A Hi Tiyimiseleni Ku Hisekela Ntirho Wa Hina Wo Chumayela
1 Muapostola Pawulo u tsundzuxe Vakreste leswaku va famba endleleni ya Xikwembu naswona va ‘hambeta va swi endla hi xitalo swinene.’ (1 Tes. 4:1) Xana leswi swi vula yini eka hina? Mhaka ya nkoka hileswaku hi fanele ku hambeta hi lava tindlela leti hi nga yi hisekelaka ha yona mintirho ya swa moya, minkarhi hinkwayo hi lwela ku “hetisisa [ntirho wa hina wo chumayela] hi xitalo.”—2 Tim. 4:5.
2 Lexi Faneleke Xi Hi Susumeta: Ku navela ku tirhela Muvumbi wa hina hilaha ku heleleke ku fanele ku hi susumeta leswaku hi tiyimisela ku hisekela ntirho wa hina wo chumayela. Hi lava ku kula hi tlhelo ra moya naswona hi antswisa ndlela leyi hi chumayelaka ha yona. Loko hi ri ni xiyimiso lexinene naswona hi susumetiwa hi mbilu leyinene, hi ta kota ku fikelela tipakani leti hi tivekeleke tona entirhweni wa Xikwembu.—Ps. 1:1, 2; Filp. 4:6; Hev. 10:24, 25.
3 Leswaku hi kota ku andzisa ntirho wa hina wo chumayela, hi fanele hi hlakulela ku va lava hananaka ni ku rhangisa swilaveko swa van’wana. Sweswo hi nga swi endla hi ku xi anakanyisisa hi xikhongelo xikombiso lexinene xa Yesu. (Mat. 20:28) Loko Yesu a ha ri laha misaveni a a swi tsakela ngopfu ku pfuna van’wana. (Mint. 20:35) Hi nga tekelela xikombiso xa yena hi ku tsakela vanhu ni ku tshama hi lunghekele ku vulavurisana na vona loko hi ri ensin’wini.—Esa. 6:8.
4 Ntirho Wa Vatswari: Vana va nga dyondzisiwa ku sukela evutsongwaneni bya vona ku navela ku pfuna van’wana ni ku andzisa ntirho wa vona wo chumayela. Vana va ta xiya ku hiseka ka swirho swa ndyangu wa ka vona ni ndlela leyi swi hlanganyelaka ha yona hi xitalo eku andziseni ka ntirho wa swona wo chumayela. Makwerhu un’wana loko a ha ri mufana, u susumeteleke ku va la hisekaka hikwalaho ko tirha ni kokwa wa yena wa xinuna emintirhweni ya vandlha. Loko a vona ndlela leyi kokwa wa yena a a hiseka ha yona nileswi a a tsakile, u susumeteleke ku lava ku pfuna vamakwavo va moya. Sweswi i nandza wa vutirheli.
5 Ku Laveka Vavanuna: “Loko munhu un’wana ni un’wana a lwela ku fikelela ntirho . . . , u navela ntirho lowunene.” (1 Tim. 3:1) Marito lawa ma khutaza vamakwerhu va xinuna leswaku va faneleka ku kuma malunghelo lama engetelekeke enhlengeletanweni ya Yehovha. Leswi a swi kali swi lava leswaku munhu a va ni vutshila byo hlawuleka kumbe vuswikoti byo karhi byo hlawuleka. Makwerhu la lavaka ku faneleka u fanele a lava Mfumo ku sungula naswona a hisekela ntirho wo chumayela. (Mat. 6:33; 2 Tim. 4:5) U ta lwela ku va xikombiso lexinene eka van’wana.
6 EMisaveni Hinkwayo: Yehovha u hatlisisa ntirho wa ntshovelo. (Esa. 60:22) Ku ni xilaveko xa xihatla xa leswaku hinkwavo lava landzelaka xikombiso xa Yesu va hiseka swinene entirhweni wa vona wo chumayela. Xiviko xa misava hinkwayo xa lembe ra ntirho ra 2006 xi kombisa leswaku ku khuvuriwe vanhu va 248 327. Sweswo swi vula leswaku hi xiringaniso, ku khuvuriwa vanhu va 680 hi siku! Onge hinkwerhu hi nga hambeta hi lava tindlela to hiseka entirhweni wa hina wo chumayela.