Ku Tshembeka Ka Vuyerisa
1 Eka Vaheveru 11:6 hi byeriwa leswaku Xikwembu “xi hakela lava va xi lavaka.” Ndlela yin’wana leyi xi hakelaka malandza ya xona lama tinyiketeleke lama ‘tshembekeke eswilweni swi nga ri swingani’ i ku ma veka ku va ‘valanguteri va leswo tala.’ (Mt. 25:23) Hi marito man’wana, hakanyingi Yehovha u hakela ntirho lowunene hi ku nyika timbhoni takwe leti tshembekaka malunghelo lama engetelekeke ya ntirho.
2 Ku tshembeka ka muapostola Pawulo ku hakeriwe hi ku averiwa ka yena evutirhelini lebyi n’wi yiseke emitini ni le swimitanini swa le Yuropa ni le Asia Minor. (1 Tim. 1:12) Hambileswi a ku laveka matshalatshala lamakulu leswaku a hetisisa vutirheli byakwe hi xitalo, Pawulo u ri tlangele swinene lunghelo leri a ri kumeke. (Rhom. 11:13; Kol. 1:25) U kombise ku tlangela kakwe loku humaka embilwini hi ku lavisisa tindlela to chumayela. Hi ku tirha hi ku hiseka, ripfumelo rakwe u ri kombise kahle hi mintirho ya yena. Xikombiso xakwe xi hi susumetela ku tlangela malunghelo ya hina ya ntirho.
3 Yehovha U Hi Nyike Vutirheli: Xana hi ri kombisa njhani langutelo leri fanaka ra ntirho leri Pawulo a ri kombiseke? Hi lava tindlela ta ku engetela ku hlanganyela ka hina evutirhelini. Hi tirhisa nkarhi wihi na wihi leswaku hi nyikela vumbhoni hi xitshuketa ni hi yindlu na yindlu. Hi tlhelela eka vanhu hinkwavo lava hi nga va kumangiki emakaya ni ku endla maendzo yo vuyela eka hinkwavo lava tsakelaka. Naswona hi hlayisa switshembiso leswi hi swi endlaka swa ku fambisa tidyondzo ta le kaya ta Bibele.
4 Malunghana ni vutirheli bya hina, Pawulo u tsundzuxile: ‘U swi endla hi xihatla.’ (2 Tim. 4:2) Nchumu lowu nga wa xihatla wu lava ku hatliseriwa. Xana hi ya evutirhelini bya hina hi ri ni langutelo ra xihatla, hi byi rhangisa evuton’wini bya hina? Hi xikombiso, a hi nge yi pfumeleli mintirho ya ku tihungasa ni ku hlongorisa swilo swa munhu hi xiyexe hi mahelo-vhiki swi kavanyeta nkarhi wa hina lowu hi faneleke hi wu tirhisela vutirheli bya nsimu. Tanihi leswi hi tiyisekaka leswaku makumu ya fambiselo leri ma tshinela hi xihatla, hi tlhela hi khorwiseka leswaku ntirho wa nkoka swinene lowu hi nga wu endlaka i ku chumayela mahungu lamanene ya Mfumo.
5 Ku tshembeka ka hina eka Xikwembu swi kombisiwa hi ku va hi ri ni ntiyiso ni ku tshembeka hilaha ku tiyeke eka xona ni ku hambeta ni ntirho lowu xi hi aveleke wona. A hi hetisiseni vutirheli bya hina hi xitalo, leswaku Yehovha a ta hakela vutshembeki bya hina hi ndlela leyikulu.