku swi twisisa. Hambiswiritano, nchumu wa nkoka i ku tsakisa Xikwembu. Leswi swi vula leswaku u fanele u yingisa ripfalo ra wena leri leteriweke hi Bibele, kutani u yima u tiyile u nga hlanganyeli emimphikizanweni ya misava kumbe eka mikhuva leyi seketelaka tiko. (Gal. 5:19, 26) Hi ku yingisa ndzayo ya Matsalwa leyi humaka eka vatswari lava chavaka Xikwembu ni ku vuyeriwa eka vunakulobye lebyinene ni ndzetelo lowu humaka evandlheni, n’wina vantshwa mi nga swi kota ku namarhela milawu yo lulama ya Yehovha.

NTIRHO WA KU TIHANYISA NI VANGHANA

²⁵ Tinhloko ta mindyangu ti ni vutihlamuleri bya Matsalwa bya ku wundla mindyangu ya tona. (1 Tim. 5:8) Hambiswiritano, leswi va nga vachumayeri va mahungu lamanene, va swi xiya leswaku ntirho wa ku tihanyisa a wu fanelanga wu rhangela mintirho ya Mfumo. (Mat. 6:33; Rhom. 11:13) Hi ku hanya hi ku tinyiketela eka Xikwembu ni hi ku eneriseka hi swakudya ni swiambalo, va papalata ku vilela ni ku phasiwa hi moya wo rhandza rifuwo.—1 Tim. 6:6-10.

²⁶ Vakreste hinkwavo lava tinyiketeleke lava tirhaka ntirho wo tihanyisa va fanele va anakanya hi misinya ya milawu ya Matsalwa. Ku hanya hi ndlela yo tshembeka swi vula leswaku a hi fanelanga hi endla mintirho leyi lwisanaka ni nawu wa Xikwembu kumbe leyi lwisanaka ni nawu wa tiko. (Rhom. 13:1, 2; 1 Kor. 6:9, 10) Hi fanele hi tshama hi ri karhi hi anakanya hi makhombo lama vangiwaka hi ku tihlanganisa ni vanghana vo biha. Tanihi leswi hi nga masocha ya Kreste, hi papalata ku hlanganyela emabindzwini lama lwisanaka ni milawu ya Vukreste, ku hlanganyela eka swa tipolitiki kumbe eka swilo leswi nga vekaka vumoya bya hina ekhombyeni. (Esa. 2:4; 2 Tim. 2:4) Nakambe a hi tihlanganisi nikatsongo ni vukhongeri lebyi Xikwembu xi nga byi rhandziki, ku nga “Babilona Lonkulu.”—Nhlav. 18:2, 4; 2 Kor. 6:14-17.

²⁷ Ku hanya hi ku pfumelelana ni milawu yo lulama ya Xikwembu swi ta hi sivela ku lava ku tirhisa tinhlengeletano ta Vukreste leswaku hi yisa mabindzu ya hina emahlweni kumbe swilo swin’wana swa hina vini. Xikongomelo-nkulu xa ku hlengeletana ka hina ni Vakreste-kulorhi etinhlengeletanweni ta vandlha, etinhlengeletanweni ta muganga ni le tinhlengeletanweni ta xifundzha, i ku gandzela Yehovha. Hi wundliwa etafuleni rakwe ra moya ni ku tiphina hi ku “khutazana.” (Rhom. 1:11, 12; Hev. 10:24, 25) Tinhlengeletano to tano ti fanele ti dzika eka swilo swa moya.

KU VA NI VUN’WE TANIHI VAKRESTE

²⁸ Milawu yo lulama leyi Yehovha a yi vekeleke vanhu vakwe yi lava leswaku nakambe va “hlayisa vun’we bya moya exibohweni lexi hlanganisaka xa ku rhula.” (Efe. 4:1-3) Un’wana ni un’wana a nga fanelanga a lava ku titsakisa a ri yexe kambe u fanele a navelela van’wana leswinene. (1 Tes. 5:15) A swi kanakanisi leswaku hi swona leswi u swi xiyeke evandlheni ra ka n’wina. Hinkwerhu hi kongomisiwa hi milawu leyi fanaka yo lulama ku nga khathariseki leswaku hi va rixaka rihi, tiko rihi, hi vanhu va njhani, hi fuwile kumbe hi swisiwana kumbe hi dyondzeke ku fikela kwihi. Hambi ku ri vanhu va misava va ti xiyile timfanelo leti letinene ngopfu ta vanhu va Yehovha.—1 Pet. 2:12.

²⁹ Loko muapostola Pawulo a ya emahlweni a kandziyisa mhaka ya vun’we u te: “Ku ni miri wun’we, ni moya wun’we, tanihi leswi mi vitaniweke eka ntshembo wun’we lowu mi vitaneriweke eka wona; Hosi i yin’we, ripfumelo i rin’we, nkhuvulo i wun’we; Xikwembu i xin’we ni Tata wa vanhu hinkwavo, loyi a nga ehenhla ka hinkwavo ni le xikarhi ka hinkwavo ni le ka hinkwavo.” (Efe. 4:4-6) Sweswo swi kombisa ndlela leyi swi nga swa nkoka ha yona ku twisisa tidyondzo ta xisekelo ta Bibele swin’we ni dyondzo leyi dzikeke ya Bibele leswaku u tiva vuhosi bya Yehovha. Entiyisweni, Yehovha u nyike vanhu vakwe ririmi leri tengeke ra ntiyiso, leri va pfunaka leswaku va n’wi tirhela hi mbilu yin’we.—Sof. 3:9.

³⁰ Vun’we ni ku rhula loku nga kona evandlheni ra Vukreste namuntlha ku phyuphyisa hinkwavo lava gandzelaka Yehovha. Hi ku vonile ku hetiseka ka xitshembiso xa Yehovha lexi nge: “Ndzi ta va veka hi vun’we, kukota ntlhambi etshangeni.” (Mik. 2:12) Hi lava ku tshama hi ri ni vun’we byebyo lebyi kondletelaka ku rhula hi ku namarhela milawu yo lulama ya Yehovha.

³¹ Va tsaka lava amukeriweke evandlheni ra Yehovha leri tengeke! Ku vitaniwa hi vito ra Yehovha i lunghelo leri tlulaka xin’wana ni xin’wana lexi hi nga lahlekeriwaka hi xona leswaku hi vitaniwa ha rona. Loko hi ri karhi hi hlayisa vuxaka bya hina bya risima na Yehovha, hi ta lwela ku hisekela ku hanya hi milawu yakwe yo lulama naswona hi ta khutaza van’wana leswaku na vona va hanya hi ku pfumelelana na yona.—2 Kor. 3:18.