Xana U Lava Ku Endla Leswi Engetelekeke?

¹ Yesu u fanise Mfumo ni xuma xa risima. (Mat. 13:44-46) Ntirho wo hangalasa mahungu ya Mfumo na wona i xuma xa nkoka. Vutirheli lebyi byi faneriwa hi ku va byo rhanga evuton’wini bya hina, hambileswi ku hlanganyela hi xitalo eka byona swi lavaka leswaku hi titsona swo karhi. (Mat. 6:19-21) Xana u lava ku endla leswi engetelekeke entirhweni wa Mfumo?

² Xiya Swilo Leswi Swa Nkoka: Ku laveka swilo swo karhi leswaku hi antswisa ku hlanganyela ka hina evutirhelini: (1) ku tiyimisela ku rhangisa swilaveko swa Mfumo evuton’wini (Mat. 6:33); (2) ku kombisa ripfumelo ni ku titshega hi Yehovha (2 Kor. 4:1, 7); (3) ku lava mpfuno wa Xikwembu hi xikhongelo xa mbilu hinkwayo ni hi ku phikelela (Luka 11:8-10); (4) ku hanya hi ku pfumelelana ni swikhongelo swa hina.—Yak. 2:14, 17.

³ Tindlela To Antswisa Vutirheli Bya Hina: Hinkwerhu hi nga tivekela pakani ya nkoka ya ku hambeta hi heta nkarhi wo karhi evutirhelini n’hweti yin’wana ni yin’wana. Kambe, xana u tshama u anakanya ku tirhisa nkarhi wun’wana ni wun’wana lowu u wu kumaka leswaku u nyikela vumbhoni hi xitshuketa, u lwela ku antswisa swingheniso swa wena, u endla leswaku maendzo ya wena yo vuyela ma va lama humelelaka swinene ni ku lwela ku fambisa tidyondzo ta le kaya ta Bibele leti endlaka nhluvuko? Xana u nga swi kota ku va phayona ra nkarhinyana kumbe ra nkarhi hinkwawo kumbe ku ya tirha laha ku nga ni xilaveko lexikulu? Loko u ri makwerhu wa xinuna la khuvuriweke, xana u nga lwela ku fanelekela ku va nandza wa vutirheli kumbe nkulu? (1 Tim. 3:1, 10) Xana u nga antswisa vutirheli bya wena hi ku endla xikombelo xa ku ya tirha eBethele, xa ku ya eXikolweni xa Ndzetelo wa Vutirheli kumbe xa ku ya leteriwa ku va murhumiwa eXikolweni xa Gilead?—Luka 10:2.

⁴ Makwerhu loyi a a heta siku hinkwaro a ri entirhweni wa ku tihanyisa ni ku heta nkarhi wo tala emintlangwini u khutaziwe leswaku a va phayona ra nkarhi hinkwawo. U sungule hi vuphayona bya nkarhinyana kutani a lulamisa swiyimo swakwe leswaku a ta kota ku nghenela vutirheli bya nkarhi hinkwawo. Endzhakunyana u ye eXikolweni xa Ndzetelo wa Vutirheli, lexi n’wi pfuneke leswaku eku heteleleni a va mulanguteri wa xifundzha. U tsake ngopfu hileswi a tirhiseke xikhutazo lexi a nyikiweke xona, kutani wa tiyiseka leswaku u kume ntsako lowukulu hikwalaho ka xiboho lexi a xi endleke xa ku lava ku endla leswi engetelekeke entirhweni wa Mfumo.

⁵ Yehovha u katekisa lava tiendlaka va kumeka. (Esa. 6:8) U nga pfumeleli nchumu wu ku sivela ku antswisa vutirheli bya wena, kutani u ta eneriseka swinene u tlhela u phyuphyisiwa.