Bokisi Ra Swivutiso

◼ Hi byihi vuxiyaxiya lebyi vatswari va faneleke va va na byona loko va famba ni vana va vona lavatsongo evutirhelini bya nsimu?

Swi fanerile leswaku vatswari lava nga Vakreste va famba ni vana va vona evutirhelini bya nsimu, va va letela ku byela van’wana mahungu lamanene ya Mfumo. Loko va ri karhi va endla leswi, i swa nkoka leswaku va veka tihlo eka vana va vona lavatsongo hikwalaho ka makhombo lama nga vaka kona ensin’wini, hambi ku ri endhawini leyi “langutekaka yi hlayisekile.” Ku hlaseriwa ni ku khomiwa ka vana hi ndlela yo biha ku nyanya ku biha hikwalaho ka makwanga ni ku tikhoma ko biha hi tlhelo ra rimbewu ‘emasikwini lawa yo hetelela’ lawa hi hanyaka eka wona. (2 Tim. 3:1-5) Vatswari va fanele va teka magoza lama faneleke leswaku va sirhelela vana va vona eka vanhu lava nga va hlaselaka. I yini lexi nga endliwaka?

Bibele yi hi nyika ndzayo ya vutlharhi ya leswaku hi va ni vuxiyaxiya ni ku languta emahlweni leswaku hi vona khombo ra ha ri ekule. (Swiv. 22:3; Mat. 10:16) Emhakeni leyi, xikongomelo a hi ku veka swinawana, kambe i vutlhari leswaku mutswari kumbe munhu un’wana lonkulu a famba ni n’wana loko va ri evutirhelini bya nsimu. Loko vantshwa vambirhi lava kuleke va tirha kun’we, i swinene leswaku mutswari kumbe munhu un’wana lonkulu a tshama a va veke tihlo minkarhi hinkwayo. Ina, loko n’wana a ri karhi a kula naswona swi tikomba leswaku wa swi kota ku byarha vutihlamuleri, vatswari va nga ha endla xiboho leswaku a nga boheki ngopfu ku tshama a vekiwe tihlo hi vatswari.—Nakambe vona Bokisi ra Swivutiso eka Vutirheli Bya Hina Bya Mfumo bya October 1992.

Nakambe i vutlharhi ku va ni vuxiyaxiya loko u famba hi movha ni loko u famba hi milenge. Ku teka magoza lama faneleke ya vuhlayiseki hakanyingi swi sivela timhangu, nhlomulo, ku hakela timali ta vutshunguri ni ku tikuma u voniwe nandzu hi misava leyi hi hanyaka eka yona leyi rhandzaka ku tenga milandzu.

Swa fanela leswaku vana va “ḍunis[a] v̌ito ra Yehova!” (Ps. 148:12, 13) Marito ya vona ya vuhlangi lama tsakisaka kun’we ni mahanyelo ya vona lamanene loko va ri evutirhelini bya nsimu ma tsakisa van’wana naswona ma dzunisa Yehovha. Vatswari, ringetani hi matimba hinkwawo leswaku mi pfuna vana va n’wina leswaku va hlanganyela nkarhi na nkarhi eku twariseni ka mahungu lamanene loko hi tlhelo mi tshama mi xalamukele ku va sirhelela eka makhombo wahi ni wahi lama nga vaka kona!