Vantshwa, Xana Mi Tikarhatela Ku Endla Nhluvuko?
1. Makwerhu wa xinuna laha riki muntshwa u fanele a sungula rini ku tirhisa nkongomiso lowu nga eka 1 Timotiya 3:1?
1 “Loko munhu un’wana ni un’wana a lwela ku fikelela ntirho . . . , u navela ntirho lowunene.” (1 Tim. 3:1) Marito lawa lama huhuteriweke ma khutaza vamakwerhu leswaku va endla nhluvuko leswaku va ta fanelekela ku kuma malunghelo evandlheni. Xana u fanele u va la kuleke leswaku u faneleka? Kahle-kahle i swa nkoka leswaku u sungula ku endla nhluvuko wa ha ri ntsongo. Hi ndlela leyi u ta kuma ndzetelo ni ku kombisa ku faneleka ka wena leswaku u bumabumeriwa leswaku u va nandza wa vutirheli loko se u kurile. (1 Tim. 3:10) Loko u ri makwerhu wa xinuna laha riki muntshwa naswona u khuvuriwile, xana u nga wu endla njhani nhluvuko?
2. Moya wa ku tinyiketela wu nga hlakuleriwa ni ku kombisiwa njhani?
2 Moya Wo Tinyiketela: Tsundzuka leswaku u endla nhluvuko leswaku u fanelekela ntirho lowunene, ku nga ri ku tiendlela vito. Hikokwalaho, hlakulela ku navela ku pfuna vamakwenu. Ndlela yin’wana yo endla leswi i ku tekelela xikombiso lexinene xa Yesu. (Mat. 20:28; Yoh. 4:6, 7; 13:4, 5) Kombela Yehovha a ku pfuna leswaku u navela ku pfuna van’wana. (1 Kor. 10:24) Xana u nga swi kota ku pfuna lava dyuhaleke kumbe lava vabyaka evandlheni? Xana u va kona leswaku u tsema byanyi, u basisa Holo ya Mfumo kumbe ku endla swin’wana leswaku u hlayisa Holo ya Mfumo? Xana u lunghiselela ku nyikela nkulumo eka Xikolo xa Vutirheli bya le Tilweni loko loyi a faneleke a yi nyikela a nga ri kona? Loko u endla tano u ta tsaka swinene.—Mint. 20:35.
3. Ku aka vuxaka ni Xikwembu i swa nkoka hi ndlela yihi naswona hi nga ku hlakulela njhani?
3 Ku Aka Vuxaka Ni Xikwembu: I swa nkoka swinene leswaku nandza loyi a nga evandlheni a aka vuxaka ni Xikwembu ku tlula ku va ni tintalenta to karhi to hlawuleka kumbe ku va ni vuswikoti hi ntumbuluko. Wanuna wa moya u ringeta ku languta swilo hilaha Yehovha na Yesu va swi langutaka hakona. (1 Kor. 2:15, 16) U kombisa “mihandzu ya moya.” (Gal. 5:22, 23) I muhuweleri la hisekaka loyi a rhangisaka Mfumo wa Xikwembu. (Mat. 6:33) U nga va ni timfanelo ta moya hi ku va ni xiyimiso lexinene xa dyondzo ya munhu hi yexe. Leswi swi katsa ku dyondza Bibele siku ni siku, ku hlaya nkandziso wun’wana ni wun’wana wa Xihondzo xo Rindza ni Xalamuka! ni ku lunghiselela minhlangano u tlhela u va kona. (Ps. 1:1, 2; Hev. 10:24, 25) Loko Pawulo a khutaza muntshwa Timotiya leswaku endla nhluvuko hi tlhelo ra moya, u tsale a ku: “Nyikela nyingiso lowu hambetaka . . . ni le ku dyondziseni ka wena.” (1 Tim. 4:15, 16) Tikarhatele ku nyikela tinkulumo ta le ka Xikolo xa Vutirheli bya le Tilweni hi ku hiseka. Lunghiselela nsimu u tlhela u va kona nkarhi na nkarhi. Tivekele tipakani ta moya u tlhela u tikarhatela ku ti fikelela to fana ni vuphayona, ku tirha eBethele kumbe ku ya eka Xikolo xa Bibele xa Vamakwerhu lava nga Tekangiki. Ku aka vuxaka ni Xikwembu swi ta ku pfuna leswaku u “balekela ku navela loku fambisanaka ni vuntshwa.”—2 Tim. 2:22.
4. Hi wihi nkoka wa ku tshembeka?
4 Ku Tshembeka: Leswi vamakwerhu lava a va hlawuriwe ku phamela Vakreste lava a va pfumala hi lembe-xidzana ro sungula a ku ‘lavaka leswaku ku tiyisekiwaka ha vona,’ entiyisweni lava a va tiviwa hi ku tshembeka, naswona vaapostola a va tiyiseka leswaku ntirho va ta wu endla. Leswi swi va endle leswaku va dzika eka timhaka tin’wana ta nkoka. (Mint. 6:1-4) Hikokwalaho, loko u nyikiwa ntirho evandlheni, wu endle hi matimba ya wena hinkwawo. Tekelela Nowa, loyi hi vurhon’wana a landzeleleke swiletelo leswi a nyikiweke swona leswaku a aka ngalava. (Gen. 6:22) Ku tshembeka i ka nkoka eka Yehovha naswona swi kombisa leswaku u wupfile hi tlhelo ra moya.—1 Kor. 4:2, hlaya bokisi leri nge, “Nkoka Wa Ku Letela.”
5. Ha yini vantshwa va endla nhluvuko?
5 Hilaha swi profetiweke hakona, Yehovha u hatlisisa ntirho wo hlengeleta. (Esa. 60:22) Hi xiringaniso, vanhu lava ringanaka kotara ya miliyoni va khuvuriwa lembe ni lembe. Leswi vanhu vo tala lavantshwa va amukelaka ntiyiso, ku laveka vavanuna lava fanelekaka hi tlhelo ra moya leswaku va ta va ni vutihlamuleri evandlheni. Sweswi, ku tlula rini na rini, ku ni ntirho wo tala wo wu endla entirhweni wa Yehovha. (1 Kor. 15:58) Vantshwa, xana ma wu endla nhluvuko? Loko swi ri tano, hakunene mi navela ku endla ntirho lowunene swinene!
[Marito lama tshahiweke exihlokweni lama nga eka tluka 2]
Leswi vanhu vo tala lavantshwa va amukelaka ntiyiso, ku laveka vavanuna lava fanelekaka hi tlhelo ra moya leswaku va ta va ni vutihlamuleri evandlheni
[Bokisi leri nga eka tluka 3]
Nkoka Wa Ku Letela
Vantshwa lava fanelekaka va vuyeriwa loko vakulu va va nyika swiavelo ni ku va letela. Endzhaku ka minhlangano, mulanguteri wa xifundzha a a tshame exitejini a khutaza muhuweleri. U xiye mufana lontsongo loyi a yime ekusuhi na yena, kutani u n’wi vutisile loko a rindzele ku vulavula na yena. Muntshwa loyi u vule leswaku u averiwe ku basisa xiteji endzhaku ka minhlangano yin’wana ni yin’wana. Vatswari va yena a va lunghekele ku famba, kambe a nga lavi ku famba a nga hetisisanga xiavelo xa yena. Hi ku tsaka mulanguteri wa xifundzha u sukile. U te: “Vakulu va le vandlheni leri va xalamukela ku letela vantshwa lava fanelekaka hi ku va nyika swiavelo evandlheni. Sweswo swi endla leswaku nkarhi na nkarhi loko ndzi endzela vandlha leri ku va ni vantshwa lava va va bumabumelaka leswaku va va malandza ya vutirheli.”