Tindlela To Engetela Vutirheli Bya Wena
1 Emalembeni yo tlula 40 lama hundzeke, xihloko lexi nge “Xana Leswinene U Swi Endlaka Swi Ringene?” a xi ri eka Xihondzo xo Rindza (xa Xinghezi) xa January 15, 1955. Xi yi kombise kahle ndlela leyi swi nga kotekaka ha yona leswaku vanhu va Yehovha va antswisa vutirheli bya vona hi ku hlanganyela hi xitalo entirhweni wa Mfumo. Xitsundzuxo lexi lexinene xa tirha ni namuntlha, tanihi leswi hi hambetaka hi antswisa vutirheli bya hina.
2 Entirhweni wa hina hinkwawo hi fanele hi susumetiwa hi xileriso lexi lexikulu: “U fanele u rhandza Yehovha Xikwembu xa wena hi mbilu ya wena hinkwayo ni hi moya-xiviri wa wena hinkwawo ni hi mianakanyo ya wena hinkwayo ni hi ntamu wa wena hinkwawo.” (Mar. 12:30) Hi kombisa rirhandzu ra hina leri heleleke eka Yehovha hi ku tirhisa minkarhi leyi yi hi pfulekeleke hi xitalo leswaku hi yisa ntirho wa yena wa Mfumo emahlweni. Anakanya hi tindlela leti landzelaka leti u nga engetelaka vutirheli bya wena ha tona.
3 Byarha Vutihlamuleri Bya Wena: Vamakwerhu va xinuna lava tinyiketeleke va nga ha tikarhatela ku fanelekela ku va malandza ya vutirheli ivi va endla nhluvuko leswaku va ta va vakulu. Xihloko lexi nge “Xana Wa Wu Endla Nhluvuko?” ni lexi nge “Xana Wa Fanelekela Ku Tirhela?,” leswi nga enkandziyisweni wa Xihondzo xo Rindza xa September 1, 1990, swi khutaze vamakwerhu vo tala va xinuna leswaku va fanelekela ku byarha vutihlamuleri evandlheni. Kombela vakulu va vandlha ra ka n’wina leswaku va ku nyika swiringanyeto malunghana ni ndlela yo endla nhluvuko kun’we ni ku faneleka.
4 Vakulu ni malandza ya vutirheli lava nga tekangiki va khutaziwa leswaku va anakanyisisa swinene hi ku endla swikombelo swo ya eXikolweni xa Ndzetelo wa Vutirheli. Xikolo lexi u nga xi twisisa ku antswa hi ku hlaya swihloko leswi vulavulaka ha xona ehansi ka xihloko lexi nge “Ministerial Training School” eka Ti-Watch Tower Publications Index ta 1986-1995, 1996 na 1997. Xana wa swi vona leswaku ‘nyangwa leyikulu’ yi ku pfulekerile? (1 Kor. 16:9a) Vamakwerhu vo tala lava tshameke va nghena hi nyangwa lowu a va nga anakanyi hi malunghelo ya ntirho lama kumekaka endzhaku ka ku thwasa ka vona. Namuntlha va tiphina hi ku tirha eBethele kumbe hi ku tirha ensin’wini tanihi maphayona yo hlawuleka, varhumiwa kumbe va ri valanguteri va swifundzha.
5 Tikarhatele Ku Fanelekela Ntirho Wa Nkarhi Hinkwawo: Vantshwa lava pasaka exikolweni xa le henhla, vamanana va mindyangu, ni un’wana ni un’wana la wiseke entirhweni wa ku tihanyisa, va fanele va anakanyisisa swinene hi ku nghenela vuphayona. Hlaya xiengetelo xa Vutirheli Bya Hina Bya Mfumo bya July 1998, ivi u burisana ni maphayona lawa swiyimo swa wona a swi fana ni leswi u langutaneke na swona. Kumbexana u nga swi navela ku engetela vutirheli bya wena hi ku nghenela vutirheli bya vuphayona, hilaha va endlaka hakona. (1 Kor. 11:1) Xana u nga swi kota ku engetela vutirheli bya wena hi ku vika 70 wa tiawara hi n’hweti ivi xisweswo u va phayona ra nkarhi hinkwawo?
6 Vamakwerhu lava tlulaka 17 000, va tirha etihofisini ta marhavi ni le mindyangwini ya Bethele emisaveni hinkwayo. Vutirheli Bya Hina Bya Mfumo bya March 1995, byi hlamusela leswi u nga swi endlaka loko u lava ku endla xikombelo xa ntirho lowu. Ha yini u nga hlayi rungula leri nga eka xiengetelo xolexo kutani u kambisisa loko u ta va un’wana wa lava nga ta fanelekela lunghelo leri ro hlawuleka ra ntirho wa Bethele?
7 Tirha Laha Ku Nga Ni Xilaveko: Xana u tshama endhawini leyi nsimu ya kona yi tirhiwaka nkarhi na nkarhi kumbe laha ku nga ni vamakwerhu vo tala lava nga endlaka ntirho lowu? Xana u tshame u anakanya hi ku engetela vutirheli bya wena hi ku ya laha ku nga ni xilaveko lexikulu? Kumbexana u nga rhurhela endhawini ya le matiko-xikaya laha ku lavekaka vatirhi vo tala. (Mat. 9:37, 38) Leswi a swi fanelanga swi endliwa hi matlotlo. I mhaka leyi lavaka ku endliwa hi xikhongelo. (Luka 14:28-30) Burisana ni vakulu ni mulanguteri wa xifundzha malunghana ni xiyimo xa wena. Va ta burisana na wena mi vona loko ku ri goza ra vutlharhi leswaku u rhurhela kun’wana sweswi kumbe u tilulamisela ku rhurha enkarhini lowu taka. Loko u anakanya ku tsalela Sosayiti leswaku u kuma swiringanyeto malunghana ni ndhawu leyi u nga rhurhelaka eka yona, papila ra wena ri fanele ri rhumeriwa swin’we ni papila leri sayiniweke hi Komiti ya Ntirho ya Vandlha ra ka n’wina.
8 Antswisa Ntikelo Wa Ntirho Wa Wena: Entiyisweni hinkwerhu hi nga hlanganyela hi xitalo evutirhelini hi ku antswisa ntikelo wa ntirho wa hina wa nsimu. Xana wa hlanganyela eka swiyenge hinkwaswo swa ntirho, ku katsa ni ntirho wa yindlu na yindlu ni ku nyikela vumbhoni hi xitshuketa swin’we ni ntirho wa maendzo yo vuyela kun’we ni ntirho wa ku fambisa dyondzo ya Bibele? Loko u fambisa dyondzo, xana u nga antswisa vuswikoti bya wena byo dyondzisa? I swinene ku va u pfuxeta xiengetelo xa June 1996 xa Vutirheli Bya Hina Bya Mfumo leswaku u kuma swiringanyeto leswi nga ta ku pfuna ku khutaza swichudeni swa wena leswaku swi tinyiketela kun’we ni ku khuvuriwa.
9 Tindlela tin’wana leti andlariweke hi vuenti ta ku engetela vutirheli bya hina ti kumeka eka ndzima 9 ya buku leyi nge Ku Hleleriwa Ku Hetisisa Vutirheli Bya Hina. Entiyisweni, hinkwerhu ka hina hi fanele hi navela ku endla swo tala hilaha hi nga kotaka hakona entirhweni wa Xikwembu. Ha yini u nga anakanyisisi hi vukheta malunghana ni tipakani ta wena ta moya? Endla hilaha 1 Timotiya 4:15 yi khutazaka hakona: “Anakanyisisa hi swilo leswi; u dzika eka swona, leswaku ku ya emahlweni ka wena ku vonaka eka vanhu hinkwavo.”