Ku Va Kona eMinhlanganweni Nkarhi Hinkwawo—I Swa Nkoka Leswaku Hi Ta Yima Hi Tiyile
1 Muapostola Pawulo u hi khutaza leswaku hi tshama hi ri “ni ku pfumela loku hanyaka.” (Tito 1:9, 13) Eminhlanganweni ya vandlha hi dyondzisiwa leswi tengeke naswona hi leteriwa ndlela yo va hi tshama hi havaxele matlhari hinkwawo ya moya leswaku hi “kota ku yima [hi] lwa ni mano layo biha ya Diyavulosi.”—Ef. 6:11; Flp. 4:8.
2 Minhlangano Yi Hi Nyika Leswi Hi Swi Lavaka: Ku va kona eminhlanganweni ya vandlha nkarhi hinkwawo i swa nkoka leswaku hi ta yima hi tiyile. (1 Kor. 16:13) Eminhlanganweni ku endliwa swikhongelo swo nkhensa ni swo dzunisa Xikwembu, kun’we ni swikombelo leswi endliwaka hikwalaho ka swilaveko swa vandlha. (Flp. 4:6, 7) Ku hlanganyela eka tinsimu ta Mfumo swa hi khutaza ni ku hi endla hi kota ku phofula marito ya hina ni ndlela leyi hi titwaka ha yona ni mintlhaveko ya hina loko hi ri karhi hi gandzela Yehovha. (Ef. 5:19, 20) Xinakulobye xa hina eHolweni ya Mfumo emahlweni ni le ndzhaku ka minhlangano xa hi khutaza, xa hi aka ni ku hi phyuphyisa.—1 Tes. 5:11.
3 Hi April leyi nga hundza nkulumo yo hlawuleka leyi nge, “Makumu Ya Vukhongeri Bya Mavunwa Ma Tshinele,” emianakanyweni ya varhandzi va ntiyiso yi kandziyise ku teka goza ra xihatla va huma eka Babilona Lonkulu. (Nhlav. 18:4) Hi June na July, vona ndlela leyi a swi nyanyula ha yona ku hlaya swihloko swinharhu swa dyondzo ya Xihondzo xo Rindza mayelana ni miseve ya ku vonakala leyi voningeke ndlela ya lavo lulama! (Swiv. 4:18) Anakanya hi leswi a hi ta va hi swi kayerile loko a hi lo honisa ku va kona eminhlanganweni yoleyo.
4 Eka tluka 72 ra Ku Hleleriwa Ku Hetisisa Vutirheli Bya Hina ku hlamuseriwa leswaku Xikolo xa Vutirheli bya le Tilweni i lunghiselelo ra dyondzo leyi hambetaka ya vandlha hinkwaro. Sweswi xiyenge xin’wana xa nongonoko xi hi pfuna leswaku hi tolovelana ku antswa ni matimu ya manguva lawa ya nhlengeletano hi ku tirhisa buku leyi nge Vahuweleri. A hi nge swi koti ku kayela dyondzo leyi.
5 Nhlangano wa hina wa Ntirho wu hi hlomisela ku va lava humelelaka swinene evutirhelini. Leswi swi kombisiwe hi nhlangano lowu eka wona hi kumeke swiletelo swa ku hlanganyela eku hangalaseni ka Kingdom News No. 34. Mikateko ya Yehovha entirhweni lowu a yi tele, hi laha swi voniweke ha kona eka vuyelo bya kona emisaveni hinkwayo. (Ringanisa 2 Vakorinto 9:6, 7.) Lava vaka kona eminhlanganweni nkarhi hinkwawo va khutaziwile, naswona va pfunile hi ku seketela tsima.
6 EDyondzweni ya Buku ya Vandlha, langutelo ra hina hi swilo swa xihatla ra engeteleka hi swilo leswi hi swi dyondzaka eRitweni ra Xikwembu hi ku pfuniwa hi buku leyi nge Ku Chaputa Ka Nhlavutelo. Leswi swiendlakalo swi humelelaka hi ku hatlisa emisaveni, hi fanele ku twisisa ku hetiseka ka vuprofeta lebyo enta bya Nhlavutelo.
7 Rhangisa Ku Va Kona eMinhlanganweni Nkarhi Hinkwawo: Ematikweni yo tala laha vamakwerhu va xanisiwaka, va ha tama va wu vona nkoka wa ku va va hlangana vhiki na vhiki. Hi xikombiso, eBurundi, Rwanda, Liberia, ni le Bosnia na Herzegovina, vanhu vo tala lavantshwa va va kona eminhlanganweni lerova va tlula nhlayo ya vahuweleri kambirhi kumbe kanharhu. Hi ndlela leyi Yehovha u pfuna vamakwerhu ku yima va tiyile va ri ni moya wun’we.—Flp. 1:27; Hev. 10:23-25.
8 Mani na mani loyi a nga ha vaka a honise ku va kona eminhlanganweni nkarhi hinkwawo u fanele a teka goza sweswi leswaku a lulamisa mukhuva lowu. (Ekl. 4:9-12) Leswaku hi yima hi tiyile, hi fanele hi khutazana ni lava wupfeke, lava hi nga va kumaka loko hi va kona eminhlanganweni nkarhi hinkwawo.—Rhom. 1:11.