Xana U Nga Swi Kota Ku Ndlandlamuxa Ntirho Wa Wena Wo Chumayela?

1. Hi xihi xilaveko xa xihatla lexi nga kona entirhweni wo chumayela, naswona ha yini xi ri xa xihatla?

¹ Hi ku xiya leswaku ku ni vanhu vo tala lava tsakelaka ku twa mahungu lamanene ya Mfumo, Yesu u lerise vadyondzisiwa vakwe leswaku va ‘kombela N’wini wa ntshovelo leswaku a rhumela vatirhi entshovelweni wakwe.’ (Mat. 9:37, 38) Leswi hi hanyaka enkarhini wo hetelela wa nguva ya ntshovelo, i swa nkoka leswaku hi wu hisekela swinene ntirho wa hina ku tlula eku sunguleni. Leswi swi vula leswaku hi fanele hi kombela Xikwembu xi hi pfuna leswaku hi ta tiva leswi hi nga swi endlaka leswaku hi hlanganyela hi xitalo entirhweni wo chumayela.—Yoh. 14:13, 14.

2. Xana van’wana va angurisa ku yini hikwalaho ka leswi ku lavekaka vatirhi lava engetelekeke entirhweni wo chumayela?

² Tindlela To Ndlandlamuxa Ntirho Wo Chumayela: Hikwalaho ko pfuniwa hi Yehovha, vo tala va swi kotile ku va maphayona ya nkarhi hinkwawo. (Ps. 26:2, 3; Filp. 4:6) Van’wana va titsone swo tala leswaku va kota ku tirha tanihi maphayona ya nkarhinyana ku ringana n’hweti kumbe tin’hweti to hlayanyana elembeni. Leyi hi yona ndlela leyi va nga wu ndlandlamuxa ha yona ntirho wa vona wo chumayela. Ntsako lowu va nga va na wona loko va tirha tanihi maphayona ya nkarhinyana wu pfune vo tala va vona leswaku va va maphayona ya nkarhi hinkwawo.—Mint. 20:35.

3. Loko ku ri leswaku u tshame u va phayona ra nkarhi hinkwawo, i yini leswi u faneleke u anakanyisisa ha swona sweswi?

³ Xana U Nga Va Phayona Ra Nkarhi Hinkwawo?: Loko ku ri leswaku u tshame u tirha tanihi phayona ra nkarhi hinkwawo enkarhini lowu nga hundza, a swi kanakanisi leswaku wa ha wu tsundzuka ntsako lowu a wu ri na wona hi nkarhi wolowo. Xana u tshame u khongelela leswaku Yehovha a ku pfuna leswaku u tlhela u va phayona ra nkarhi hinkwawo? Swi nga endleka leswaku swiyimo leswi nga endla leswaku u tshika ku va phayona sweswi a swa ha ri kona, kutani u nga swi kota ku tlhela u va phayona.—1 Yoh. 5:14, 15.

4. Hi rihi lunghelo ro hlawuleka leri hinkwerhu ka hina ri hi pfulekeleke?

⁴ Ntirho wo tshovela wu ya emahlweni naswona wu ta hela ku nga ri khale. (Yoh. 4:35, 36) Onge hinkwerhu hi nga kambisisa swiyimo swa hina kutani hi hunguta mintirho yin’wana leyi hi yi endlaka siku ni siku leswaku hi ta ndlandlamuxa ntirho wa hina wo chumayela. Endzhaku ka loko hi ti kambisise hi ku tshembeka kutani hi swi vona leswaku a hi nge swi koti ku ndlandlamuxa ntirho wa hina wo chumayela, hi nga tivekela pakani yo tshama hi khomekile hi ntirho wo chumayela. (Mar. 12:41-44) Hakunene leri i lunghelo leri kumiwaka hi vanhu hinkwavo lava swiyimo swa vona swi va pfumelelaka leswaku va tirhisiwa hi Yehovha entirhweni lowu wo hlawuleka!—Ps. 110:3.