Mpfuno Wa Wena Wa Laveka
1 “Hi nkhensa hinkwaswo leswi mi hi endlelaka swona. Hakunene ntirho wa n’wina wa hi vuyerisa.” Marito lawa ma yi phofula kahle ndlela leyi hi titwaka ha yona hi vakulu ni malandza ya vutirheli. Leswi nhlengeletano ya Xikwembu yi hambetaka yi ndlandlamuka, ku tshama ku ri ni xilaveko xa vavanuna lava wupfeke lava nga ta tirha emavandlheni lama lavaka ku va 100 000 emisaveni hinkwayo. Loko u ri makwerhu wa xinuna la khuvuriweke, mpfuno wa wena wa laveka.
2 ‘Lwela Ku Fikelela Ntirho Lowu’: U nga endla yini leswaku u fikelela malunghelo lama engetelekeke ya swa moya? (1 Tim. 3:1) Kahle-kahle, u nga ma fikelela hi ku va xikombiso lexinene eka hinkwaswo leswi u swi endlaka. (1 Tim. 4:12; Tito 2:6-8; 1 Pet. 5:3) Hlanganyela hi xitalo entirhweni wo chumayela, u tlhela u pfuna van’wana leswaku na vona va endla tano. (2 Tim. 4:5) Khathalela vapfumeri-kuloni hi mbilu hinkwayo. (Rhom. 12:13) Hisekela ku dyondza Rito ra Xikwembu, naswona u hlakulela ‘vutshila byo dyondzisa.’ (Tito 1:9; 1 Tim. 4:13) Gingiritekela ku endla mintirho leyi vakulu va ku aveleke yona. (1 Tim. 3:10) Loko u ri nhloko ya ndyangu, ‘ungamela ndyangu wa wena hi mukhuva lowunene.’—1 Tim. 3:4, 5, 12.
3 Leswaku u faneleka ku va nandza wa vutirheli kumbe nkulu swi lava leswaku u tirha swi nyawula naswona u tirha hi ku tinyiketela. (1 Tim. 5:17) Hikwalaho, loko u ri karhi u lwela ku fikelela ntirho lowu, swi lava leswaku u tikarhatela ku tirhela van’wana. (Mat. 20:25-28; Yoh. 13:3-5, 12-17) Anakanyisisa hi vumunhu bya Timotiya, kutani u byi tekelela. (Filp. 2:20-22) Ku fana na yena, endla leswaku mahanyelo ya wena lamanene ma ku vulavulela. (Mint. 16:1, 2) ‘Ku ya emahlweni ka wena ku ta vonaka eka vanhu hinkwavo,’ loko u ri karhi u hlakulela timfanelo ta moya leti lavekaka leswaku u ta kuma malunghelo lama engetelekeke naswona u tirhisa ndzayo yihi ni yihi leyi u nyikiwaka yona.—1 Tim. 4:15.
4 Vatswari, Letelani Vana Leswaku Va Ta Va Mpfuno: Vana va nga dyondzisiwa ku va mpfuno ku sukela evutsongwanini. Va leteleni ku rhiya ndleve loko va ri eminhlanganweni, mi va letela ku chumayela ni ku va xikombiso lexinene hi mahanyelo ya vona loko va ri eHolweni ya Mfumo ni loko va ri exikolweni. Va dyondziseni ku tirhela van’wana, va endla mintirho yo fana ni ku basisa Holo ya Mfumo, ku pfuna vadyuhari ni swin’wana. Va tshikeni va tiphina hi ntsako lowu munhu a vaka na wona loko a hanana. (Mint. 20:35) Loko mi va letela hi ndlela leyi, swi ta va pfuna leswaku va va maphayona, malandza ya vutirheli ni vakulu va mundzuku.