Andzisa Rifuwo Ra Wena Ra Ntirho Wa Mfumo
1 Yesu u fanise ntshembo wa Mfumo ni rifuwo ra risima. (Mt. 13:44-46) Xana hi fana ni vavanuna lava nga exifanisweni xa Yesu lava xaviseke swilo swa vona hinkwaswo leswaku va ta xava nchumu wa nkoka lowukulu? Loko swi ri tano, hi ta rhangisa Mfumo wa Xikwembu, hambi loko ko va ni swiphiqo ni ku tikarhata ka munhu hi xiyexe.—Mt. 6:19-22.
2 Tanihi leswi ntirho wa hina wa Mfumo wu nga rifuwo, hi fanele hi navela ku wu andzisa. Xana ndlela ya hina ya vutomi yi kombisa yini? Xana hi andzisa ntirho wa hina wa Mfumo? Hi nga endla tano hi ku hlanganyela eswiphen’wini swo hambana-hambana swa vutirheli, leswi katsaka ntirho wa yindlu ni yindlu, ku endla maendzo yo vuyela, ku fambisa tidyondzo ta Bibele ni ku nyikela vumbhoni hi xitshuketa.
3 ‘Xana Ndzi Nga Ku Andzisa Njhani Ku Hlanganyela Ka Mina?’ Tanihi leswi lembe lerintshwa ra ntirho ri sungulaka, i swinene leswaku un’wana ni un’wana wa hina a kambisisa ntirho wa yena n’wini ku vona leswi a nga ha swi endlaka ku andzisa nkarhi lowu a wu heteke evutirhelini bya nsimu kutani a tivutisa: ‘Xana ndzi nga hlela swiyimo swa mina leswaku ndzi ta tirha tanihi phayona ra nkarhinyana nkarhi na nkarhi kumbe ndzi tshama ndzi ri rona? Hi ku endla mindzulamiso yi nga ri yingani, xana ndzi nga nghenela ntirho wa vuphayona bya nkarhi hinkwawo?’ Maphayona lamantshwa lama sungulaka hi September 1 ma fanelekela ku nghena Xikolo xa Ntirho wa Vuphayona haxawa.
4 Vahuweleri van’wana va tivekele pakani ya munhu hi xiyexe yo nyikela vumbhoni bya xitshuketa hi xitalo. Hakanyingi ntirho lowu wu humesa mihandzu leyinene. Van’wana va nga ha vona xilaveko xo antswisa eku endleni ka maendzo yo vuyela lama humelelaka kumbe eku sunguleni ka tidyondzo letintshwa ta Bibele.
5 Loko hi kuma leswaku vutirheli bya hina byi hikiwile hi ndlela yo karhi, xana hi nga endla yini leswaku hi byi andzisa? Lava koteke ku fikelela tipakani ta le henhla va bumabumela leswaku hi tiyimisela ku rhangisa swilaveko swa Mfumo ku nga khathariseki leswaku ku endleka yini. (Mt. 6:33) Ripfumelo ni ku titshega hi Yehovha hi ku helela i swa nkoka. (2 Kor. 4:7) Kombela mpfuno wakwe hi ku phikelela u khongela hi mbilu hinkwayo. (Lk. 11:8, 9) Hi nga tiyiseka leswaku Yehovha u ta katekisa matshalatshala ya hina ya xiviri yo andzisa ku hlanganyela ka hina entirhweni wakwe.—1 Yoh. 5:14.
6 Vulavula ni vamakwerhu van’wana va xinuna ni va xisati lava humeleleke eku andziseni ka vutirheli bya vona. Va vutise leswaku va swi hlurise ku yini swihinga handle ko hetiwa matimba. Mintokoto ya vona vini yi nga ha va yona leyi lavekaka leswaku yi ku tiyisekisa leswaku ku andzisa vutirheli swa koteka.
7 Loko u hlaya swihloko leswi nga eka Xihondzo xo Rindza kumbe Vutirheli Bya Hina Bya Mfumo leswi vulavulaka hi ntirho wa nsimu, anakanyisisa hi vuenti leswaku u nga swi tirhisa njhani swiringanyeto sweswo evutirhelini bya wena. Endla hi laha ku fanaka loko u va kona eminhlanganweni ya vandlha kumbe etinhlengeletanweni. Swiringanyeto leswi nyikeriweke exihlokweni lexi swi sekeriwe eka bulo leri a ri ri xiphemu xa nongonoko wa nhlengeletano ya xifundzha n’wexemu. I xo sungula xa swihloko leswi tlhandlamanaka leswi endleriweke ku hi pfuna leswaku hi landzelerisisa ni ku tirhisa xikhutazo lexi nyikeriweke hi nongonoko wolowo.
8 Yesu u langute vutirheli byakwe hi vuenti, a byi endla byi va mhaka leyikulu. U te: “Swakudya swa mina i ku endla ku rhandza ka Loyi a ndzi rhumeke.” (Yoh. 4:34) Xana hi titwa hi ndlela leyi fanaka? Loko swi ri tano, entiyisweni hi ta kuma tindlela to andzisa ntirho wa hina ni ku avelana “swilo leswinene” ni van’wana, leswi humaka laha rifuwo ra hina ri tshamaka kona.—Mt. 12:35; Lk. 6:45.