“Xana Vanhu Hinkwavo Va Ta Kala Va Rhandzana?”
1 Rungula lerinene, leri khutazaka ni leri kufumetaka mbilu ri ta twarisiwa emisaveni hinkwayo hi tindzimi ta 169. Hi rihi rungula leri? Naswona xana ri ta twarisiwa hi ndlela yihi?
2 Rungula leri ri vulavula hi ku rhandza muakelani. Ri ta kumeka eka xiphephana xa Kingdom News No. 35, lexi nge “Xana Vanhu Hinkwavo Va Ta Kala Va Rhandzana?” Xiphephana lexi xa Kingdom News xi hlamusela mahungu ya sweswinyana ya misava hinkwayo hi ku komisa, xi kombisa leswaku ku kayivela ka rirhandzu exikarhi ka vanhu hi xona xivangelo-nkulu xa mbitsi ni maxangu. Xi hlamusela xivangelo lexi endlaka leswaku ngopfu-ngopfu esikwini ra hina, rirhandzu ro rhandza muakelani ri hola ni leswi ku hola ka rona swi vulaka swona enkarhini lowu taka.
3 Ku engetela kwalaho, xiphephana xa Kingdom News No. 35 xi kombisa leswaku rirhandzu ra xiviri ra muakelani ri kona exikarhi ka timiliyoni ta vanhu lava hanyaka emisaveni ya namuntlha. Xi kombisa lava hlanganyelaka eku pfuxeteni ka Vukreste byo sungula—vugandzeri bya lembe-xidzana ro sungula, lebyi funghiweke hi ku rhandza muakelani hilaha Yesu Kreste a dyondziseke hakona.—Lk. 10:25-37.
4 Xiphephana xa Kingdom News No. 35 xi gimeta hi ku hlamusela ndlela leyi misava hinkwayo ya vanhu ku nga ri khale yi nga ta kombisa rirhandzu ra muakelani ehansi ka vulawuri bya Mfumo wa Xikwembu ha Kreste. Hinkwavo lava hlayaka rungula leri va khutaziwa ku tikumela broxara leyi nge I Yini Leswi Xikwembu Xi Swi Languteleke Eka Hina? ni ku dyondza ndlela yo va xiphemu xa lunghiselelo ra misava hinkwayo ra rirhandzu leri hlamuseriwaka hi vuxokoxoko eRitweni ra Xikwembu.
5 I Mani La Nga Ta Hangalasa Rungula Leri? Timbhoni ta Yehovha emisaveni hinkwayo ti ta twarisa rungula leri ra ku rhandza muakelani eka vanhu lava ti tolovelaneke na vona, vaakelani ni maxaka etin’hwetini ta October na November. Hinkwavo lava fanelekaka va khutaziwa ku hlanganyela erivaleni eku hangalaseni ka xiphephana xa Kingdom News No. 35.
6 Pakani-nkulu ya tsima leri i ku khutaza vanhu leswaku va tsakela dyondzo ya Bibele hi ku tirhisa broxara leyi nge Leswi Xi Swi Languteleke kumbe buku leyi nge Vutivi. Ku engetela kwalaho, loko nandza un’wana ni un’wana wa Yehovha a endla matshalatshala hi mbilu hinkwayo ya yena swi ta endla leswaku ku nyikeriwa vumbhoni lebyinene malunghana na Yehovha, Xikwembu xa rirhandzu, kun’we ni N’wana wakwe, Yesu Kreste.